Fe ofynnon ni wrth y gantores amryddawn o Dde Sir Benfro am ychydig o'i hanes.

"Dechreues i gael gwersi canu pan oeddwn yn saith mlwydd oed, a hyd at oeddwn i yn ddeunaw fe fues yn cystadlu mewn Eisteddfodau, yn canu yn unigol, deuawdau a chorau. Dechreues i fand yn yr ysgol ac enillon ni gystadleuaeth ar Uned 5 am y band gorau yng Nghymru o dan 18! .

Es i'r coleg yn Newcastle pan oeddwn i'n ddeunaw oed i astudio gradd yn Jazz, Pop a Commercial Music. Roedd y cwrs yma yn brofiad ffantastig oherwydd roedd rhaid i bawb berfformio mewn band ddwywaith y flwyddyn a chael eu graddio ar y perfformiadau hynny. Rhoddodd hyn lawer o hyder i mi a dechreues i fand iawn yn y coleg. Cafon ni gyfle i recordio dwy CD yn yr amser hyn a chwareuon ni yng Ngŵyl Roc a Phop Leeds hefyd!

Ar ôl blwyddyn o fyw yn Newcastle, fe benderfynais fynd i deithio gyda'n 'whaer i Dde a Chanoldir America a Mexico am bum mis. Cafon ni amser da a llawer o brofiadau bythgofiadwy - rafftio dŵr gwyn yn Peru, plymio scuba yn Honduras, seiclo lawr llosgfynydd yn Ecuador! Roedd y band wedi gorffen erbyn hyn, ac ar ôl i fi ddod yn ôl i Gymru, es i ati i ddechrau chwarae yn unigol.

Yn 2004 ges i fy ngwobrwyo am y sesiwn byw gorau ar Radio Sir Benfro a CD yr wythnos ar Radio Ceredigion. Ges i gais hefyd i rhoi un o'm caneuon i ar y CD `Pembrokeshire Acoustic Sessions' i godi arian at yr Apêl Tsunami.

Yn gynnar yn 2005 cwrddais i â Lee Mason, ac ers 'ny mae e wedi bod yn chwarae gitâr gyda fi. Rvdym wedi recordio E.P. Saesneg ers hynny, wedi recordio a rhyddhau albwm Gymraeg -`Clyw Sibrydion' gyda Stiwdio Fflach ar label RASP - ac ar fin rhyddhau albwm Saesneg `Kick the Sand' ym mis Ebrill 2007.

Rydym yn brysur yn chwarae o amgylch Sir Benfro, Abertawe a Chaerdydd, ac wedi perfformio yn Sesiwn Fawr Dolgellau, Gŵyl y Cenhedloedd Bychain yng Nghil y Cwm, Gŵyl Wychwood yn Cheltenham, Gŵyl y Celtic Blue Rock yn Llanfyrnach a llawer mwy."