Chwe Gwlad: Faletau i golli tair gêm gyntaf Cymru

Taulupe Faletau yn ystod un o gemau CymruHuw Evans agency

Roedd Taulupe Faletau newydd ddechrau chwarae eto wedi i anaf arall ei gadw rhag cymryd rhan yng ngemau Cyfres yr Hydref

Ni fydd Taulupe Faletau yn gallu bod yn rhan o garfan Cymru ar gyfer eu tair gêm gyntaf ym Mhencampwriaeth y Chwe Gwlad oherwydd anaf.

Fe gafodd niwed i gyhyr croth ei goes (calf) wrth chwarae i dîm Rygbi Caerdydd yn erbyn y Gweilch ddydd Calan.

Roedd y chwaraewr rhif wyth, 35 oed, yn absennol o gemau'r hydref hefyd yn dilyn anaf i'w ben-glin ac ond newydd ddychwelyd i'r garfan ryngwladol.

Fe fydd prif hyfforddwr Cymru, Steve Tandy, yn cadarnhau pwy sydd yn y garfan ar gyfer gemau'r Chwe Gwlad ar 20 Ionawr.

Fe fydd capten Jac Morgan a'r canolwr Max Llewellyn yn colli o leiaf hanner cyntaf y bencampwriaeth oherwydd anafiadau.

Dywedodd hyfforddwr Caerdydd, Corniel van Zyl "nad yw'n glir" pa mor fuan y bydd yn gallu chwarae eto, "ond rydyn ni'n bendant yn edrych ar ganol y Chwe Gwlad, ac ein gêm yn erbyn Leinster", sy'n cael ei chynnal ar 27 Chwefror.

Fe fyddai hynny'n golygu na fydd Faletau ar gael i Gymru oddi cartref yn erbyn Lloegr ar 7 Chwefror, a'r gemau cartref yn erbyn Ffrainc ar 15 Chwefror a'r Alban ar 21 Chwefror.

"Dyna'r targed - gawn ni weld sut eith hi," ychwanegodd van Zyl.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [email protected] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig