“ကျွန်မကို ကိုယ်လုံးတီးချွတ်ခိုင်း၊ တစ်ကိုယ်လုံး ကိုင်ပြီး အဓမ္မကျင့်မယ်လို့ ခြိမ်းခြောက်တယ်” - လိင်ပြောင်းအမျိုးသမီးတစ်ဦး ရဲစခန်းမှာကြုံရသမျှ

“နင့် ကိုယ်လုံး အတော်လှတာပဲလို့ သူက ပြောတယ်။ ဘယ်လို လိင်ဆက်ဆံရတာ ကြိုက်လဲဆိုပြီးလည်း မေးတယ်။”

ဆိုဗီယက်ပြည်ထောင်စုထဲမှာပါခဲ့ဖူးတဲ့ အာရှအလယ်ပိုင်း၊ ဥဇဘက်ကစ္စတန်နိုင်ငံက အသက် ၂၅ နှစ်အရွယ် လိင်ပြောင်းအမျိုးသမီး ကမ်မီလာ နိုရိုဗာတစ်ယောက် ထိန်းသိမ်းခံထားရချိန် ကြုံခဲ့ရတဲ့ နှိပ်စက်ညှဉ်းပန်းမှုနဲ့ လိင်ပိုင်းဆိုင်ရာအစော်ကားခံရမှုအကြောင်းတွေကို ပြန်ပြောပြနေတာပါ။

ဒီလိုပြောနေချိန်မှာ သူ့မှာ စိတ် တည်တည်ငြိမ်ငြိမ်ထားပြီး ပြောနေရတာကိုလည်း အတိုင်းသားမြင်နေရပါတယ်။

သူ့အသက် ၁၇ နှစ်အရွယ်မှာ လိင်ပြောင်း ခွဲစိတ်မှုခံယူဖို့ ရုရှားနိုင်ငံကို သွားရောက်ခဲ့ပြီး ဥဇဘက်နိုင်ငံသားမှတ်ပုံတင်ကိုပဲ ဆက်ကိုင်ထားခဲ့သူပါ။

ဥဇဘက်ကစ္စတန်မှာ လိင်ပြောင်းဖို့ ဘယ်လောက်လွယ်ကူသလဲ

ဥဇဘက်ကစ္စတန်မှာတော့ ဒီလိုခွဲစိတ်မှုတွေအကြောင်း လူသိမများပါဘူး။

လူဦးရေဘယ်လောက်က လိင်ပြောင်း ခွဲစိတ်မှုခံယူထားလဲဆိုတဲ့ ကိန်းဂဏန်းအတိအကျတွေမရှိပေမဲ့ ဟော်မုန်း သီအိုရီကုထုံးကို ခံယူတာတွေ နိုင်ငံတွင်းမှာလုပ်ဆောင်ကြောင်း ပြောကြတာမျိုးရှိပါတယ်။ ခွဲစိတ်ပြီး လိင်ပြောင်းကြသူအချို့လည်းရှိပေမဲ့ အတော်လေးတွေ့ရခဲပါတယ်။

ဥဇဘက်က လိင်ပြောင်းလိုသူအများစုကတော့ ဒီလိုခွဲစိတ်မှုတွေလုပ်ချင်ရင် ရုရှား ဒါမှမဟုတ် အခြားနိုင်ငံတွေကို သွားရောက်လေ့ရှိပါတယ်။

ခွဲစိတ်မှုပြီးတဲ့နောက်မှာ နိုင်ငံကူးလက်မှတ်သက်တမ်းတိုးဖို့ပဲ ရည်ရွယ်ပြီး ဥဇဘက်ကစ္စတန်ရဲ့ မြို့တော် တက်ရှ်ကင့်ကို သူပြန်လာခဲ့ပါတယ်။ အဲဒီမှာ လုပ်ကြံစွပ်စွဲခံရပြီး ၂၅ ရက်ကြာ အကျဉ်းချခံရကာ လိင်ပိုင်းဆိုင်ရာနှောင့်ယှက်မှုတွေ၊ ရိုက်နှက်မှုတွေ၊ သတ်ပစ်မယ်ဆိုတဲ့ခြိမ်းခြောက်မှုအပြင် ဆေးစစ်ဖို့ဆိုပြီး အလိုမတူဘဲ ကိုယ်ခန္ဓာကို နှိုက်နှိုက်ချွတ်ချွတ်စစ်ဆေးမှုတွေ ရင်ဆိုင်ခဲ့ရပါတယ်။

ဥဇဘက်မှာ လိင်ပြောင်းသူတွေရဲ့အခွင့်အရေးနဲ့ပတ်သက်လို့ ဘယ်ဥပဒေမှာမှ ထည့်သွင်းပြဋ္ဌာန်းထားတာမရှိပါဘူး။

ဒါပေမဲ့ လိင်ပြောင်းတာကို နိုင်ငံခြားမှာလုပ်လာခဲ့ရင်တောင် နိုင်ငံကူးလက်မှတ် ဒါမှမဟုတ် နိုင်ငံသားကတ်ထုတ်ပေးချိန်မှာ သူတို့ပြောင်းလဲလိုက်တဲ့ လိင်ကိုအတည်ယူပေးပါတယ်။

ဘီဘီစီနဲ့ ကမ်မီလာတို့ အွန်လိုင်းကနေ စကားပြောချိန်မှာ အချုပ်အနှောင်မခံရခင်က ရရှိခဲ့တဲ့ အမျိုးသမီးအဖြစ် အသိအမှတ်ပြုထားတဲ့ နိုင်ငံသားကတ်ကို သူက ထုတ်ပြပါတယ်။

“နိုင်ငံသားကတ် ရရချင်းမှာပဲ ခရီးသွားနိုင်မယ့် နိုင်ငံကူးလက်မှတ်လုပ်ဖို့ လျှောက်ထားခဲ့တာပါ” လို့ သူကပြောပါတယ်။

“ကျွန်မ အင်တာဗျူးဖြေရမယ်လို့ နိုင်ငံကူးလက်မှတ်ထုတ်ပေးရေး (ပတ်စ်ပို့) ရုံး လူကြီးက ပြောတယ်။ နိုင်ငံခြားမှာနေခဲ့ဖူးတဲ့သူတိုင်းကို လုပ်ရတဲ့ လုပ်ထုံးလုပ်နည်းလို့လည်းပြောတယ်။”

သူလည်း သဘောတူလိုက်ပြီး အင်တာဗျူးအတွက် တက်ရှ်ကင့်မြို့မှာရှိတဲ့ ခရိုင်အဆင့် နိုင်ငံကူးလက်မှတ် (ပတ်စ်ပို့) ထုတ်ပေးရေးရုံးက “အခန်းနံပါတ် ၃” ထဲကို ဝင်ဖို့ အခေါ်ခံရပါတယ်။ အဲဒီမှာ သူ့အပြောအရ အသက် ၂၀ ဝန်းကျင်လို့ယူဆရတဲ့ “ဘိုဘာ” လို့ ခေါ်တဲ့ ခပ်ငယ်ငယ်ရဲတစ်ဦးနဲ့ ဆုံပါတယ်။

အရင်ဆုံး သူ့ရဲ့ လက်ကိုင်ဖုန်းကို ဘိုဘာက စတင်စစ်ဆေးပါတယ်။ အဲဒီဖုန်းထဲမှာ လိင်ပြောင်းခွဲစိတ်မှုအပြီးရိုက်ကူးထားတဲ့ ခန္ဓာကိုယ်ဖော်ပြထားတဲ့ ဓာတ်ပုံတွေရှိနေခဲ့တယ်လို့ ကမ်မီလာ က ပြန်ပြောင်းပြောပြပါတယ်။

‘ရင်ဘတ်လှန်ပြနိုင်မလားလို့ သူမေးတယ်’

“နင့်မှာ ကိုယ်လုံးလှလှ၊ ရင်သားလှလှလေးတွေရှိတာပဲလို့ သူက ပြောတယ်။ ပြီးတော့ နင် ဘယ်လိုလိင်ဆက်ဆံရတာ ကြိုက်လဲတဲ့။ အမျိုးသားနှစ်ယောက်နဲ့အတူ သုံးယောက်တွဲ လိင်ဆက်ဆံရတာကို ကြိုက်လားလို့ မေးတယ်။”

အဲဒီလို လိင်မှုရေးရာတွေကို မှတ်ချက်ပြုပြောဆိုနေတာတွေကို ကမ်မီလာတစ်ယောက် စိတ်ဆိုးဒေါသ ထွက်နေတာကို သိပေမဲ့ “သူ့ရဲ့ရင်သားတွေကို ထိတွေ့ကိုင်တွယ်ဖို့ ရင်ဘတ်ကို လှန်ပြပေး” ဆိုပြီး ဘိုဘာက ဆက်တောင်းဆိုခဲ့တယ်လို့ သူက ပြောပါတယ်။

လက်ပါဖို့ ကြိုးစားလာတဲ့ ဘိုဘာလက်တွေကို ကမ်မီလာ ရိုက်ချလိုက်တယ်။ ဒါပေမဲ့ ရိုက်ချက်တွေကို ဘိုဘာ ရှောင်တိမ်းနိုင်ခဲ့ပါတယ်။

“ပြီးတော့ သူ့မှတ်စုစာအုပ်ကနေ စာရွက်တစ်ရွက်ကို ဆုတ်ဖြဲပြီး အဲဒီပေါ်မှာ သူ့ဖုန်းနံပါတ် ချရေးတယ်။ ကျွန်မ ဖုန်းထဲမှာလည်း သူ့နံပါတ်ကို သူကိုယ်တိုင် ရိုက်ထည့်ပြီး နံပါတ်ကို သိမ်းတာမျိုးလုပ်တယ်။ ကျွန်မ ဘယ်မှာနေလဲ မေးတယ်။ အနီးနားမှာ ဟိုတယ်ရှိလားလားဆိုပြီးတော့လည်း မေးတယ်။ ‘ငါတို့ ဟိုတယ်မှာဆုံကြမလား’လို့လည်း သူက ပြောတယ်။ သူပြောတာတွေ ကျွန်မ မသိချင်ယောင်ဆောင်ခဲ့တယ်။ ကျွန်မ နိုင်ငံကူးလက်မှတ် ဘယ်တော့အသင့်ဖြစ်မှာလဲလို့ပဲ မေးခဲ့တယ်။ ‘ဒါဆိုရင် ကျွန်တော်တို့ ဟိုတယ်တစ်လုံးမှာ ဆုံကြမယ်။ အဲဒီအခါကျရင် ပတ်စ်ပို့က အသင့်ဖြစ်နေပြီ' လို့ သူက ပြောပါတယ်။ အဲဒီအချိန်မှာ ကျွန်မ စပြီး ငိုနေပြီ။ (ဒီတော့မှ)အခန်းကနေ ထွက်ခွင့်ပြုခဲ့တယ်။”

ဘိုဘာဟာ အကြမ်းဖက်မှု တိုက်ဖျက်ရေးရဲတပ်ဖွဲ့က ဆိုတာကို နောက်ပိုင်းမှာ ပတ်စ်ပို့ရုံးအကြီးအကဲက ပြောပြလို့ သူ သိခဲ့ရပါတယ်။

ဘီဘီစီ ဥဇဘက်ဘာသာစကားဌာနက ကမ်မီလာကို “ဘိုဘာ” ပေးထားတဲ့ ဖုန်းနံပါတ်ကို အွန်လိုင်းကနေ စာပို့ ဖုန်းခေါ် ဆိုနိုင်တဲ့ အက်ပလီကေးရှင်းကနေတဆင့် ဆက်သွယ်ပြီး ကမ်မီလာရဲ့ စွပ်စွဲချက်တွေနဲ့ ပတ်သက်လို့ မေးမြန်းခဲ့ပါတယ်။ စာတွေကို ဘိုဘာ ကြည့်ခဲ့တာကို မြင်ခဲ့ရပေမဲ့ တုံ့ပြန်စာ ပြန်ပို့တာမျိုးတော့ မရှိခဲ့ပါဘူး။

အခုလို ဆက်ဆံခံခဲ့ရတဲ့အခြေအနေကို ကမ်မီလာတစ်ယောက် ဥပဒေအကြံဉာဏ်ယူပြီး တရားဝင်တိုင်ကြားချက်တစ်ခုကို လုပ်ခဲ့ပါတယ်။ အဲဒီနောက် နောက်ထပ်အစိုးရ ရုံးတစ်ခုမှာ အင်တာဗျူးထပ်လုပ်ဖို့ သူ အခေါ်ခံရပါတယ်။

အဲဒီရုံးမှာ အမျိုးသားရဲအရာရှိနှစ်ဦးနဲ့ဆုံခဲ့ရပြီး သူ့ဖုန်းကိုတော့ ဧည့်ကြိုခန်းမှာရှိတဲ့ သော့ခတ်ထားတဲ့ ပုံးထဲမှာ ချန်ထားခိုင်းကာ အပေါ်ထပ်စစ်ကြောရေးခန်းထဲ အခေါ် ခံရပါတယ်။ ကမ်မီလာ့ကို အဖော်ပြုဖို့ လိုက်လာတဲ့သူ့မိသားစုနဲ့ သူငယ်ချင်းတွေ လိုက်ပါခွင့် မရခဲ့ပါဘူး။

“အစပိုင်းမှာ ချိုချိုသာသာ စကားပြောနေပေမဲ့ မိနစ်နည်းနည်းကြာတော့ စကားလုံးကြမ်းကြမ်းတွေကို သူတို့ စပြောလာတယ်”လို့ ကမ်မီလာက ပြန်ပြောင်းပြောပြပါတယ်။

‘နင်တို့အကုန်လုံးက ပြည့်တန်ဆာတွေပဲ’

“ '(လိင်ပြောင်းအမျိုးသမီးတွေ) အကုန်လုံးက အတူတူပဲ၊ နင်တို့အကုန်လုံး ပြည့်တန်ဆာတွေ' လို့ သူတို့က ပြောတယ်။ လွှတ်တော်အမတ်တွေလိုမျိုး ရာထူးကြီးကြီးလူတွေနဲ့ နောက်ကြောင်းမကင်းဘူးလို့ လည်း ကျွန်မကို စွပ်စွဲတယ်။ နည်းနည်းကြာတော့ ကျွန်မ ရေတောင်းသောက်မိတယ်။ ‘ရေသန့်ဘူးထဲကို ငါအပေါ့ သွားပေးမယ်၊ နင် အဲဒီကျင်ငယ်ရည်ကို သောက်ပေါ့’ လို့ ရဲတစ်ယောက်ကပြောတယ်။ ‘ဘိုဘာနဲ့ပတ်သက်ပြီး ဘာလို့ တိုင်ရတာလဲ’ လို့ နောက်ရဲတစ်ယောက်က ထပ်မေးတယ်။ ‘အဲဒီအတွက် နင် အခု ပြန်ပေးဆပ်ရမယ်’ တဲ့။”

ခြိမ်းခြောက်မှုတွေနဲ့ စော်ကားမှုတွေဟာ ရုပ်ပိုင်းဆိုင်ရာအကြမ်းဖက်မှုတွေဆီ ဦးတည်လာခဲ့တယ်လို့ ကမ်မီလာက ပြောပါတယ်။ ရဲထဲက တစ်ယောက်က ကမ်မီလာရဲ့ လည်ပင်းကိုညစ်ပြီး သူ့ကို နံရံမှာ ဖိကပ်ထားခဲ့တယ်။ သူ့ရဲ့ ခါးပိုက်ဆောင်ထဲက သေနတ်ကိုပါ ထုတ်လိုက်ပြီး “နင် သေပြီမှတ်တော့” လို့ပြောခဲ့တဲ့အကြောင်း ကမ်မီလာက ငိုရှိုက်ရင်း ကြုံတွေ့ခဲ့ရတာတွေကို ပြန်ပြောင်းပြောပြပါတယ်။

“ပြီးတော့ တံခါးပွင့်လာပြီး နောက် အမျိုးသားရဲတစ်ဦးနဲ့ အမျိုးသမီးရဲတစ်ဦးဝင်လာခဲ့တယ်။ ကျွန်မကို ကိုယ်ထိလက်ရောက်ကျူးလွန်နေတဲ့သူက ကျွန်မ ပါးကို စရိုက်တယ်။ ပြီးတော့ ကျွန်မကို တွန်းထုတ်လိုက်တယ်။ အဲဒီအချိန်မှာ ကျွန်မက ဒေါက်မြင့်ဖိနပ်စီးထားတော့ ဟန်ချက်ပျက်ပြီး ကြမ်းပြင်ပေါ် ပြိုလဲ ကျသွားတယ်။ အခန်းထဲက တခြားလူတွေက ဒါကိုကြည့်ပြီး ရယ်ကြတယ်

“ကျွန်မ ပြန်ထဖို့ကြိုးစားတဲ့အချိန် သူက ထပ်ပြီးရိုက်တယ်။ အနားမှာရှိတဲ့ အမျိုးသမီးအရာရှိကို အကူအညီပေးဖို့ ကျွန်မ တောင်းဆိုခဲ့တယ်။ 'ရှင် မိန်းကလေး မဟုတ်ဘူးလား။ မိန်းမတစ်ယောက်ကို ရိုက်နှက်ခံနေရတာမမြင်ဘူးလား’ လို့ ကျွန်မ လှမ်းပြောတဲ့အချိန်မှာ သူက ‘နင်က မိန်းမ မှမဟုတ်တာ၊ နင်တို့လိုလူတွေကို သတ်သင့်တာ’ လို့ သူက ပြန်ပြီး တုံ့ပြန်တယ်။”

ရှေ့နေတစ်ယောက်ခေါ်ဖို့ တောင်းဆိုချိန်မှာလည်း ထပ်အငြင်းခံရပါတယ်။ အဲဒီအစား ရဲအရာရှိ အများကြီးထပ်ရောက်လာပြီး သူ့ အပေါ် ကျူးလွန်မှုတွေ ဆက်လုပ်ကြပါတယ်။

ဥဇဘက် ဘာသာစကားနဲ့ရေးသားထားတဲ့ စာရွက်တစ်ရွက်မှာ လက်မှတ်ရေးထိုးဖို့ ဖိအားပေးခံရပြန်ပါတယ်။ ကမ်မီလာက ဥဇဘက်ဘာသာစကားကို ကျွမ်းကျွမ်းကျင်ကျင်နားမလည် နေတာကြောင့် စာရွက်မှာ ဘာအကြောင်းအရာတွေပါလဲဆိုတာ သေသေချာချာမသိခဲ့ပါဘူး။

အပေါ်ထပ်မှာရှိတဲ့ တရားခွင်ထဲကိုရောက်တဲ့အချိန် သူကြားလိုက်ရတဲ့ စွပ်စွဲချက်တွေကြောင့် ထိတ်လန့်တုန်လှုပ်ခဲ့ရတယ်လို့ ဘီဘီစီကို ပြန်ပြောပြပါတယ်။

တရားသူကြီးပြောခဲ့တာက ကမ်မီလာဟာ သံသယဖြစ်ဖွယ်ကောင်းတဲ့အပြုအမူတွေလုပ်နေလို့ လမ်းပေါ်ကနေ ခေါ်လာရတာဖြစ်ပြီး သူ့ကိုစစ်ဆေးဖို့ရဲအရာရှိတွေက မှတ်ပုံတင်ပြခိုင်းတာကိုလည်း မလိုက်နာခဲ့ဘူးဆိုတဲ့အချက်ပါ။

စွပ်စွဲချက်တွေကို ကမ်မီလာက ငြင်းဆန်ခဲ့ပေမဲ့ ၁၅ ရက် ထောင်ကျဖို့ အမိန့်ချမှတ်ခဲ့ပါတယ်။

‘တိုင်ကြားခွင့်ရှိတယ်’

ရက်စက်၊ နာကျင်၊ အရှက်ရဖွယ်ရာ ဆေးစစ်ချက်တွေကို ဖြေဆိုရတဲ့ သူ့ရဲ့ အဖြစ်ဆိုး ဇာတ်လမ်းက အကျဉ်းထောင်ထဲအထိ မပြီးဆုံးခဲ့ဘူးလို့ ကမ်မီလာက ပြောပါတယ်။

အကျဉ်းကျခံရတဲ့ ၁၅ ရက်ပြီးစီးခဲ့ပေမဲ့ ကမ်မီလာဟာ သူ့ရဲ့စာရွက်စာတမ်းတွေရရှိဖို့အတွက် အရာရှိတစ်ဦးကို လာဘ်ပေးခဲ့တယ်ဆိုတဲ့ စွပ်စွဲချက်နဲ့ နောက်ထပ် ၈ ရက်ကျခံဖို့ အမိန့်ထပ်ချခံရပါတယ်။ ဒီစွပ်စွဲချက်ကို သူက ငြင်းဆိုပါတယ်။

ကမ်မီလာအပေါ်စွပ်စွဲချက်တွေအကြောင်း အသေးစိတ်ရေးသားချက်နဲ့အတူ ပါဝင်ခဲ့တဲ့ အရာရှိတွေကို စုံစမ်းဖော်ထုတ်ဖို့ရှိသလားလို့ ဘီဘီစီ ဥဇဘက်ဘာသာစကားဌာနက ဥဇဘက်ကစ္စတန် ပြည်ထဲရေးဝန်ကြီးဌာနကို ဆက်သွယ်မေးမြန်းခဲ့ပါတယ်။

“တရားဥပဒေစိုးမိုးရေးဆောင်ရွက်တဲ့အဖွဲ့အစည်းတွေရဲ့ လုပ်ဆောင်ချက်နဲ့ပတ်သက်လို့ ကျေနပ်မှု မရှိတဲ့ နိုင်ငံသားတစ်ဦးဟာ အဲဒါနဲ့ပတ်သက်လို့ လုပ်ထုံးလုပ်နည်းနဲ့အညီ တိုင်ကြားပိုင်ခွင့်ရှိပါတယ်” လို့ ဝန်ကြီးဌာနရဲ့ သတင်းပြန်ကြားရေးတာဝန်ခံက တုံ့ပြန်ပြောပါတယ်။

လိင်ပြောင်းအသိုင်းအဝိုင်းအပေါ် ဘယ်လိုမြင်ကြလဲ

ဥဇဘက်ကစ္စတန်မှာ လိင်ပြောင်းအမျိုးသမီးတွေနဲ့ လိင်စိတ်ခံယူမှုကွဲပြားသူ (LGBT) တွေအပေါ် လူထုအမြင်ဟာ ပုံမှန်အားဖြင့် အပြုသဘောမဆောင်ပါဘူး။ လိင်ပြောင်းထားသူတွေကို အရှက်ရအောင် ရိုက်နှက်နေတဲ့ သရုပ်ဆောင်ချက်တွေပါဝင်တဲ့ ဗီဒီယိုဖိုင်တွေကိုလည်း လူမှုကွန်ရက်စာမျက်နှာပေါ်မှာ တွေ့နိုင်ပါတယ်။

သမ္မတ ရှက်ဖ်ကဒ် မတ်ဇီယိုယက်ဖ် က ဘာသာရေးအလေ့အကျင့်တွေအကြောင်း လွတ်လွတ်လပ်လပ်ပြောဆိုခွင့်ရှိတယ်လို့ မိတ်ဆက်ခဲ့ပြီးတဲ့နောက် အစ္စလာမ်မစ်စိတ်ဓာတ်တွေ နိုင်ငံတွင်း နိုးကြားလာခဲ့ပါတယ်။ အင်တာနက်ပေါ်မှာ ဘာသာရေးဆိုင်ရာ တင်ဆက်ပြောကြားသူတွေ ဒါမှမဟုတ် အစ္စလာမ်ဓမ္မဆရာတွေက LBGT တွေကို ပြောင်ပြောင်တင်းတင်း ရှုတ်ချလာပါတော့တယ်။

ခြိမ်းခြောက်နေတယ်လို့ ခံစားရတာကြောင့် LBGT တွေ နဲ့ လိင်ပြောင်းသူတွေဟာ ဥဇဘက်ကစ္စတန်ကိုစွန့်ခွာဖို့ ဖြစ်လာစေပါတယ်။

ကမ်မီလာဟာ အသက် ၁၇ နှစ်အရွယ်တုန်းက နိုင်ငံကထွက်ပြီး မော်စကိုမှာရှိတဲ့ သူ့အမဆီကို သွားခဲ့ပါတယ်။ အဲဒီမှာ ဝှေးစေ့အပါအဝင် အမျိုးသားအင်္ဂါတစ်ခုလုံးကို ပြောင်းလဲတဲ့ သူ့ရဲ့ လိင်ပြောင်းလုပ်ငန်းစဉ် ခွဲစိတ်မှုတွေလုပ်ခဲ့ပါတယ်။

တရားစွဲဆိုထားတာတွေ ရုပ်သိမ်းခြင်း

ရုရှားမှာ သီချင်းရေးတာရော အဆိုတော်အဖြစ်ပါ လျှောက်လှမ်းနေတဲ့ ကမ်မီလာရဲ့ အင်စတာဂရမ် အကောင့်မှာ ဖော်လိုဝါ ၂ သိန်းကျော်ရှိပါတယ်။ အဲဒီမှာ သီချင်းဗီဒီယိုတွေနဲ့ ဓာတ်ပုံတွေကို သူတင်ပါတယ်။

နောက်ပိုင်းမှာတော့ သူရဲ့ ပြောင်းလဲထားတဲ့ လိင်အတိုင်း အမျိုးသမီးတစ်ဦးအဖြစ် အသိအမှတ်ပြုပြီး ဥဇဘက်အရာရှိတွေက နိုင်ငံကူးလက်မှတ်အသစ်ကို ထုတ်ပေးခဲ့ပါတယ်။

သူ့အပေါ် စွဲဆိုထားတဲ့ စွဲချက်တွေ အကုန်လုံးကိုလည်း ရုပ်သိမ်းလိုက်ပြီလို့ သူ့ကို ပြောခဲ့တဲ့အကြောင်း သူက ပြန်ပြောပြပါတယ်။

ဒီလိုအခက်အခဲတွေကို ကျော်ဖြတ်ပြီးနောက်မှာ စိတ်ရှိတဲ့အတိုင်းနေထိုင်ဖို့ ထိုက်တန်တယ်လို့ သူက ယုံကြည်နေပါတယ်။

“အခုတော့ မိသားစုဘဝလေးတည်ဆောက်ချင်ပါတယ်။ ဥပဒေကခွင့်ပြုမယ်ဆိုရင် သမီးလေး တစ်ယောက် မွေးစားချင်တယ်” လို့ ကမ်မီလာက ပြောပါတယ်။