Ar fore dydd Sadwrn, 12 Gorffennaf, teithiodd llond bws o ddysgwyr a chefnogwyr Cynllun Bro Rhiannon ar eu taith flynyddol ac eleni'r gyrchfan oedd Amgueddfa Werin Cymru yn Sain Ffagan.

Gan fod tywydd eleni braidd yn siomedig, buom yn ffodus i gael diwrnod braf a chyfle i bawb fwynhau cyfleusterau arbennig y lle.

Prif atyniad y diwrnod oedd Eglwys Sant Teilo, sef un o adeiladau mwyaf newydd yr amgueddfa. Symudwyd yr eglwys o Landeilo Tal-y-bont ger Pontarddulais yn ystod y blynyddoedd diwethaf ac wedi eu hail-greu yn rhagorol iawn.

Bu sawl un yn prynu bara ffres gyda'r pobyddion, yn ymweld â'r castell a'r gerddi ysblennydd, y ffermdai, Capel Penrhiw, Swyddfa Bost Blaenwaun, siop y crydd o Sanclêr a'r rhes tai Rhyd y Car ac ati.

Erbyn diwedd y prynhawn, aeth llawer i brynu nwyddau yn y siop i gofio'r daith cyn mynd nôl ar y bws a chyrraedd Gwesty Llwyn Iorwg, Caerfyrddin am bryd o fwyd a chyfle i gymdeithasu ar ddiwedd diwrnod pleserus iawn.

Diolch arbennig i gwmni bysiau Jones Login am bob cymorth gyda'r trefniadau ac i Arian i Bawb am ariannu rhan o'r daith. Y cwestiwn mawr ar ddiwedd y daith oedd "I ble nesaf?".