Rwy'n hoffi teithio, chwarae tenis, canu'r piano, darllen, dysgu ieithoedd estron, coginio a thyfu llysiau.

Indonesieg yw fy mamiaith, ond rwyf hefyd yn siarad Malay, Mandarin, Saesneg, Almaeneg a thipyn bach o Ffrangeg. Mae Cymraeg ar y ffordd gobeithio!

Pan glywais i Gymraeg yn cael ei siarad, roedd yn ddiddorol ac wedi tynnu fy sylw. Felly, es i ar gwrs Carlam yn Aberystwyth i gael blas ar yr iaith. Roedd yn anodd ac yn her fawr i mi ddysgu.

Ymaelodais i ar gwrs rhan amser i oedolion unwaith yr wythnos yn Hwlffordd. Es i ddim i'r dosbarth yn gyson, oherwydd rhaid oedd i fi fynd dros y môr yn achlysurol i ymuno â fy ngŵr oedd yn gweithio yn Indonesia ar y pryd. Dysgais i nawr ac yn y man am dros dair blynedd nes i fi gael tystysgrif arholiad Defnyddio'r Gymraeg i Oedolion. Treuliais i fwy o amser dramor, a gadewais i ddysgu Cymraeg am dros bedair blynedd.

Cymru yw fy nghartref nawr, mae'n bwysig i fi siarad yr iaith frodorol, felly penderfynais i ddysgu Cymraeg eto cyn Eisteddfod Tyddewi 2002. Es i ddosbarthiadau deirgwaith yr wythnos, es i'r Ysgol Haf, Cwrs Penwythnos, Sadwrn Siarad a gweithgareddau CYD mor aml a medrwn i achub cyfle i ymarfer y Gymraeg. Mae gen i golofn pob mis ym mhapur bro'r Llien Gwyn, Abergwaun.

Helpais i yn Eisteddfodau Tyddewi, Meifod ac Abertawe fel stiward ac ym mhabell y dysgwyr. Trefnais i barti bwyd Indonesaidd i godi arian ar gyfer yr Eisteddfod a'r papur bro. Wnes i arddangos coginio yn Eisteddfod Tyddewi, yn y Noson Gymraeg, Cymdeithas Osteoporosis, ac yng nghyfarfodydd CYD. Hefyd, rwy wedi paratoi bwyd gwerin Indonesiaidd i ddathlu Dydd Gŵyl Dewi eleni, roedd yn llwyddiant. Rwy bob amser yn barod i helpu pan ddaw cyfle!

Rwy' wedi ymddangos yn fyw ar raglen Prynhawn Da, lle coginiais i fwydydd Indonesiaidd, ac hefyd cymerais i ran yn y rhaglen Cwpwrdd Dillad, yn gwisgo dillad traddodiadol Indonesia.

Enillais i'r wobr gyntaf yng nghystadleuaeth ysgrifenedig Merched y Wawr ar gyfer dysgwyr llynedd, rwy wrth fy modd. Ar ôl hynny, ces i gyfweliadau ar gyfer papurau, rhaglen deledu Wedi 3 a Radio Cymru. Rwy'n gwerthfawrogi eu sylw ac yn falch bod fy ngwaith caled yn cael ei gydnabod.

Rwy wedi magu digon o hyder i siarad Cymraeg bob amser a theimlo'n agos iawn mewn cymdeithas Gymraeg, rwy'n hapus a bodlon yn eu plith! Felly, rwy'n trefnu cyfarfod hamddenol unwaith y mis i ddysgwyr brwdfrydig i ddod at ei gilydd i ymarfer Cymraeg a chadw'r heniaith yn fyw.

Cymru yw fy ngwlad nawr, rwy'n cynefino'n fodlon, rwy'n awyddus i ddysgu'r iaith ac annog y di-Gymraeg i ddilyn yr un llwybr. Rwy'n ysu i hyrwyddo'r heniaith bob amser pan ddaw cyfle.