Cynnal angladd cyn-chwaraewr a rheolwr Cymru Terry Yorath

Mae angladd cyn-chwaraewr a rheolwr tîm pêl-droed Cymru, Terry Yorath, wedi ei gynnal yn Leeds brynhawn Llun.

Fe chwaraeodd Yorath 59 o weithiau dros ei wlad yn y 1960au a'r 70au a bu'n rheolwr ar y tîm cenedlaethol rhwng 1989 a 1994.

Bu farw'n gynharach yn y mis yn 75 oed yn dilyn cyfnod byr o salwch.

Roedd tua 100 o bobl yn bresennol yn y gwasanaeth, gyda nifer o wynebau amlwg o'r byd pêl-droed yn eu plith.

Wedi ei eni a'i fagu yng Nghaerdydd, roedd Yorath yn chwaraewr canol cae caled ac yn arweinydd naturiol ar y cae.

Ond roedd Leeds hefyd yn ddinas oedd yn agos iawn i'w galon, roedd wedi hen gartrefu yno ers blynyddoedd ac wedi chwarae 199 o weithiau dros y clwb.

Yn ogystal â sefydlu ei hun fel rhan allweddol o'r tîm enillodd yr Adran Gyntaf yn 1973-74, fe wnaeth Yorath gwrdd â'i wraig, Christine a throi at Gatholigiaeth yn ystod ei gyfnod yn Leeds.

Fe dreuliodd Yorath gyfnodau yn chwarae i Coventry City, Tottenham Hotspur, Vancouver Whitecaps, Bradford City ac Abertawe hefyd.

Roedd Côr Meibion Taf, o'i ddinas enedigol, yn rhan amlwg o'r gwasanaeth yn Eglwys Babyddol The Imacculate Heart of Mary gan berfformio Hen Wlad fy Nhadau, Ar Hyd y Nos, Danny Boy a You'll Never Walk Alone.

Hen Wlad Fy Nhadau gafodd ei chanu wrth i'r arch gael ei chario i'r eglwys a Chwm Rhondda oedd yr emyn cyntaf.

Dywedodd Steffan Jones o'r côr ei bod "yn hanfodol bod Cymru a'r Gymraeg yn cael ei gynrychioli yn y gwasanaeth" a'i bod yn "fraint aruthrol" i'r aelodau eu bod wedi'u gwahodd".

Roedd sawl wyneb amlwg o'r byd pêl-droed yn bresennol gan gynnwys Chris Coleman, Ian Rush, Kevin Ratcliffe a Mickey Thomas.

Yn ystod y gwasanaeth fe wnaeth y comedïwr a chefnogwr pêl-droed Cymru, Elis James, arwain y teyrngedau drwy roi trosolwg o yrfa Terry Yorath fel chwaraewr.

Dechreuodd drwy sôn am ei benderfyniad i ganolbwyntio ar bêl-droed yn hytrach na rygbi pan yn ei arddegau.

Soniodd hefyd am rôl Yorath yn y broses o newid yr anthem oedd yn cael ei chanu cyn gemau Cymru o God Save The Queen i Hen Wlad Fy Nhadau.

Yn ei bregeth, fe ddywedodd y Parchedig Dennis Cassidy fod "Terry wedi byw bywyd llawn haelioni".

Cyfeiriodd at "gynhesrwydd ei gymeriad, ei garedigrwydd a'i natur hwyliog" gan ychwanegu fod y teulu yn ddiolchgar iawn am yr holl negeseuon y maen nhw wedi eu derbyn.

Ychwanegodd fod ffydd Yorath hefyd "yn rhan o'i hunaniaeth".

Mab Yorath, Jordan oedd yr olaf i roi araith angladdol.

"Roedd o'n ddyn doniol, caredig, diymhongar a balch," meddai.

Ychwanegodd fod ei dad wedi "dyfalbarhau drwy boen ofnadwy" wedi marwolaeth ei fab Daniel, wrth iddo reoli tîm Cymru ond rai dyddiau yn ddiweddarach - rhywbeth yr oedd yn difaru ei wneud.

Bu farw Daniel yn 15 oed tra'n chwarae pêl-droed yn yr ardd gyda'i dad o ganlyniad i gyflwr oedd yn effeithio ar ei galon.

"Roedd pêl-droed yn ei waed," meddai Jordan, gan nodi ei fod wedi mynychu angladdau pob un o'r 56 o gefnogwyr Bradford a fu farw yn y tân yn stadiwm Valley Parade yn 1985.

Fe orffennodd y gwasanaeth gyda Chôr Meibion Taf yn canu Danny Boy - fel teyrnged i Daniel.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.