Lluniau: Lleoliadau rhamantus Cymru

Ydy chi eisiau mynd a'ch cariad i un o lefydd hardda' Cymru ar Ddiwrnod Santes Dwynwen?

O Lanfair i'r Trallwng, mae'r Ymddiriedolaeth Genedlaethol yng Nghymru wedi cyhoeddi casgliad o luniau o fannau mwyaf rhamantus Cymru, golygfeydd sy'n cyfleu "dw i'n dy garu di".

Dywedodd yr Ymddiriedolaeth Genedlaethol yng Nghymru:

"Rydym wedi dewis detholiad o olygfeydd a fydd yn ennyn 'cariad ar yr olwg gyntaf', y gellir eu methu'n hawdd os nad ydych yn gwybod ym mhle i edrych.

"Troad yn y llwybr, bwlch rhwng y coed, neu ben bryn uwchben y môr sy'n darparu'r man delfrydol i gymryd seibiant, mwynhau'r olygfa, a dweud 'rwy'n dy garu di' wrth rywun arbennig, ar y diwrnod mwyaf rhamantus yn y calendr yng Nghymru."

Gardd y Galon, Gerddi DyffrynPaul Harris

Gardd y Galon - calon gudd yng Ngerddi Dyffryn ym Mro Morgannwg

Allt y Môr, ger LlanfairPaul Harris

Allt y Môr, ger Llanfair - 'Cornel OMG' mae pobl leol yn galw'r olygfa odidog hon dros Harlech a Bae Ceredigion. Golygfa sy'n ddigon i wneud eich calon guro ychydig yn gynt

Nant GwynantGwenno Thomas

Cartref y ddraig Gymreig yn Ninas Emrys - mae'r olygfa hon dros Nant Gwynant yn Eryri yn deffro hanes chwedl enwog am y frwydr rhwng y ddraig goch a'r ddraig wen, lle bu'r ddraig goch yn fuddugoliaethus

Foel y Mwnt, CeredigionPaul Harris

Mae'r olygfa banoramig sydd i'w gweld o ben Foel y Mwnt yn caniatau i chi weld Ynys Enlli a'r Wyddfa ar ddiwrnod clir. Ambell waith gallwch weld dolffiniaid, llamhidyddion neu forloi o'r man ysblenydd hwn. Lle hyfryd i fynd am dro ddiwrnod Santes Dwynwen

Tŷ Newton, DinefwrAndrew Butler

O'r fainc bren yn y parc ceirw mae 'na olygfa wych o Dŷ Newton - edrych fel lle perffaith i gariadon gymryd hoe wrth droedio llwybr Parc y Ceirw. Mae gan Ddinefwr, Sir Gâr, gysylltiadau cryf â thywysogion Cymreig y Deheubarth

Elyrch ar gamlas Erddig, WrecsamPaul Harris

Mae elyrch yn dueddol i baru am oes, felly os ydych chi'n teimlo'r rhamant ger camlas ganolog Erddig... efallai bod cwestiwn hoffech chi ei ofyn i'ch partner!

Plas Menai a'i FenaiPaul Harris

O Blas Menai mae golygfa hyfryd o'r Fenai ac Eryri. Dim ond tafliad carreg i ffwrdd mae Ynys Llanddwyn, sef ynys cariadon Cymru a chartref adfeilion eglwys Santes Dwynwen

Dinas DinlleNational Trust Images

"Nunlle fel Dinlle pan fo'r tywydd yn braf" - ar ddiwrnod clir, gallwch weld Ynys Llanddwyn sef ynys nawddsant cariadon Cymru, Santes Dwynwen, o Ddinas Dinlle. Yn ôl y stori, dyma ble'r oedd Dwynwen yn byw ar ôl sefydlu lleiandy yno. Mae adfeilion eglwys a oedd wedi'i chysegru iddi i'w gweld yno hyd heddiw

Gerddi BodnantPaul Harris

Y Teras Rhosynnau yng ngherddi Bodnant. O'r safle yma mae 'na olygfa fendigedig o'r Carneddau dros Ddyffryn Conwy. Lle da i roi tusw o rosynnau i'ch cariad, falle?

PetalauNadia Mackenzie

Mae hyd yn oed petalau'r blodau ym Modnant yn teimlo'r rhamant...

Castell PowisPaul Harris

Maen nhw'n dweud fod Yr Eidal yn un o'r gwledydd mwyaf rhamantus, ond gall yr olygfa hon o'r Gerddi Eidalaidd yng Nghastel Powis, Trallwng, alw'r teimlad o ramant cystal ag unrhyw le!

Deilen derwen siâp calonHilary Daniel

Dydd Santes Dwynwen Hapus i chi gyd!

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig

Hefyd o ddiddordeb