Teithiais i i Abertawe gyda fy nhad ar Ragfyr 16eg. Anelu am Stadiwm Liberty oedden ni i gael cinio gyda thîm rygbi'r Gweilch. Roeddwn i wedi dathlu fy mhenblwydd yr wythnos gynt a ches i gerdyn gan Mam a Dad i ddweud fy mod i'n mynd i gael cinio Nadolig gyda'r Gweilch. Roeddwn i'n llawn cyffro.

Pan gyrhaeddon ni'r stadiwm, aethon ni i Siop y Gweilch yn gyntaf. Prynais i lyfr llofnodion a sticer am fy nghar. Yn y siop roedd un o hyfforddwyr y tîm, sef Jonathan Humphreys. Roedd e'n siarad â Dad. Ar ôl hynny, aethon ni drwy brif fynedfa'r stadiwm heibio'r ddesg ac roeddwn i'n gallu gweld Mike Phillips, sy'n chwarae fel mewnwr, yn y gornel a rhedais i draw ato.

Roedd y Gwyddel Tommy Bowe yno ac Ian Gough. Doeddwn i ddim yn gallu credu fy mod i yn yr un ystafell â rhai o chwaraewyr gorau'r byd.

Y person nesa welais i oedd Gavin Henson. Fe ydy fy hoff chwaraewr erioed. Arhosais i yn y ciw i'w weld e yn syth. Ces i ei lofnod e a gofynnais i petaswn i'n gallu cael ffoto gyda fe. Dwedodd e "Dim problem" a rhoi ei fraich amdana i am y ffoto. Doeddwn i ddim yn gallu ei gredu, roedd braich fy arwr ar fy ysgwydd ac roeddwn i'n siarad â fe! Dyna oedd uchafbwynt y dydd i mi!

Aeth pawb lan y grisiau wedyn i ystafell fawr. Roedd tua ugain bwrdd mawr a bar yno. Roedd gweddill tîm y Gweilch yno. Roeddwn i'n gallu gweld Jonathan Thomas o'm mlaen i ac es i draw ato. Dwedodd Dad ein bod ni'n dod o Sir Benfro fel fe. Ces i lofnodion a ffotos gyda phawb gan gynnwys James Hook a Chwaraewr Rygbi'r Byd 2008, Shane Williams.

Pan sefais ar bwys Shane, yr un taldra oedden ni. Roedd dau chwaraewr ar bob bwrdd gyda chi. Roedd Paul James, y prop, ac Ashley Beck, chwaraewr newydd gyda ni. Roedd y ddau'n neis iawn a doniol ac roedd y bwyd yn flasus iawn.

Ar ôl y pryd o fwyd, aeth rhai o'r chwaraewyr i ymweld â chleifion ysbyty. Roedd rhai ohonyn nhw wedi bod yno yn ystod y bore hefyd.

Ces i ddiwrnod bendigedig a baswn i'n argymell i unrhyw un am 2009. Bydda i'n mynd eto.