Mae Bryn Terfel ac arweinydd Only Men Aloud, Tim Rhys Evans wedi dod at ei gilydd i gefnogi lansio cyhoeddi maniwscript ar y we, cân arbennig dydd Gwyl Dewi, sydd wedi cael ei mabwysiadu fel cân swyddogol Gorymdaith Genedlaethol Gwyl Dewi (GGGD).

Dathlwyd cyhoeddi maniwscript y gân, 'Cenwch y Clychau i Dewi' ar y we trwy gyflwyno'r copïau cyntaf o'r gân i Bryn Terfel a Tim Rhys Evans, a bu'r gân ar gael i'w phrynu o wefan Y Lolfa - www.ylolfa.com ers y 5ed o Chwefror - y tro cyntaf erioed i gyhoeddiad Cymraeg gael ei werthu ar y we ar ffurf electronaidd.

Meddai Tim Rhys Evans: "Mae'n bleser ac anrhydedd mawr i ni gyd yn Only Men Aloud i fod y cyntaf i dderbyn y gân newydd gyffrous yma i ddathlu Nawdd Sant ein cenedl. Pob lwc i Gorymdaith Genedlaethol Gwyl Dewi am flynyddoedd maith o lwyddiant mewn cân ac ysbryd."

Derbyniodd Bryn Terfel y copi cyntaf, sef yr un i Biano a Llais o'r gân a Tim Rhys Evans y fersiwn cyntaf o'r gân i Gôr Meibion oddi wrth Gwenno Dafydd, wnaeth ysgrifennu geiriau'r gân yn Gymraeg a Saesneg. Heulwen Thomas wnaeth gyfansoddi'r gerddoriaeth wreiddiol i biano a llais ac fe wnaethpwyd y trefniannau Côr Meibion, Côr Merched a Chôr Cymysg gan Eilir Owen Griffiths.

Bydd pedair fersiwn y caneuon ar gael i'w prynu am £2 yr un (pris gostyngol wrth brynu 5 copi neu ragor) oddi ar wefan Y Lolfa - www.ylolfa.com.

Meddai Garmon Gruffudd o'r Lolfa: "Bu'n bosib prynu e-lyfrau Saesneg oddi ar y we ers peth amser, ond mae'n fraint gyda ni nawr i fod y wasg gyntaf i werthu e-lyfrau Cymraeg. Yn ogystal â gwerthu'r pedair fersiwn o 'Cenwch y Clychau i Dewi', mae'n fwriad gennym i werthu nifer o nofelau a gwerslyfrau ar ffurf e-lyfrau."