Archifau Mai 2010

Petai cefnogwyr Caerdydd wedi troi at esgob Croydon, y Gwir Barchedig Nick Baines, cyn y penwythnos diwethaf, efallai y byddai canlyniad y gêm honno yn Wembley wedi bod yn wahanol iawn.

Yr wythnos yma, mae'r Gwir Barchedig, ynghyd ag Eglwys Lloegr, wedi cyhoeddi tair gweddi fer ar gyfer Cwpan y Byd.

Wel i fod yn gywir, dwy weddi ar gyfer Cwpan y Byd ac un weddi yn gofyn i'r rheini nad oes ganddynt unrhyw ddiddordeb mewn pêl-droed i ddangos goddefgarwch am y mis nesaf tuag at y cefnogwyr:- 'Ein Tad, tra bo twymyn Cwpan y Byd yn cael gafael ar bawb o'n cwmpas, bendithia ni â dealltwriaeth, cryfha ni gydag amynedd a dyro i ni yr anrheg o amynedd os fydd ei angen arnom. Amen'

Mae'r ddwy arall yn gofyn am arweiniad a gofal dros bawb sydd yn cymryd rhan, mewn unrhyw ffordd, yng Nghwpan y Byd, ac am sicrhad y bydd llawenydd yn amlygu ei hun yn Ne Affrica dros y mis neu ddau nesaf.

Tybed faint o ddilynwyr yr Adar Gleision sydd wedi gweld eu hamynedd nhw yn cael ei brofi i'r eithaf yr wythnos yma, neu yn meddwl ble oedd unrhyw arweiniad ar y cae wrth faglu yn erbyn Blackpool?

Ond, yn hytrach na chwyno, beth am fynd gam ymhellach yma yng Nghymru, a chynnig gweddïau, neu hyd yn oed ein hemynau ein hunain, a hyn mewn gwlad a welodd Cwm Rhondda yn cynnig mwy o ysbrydoliaeth i lawer na thalpiau o lo o'r pyllau fel y bu ar un adeg.

Beth am roi cynnig tuag at greu gweddi neu ddwy, neu emyn o fawl, yn gofyn am gymorth ac arweiniad i'n timau pêl-droed?

Rhowch gynnig arni a gadewch i ni wybod os ydych wedi derbyn ysbrydoliaeth o rywle.

Yn y cyfamser, hoffwn gynnig yr emyn byr yma i gefnogwyr Caerdydd yn sgil y digwyddiad diweddaraf yn hanes eu clwb:-

'Wele, cawsom y Malaysian
Cyfaill gwerthfawroca' 'rioed;
Darfu i Ridsdale a'r proffwydi
Ddweud amdano cyn ei ddod'

Hwyl gyda'r cyfansoddi, a gwyliwch y gweddïau!

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Yn naturiol roedd yna siom aruthrol ymhlith cefnogwyr Caerdydd wedi'r chwiban olaf yn Wembley ddydd Sadwrn. Fe ddaeth Caerdydd o fewn trwch blewyn i gyrraedd y Uwchgyngrhair Lloegr a'r cyfle i chwarae yn erbyn timau fel Manchester United, Arsenal, Chelsea a thrwy hynny gweld eu problemau ariannol yn diflannu - yn y tymor byr o leiaf.

Ond y gwir plaen amdani, ar y dydd doedd Caerdydd ddim digon da. Roedd yr hanner cyntaf o ran cyffro yn wefreiddiol, y 45 munud mwyaf cyffrous i mi ei weld ers tro byd. Ond gyda 'r goliau sgoriodd Blackpool amlygwyd gwendidau Caerdydd. Pan weles i Blackpool yn curo Abertawe 5-0 'nol ym mis Mawrth roedd gen i deimlad ar y pryd y byddai tîm Ian Holloway yn cyrraedd y gemau ail gyfle - ond doeddwn ni ddim yn rhagweld y bydden nhw'n llwyddo i ennill dyrchafiad.

Beth fyddai llwyddiant wedi ei olygu? Wel roedd 40,000 o gefnogwyr Caerdydd yn Wembley Ddydd Sadwrn. Yn y dyddiau cyn y gêm fe drodd y ddinas yn fôr o glas a gwyn. Roedd miloedd ar filoedd yn gwylio'r gêm fawr ar sgriniau teledu mewn digwyddiadau ar hyd a lled Caerdydd. Mewn cystadleuaeth rygbi saith bob ochr ar gyrion Caerdydd roedd bron pawb yno, boed yn gefnogwyr o'r gêm yn gwisgo crysau Caerdydd ac yn ymwybodol o'r hyn oedd yn y fantol.

Beth bynnag mae llawer am i chi gredu ynglŷn â rygbi fel gem y Cymry doedd na fawr o ymwybyddiaeth fod tîm rygbi'r Gleision yn chwarae yn rownd derfynol y Cwpan Amlin yn Marseilles Ddydd Sul.

Beth fydd yn digwydd nesaf? Mae yna berchnogion newydd, mae yna alw i Dave Jones aros fel rheolwr ac i chwaraewyr fel Michael Chopra, Joe Ledley, Peter Whittingham a Jay Bothroyd i aros hefyd. Ond mae yna ochr arall i'r geiniog. Methu oedd hanes Caerdydd. Fe gollon nhw yn erbyn tîm gostiodd llai na £1m. Fe gollon nhw yn erbyn tîm o dan reolwr brofodd yn drech na Dave Jones o ran tactegau. Mae Jones wedi bod wrth y llyw am bum mlynedd - Holloway am dymor yn unig yn Bloomfield Road. Os edrychwch chi ar brofiad dimau fel Bristol City a Sheffield United sydd fel Caerdydd wedi colli yn rownd derfynol gemau ail gyfle'r Bencampwriaeth, siomedig ar y naw oedd y tymor canlynol ar ôl iddyn nhw gadw ffydd gyda'u chwaraewyr a'r rheolwr.

Wrth wylio Cymru yng Nghroatia nos Sul roedd yna deimlad eilradd ynglŷn ar holl beth. Efallai fy mod i yn anghywir ond fel yna roeddwn ni yn teimlo. Roedd yn siom aruthrol i John Toshack i weld cyn lleied o chwaraewyr yn barod i fod yn rhan o'r gêm baratoi ar gyfer ymweld â Montenegro yn y tymor newydd. Wedi pum mlynedd wrth y llyw does dim digon o ysbryd wedi ei fagu yn y garfan i sicrhau bod yn chwaraewyr yn edrych ymlaen at ddod at ei gilydd er mwyn cynrychioli eu gwlad. O leiaf fe gafodd Neil Taylor a Mark Bradley y fraint o wisgo'r crys. Ond mae Taylor wedi bod yn chwarae i dîm orffennodd hanner ffordd yn y Gyngres ac mi gafodd Bradley ei ryddhau gan Walsall ar ddiwedd y tymor. Pa fath o baratoad yw hynny?

Un gêm sydd gan Toshack cyn rowndiau rhagbrofol Pencampwriaethau Ewrop a'r gêm honno gartref yn erbyn Lwcsembwrg. Go brin y bydd honno yn cydio yn nychymyg y cefnogwyr. Gan roi'r canlyniad yn Wembley o'r neilltu - oedd - mi roedd hi'n benwythnos ffantastig i Gaerdydd o ran diddordeb, o ran cyffro ac o ran y gefnogaeth. Trueni mawr nad yw'r un peth yn wit pan mae'r tîm cenedlaethol yn chwarae.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Mae yna gryn dipyn o brysurdeb wedi bod yr wythnos yma gyda'r paratoadau ar gyfer gêm Caerdydd yn erbyn Blackpool yn Wembley.

Mae o'n deimlad od ymwneud cymaint â'r achlysur yma oherwydd fel arfer paratoi buaswn i ar gyfer mynd i Groatia gyda Chymru ar gyfer y gêm gyfeillgar. Ar hyn o bryd, mae fel pe bai Caerdydd yn llenwi'r bwlch wedi ei adael gan y tîm cenedlaethol o ran llwyddiant a sylw.

Yn y gorffennol, mi roedd Sam Hamman, y cyn-berchennog, yn chwarae ar y ffaith fod Caerdydd yn glwb o Gymru yn chwarae yng nghynghrair Lloegr. Chwarae hynny i lawr oeddwn i'n teimlo gwnaeth Peter Ridsdale, olynydd Hammam, a'r rheolwr Dave Jones ar y cychwyn.

Ond does dim dwywaith iddyn nhw chwarae ar hynny hefyd erbyn y gemau ail-gyfle yn erbyn Caerlŷr, yn sicr yn yr ail gymal yn Stadiwm Dinas Caerdydd a'r rheolwr yn datgan fod Caerdydd yn gobeithio llwyddo ar ran Cymru gyfan.

Tra bod yr edrych ymlaen yn fawr ar gyfer y gêm yn Wembley ddydd Sadwrn, mae'n anodd dweud yr un peth am y gêm yng Nghroatia ddydd Sul.

Dwi'n amau doethineb chwarae'r gemau cyfeillgar yma ar ddiwedd y tymor, yn yr achos yma rhyw dair wythnos wedi i'r rhan fwyaf gicio pêl.

Efallai ichi gofion pan roedd Cymru ar eu gorau yn ystod teyrnasiad Mark Hughes, ar frig y grŵp yn rowndiau rhagbrofol Ewro 2004, iddyn nhw deithio i'r Unol Daleithiau i chwarae gêm yn San Fransisco. Fe dynnodd 18 chwaraewr nôl o'r garfan. Digon tebyg mae hi y tro yma hefyd.

Un peth sydd yn anodd ei ddeall yw pam fod cymaint o chwaraewyr ddim ar gael oherwydd anafiadau pan nad ydyn nhw wedi chwarae am dair wythnos a mwy. Dyna pam mae'n bwysig, beth bynnag ydi'r berthynas rhwng y rheolwr John Toshack a Craig Bellamy, fod y problemau yn cael eu goresgyn.

Unwaith eto, tra bod chwaraewyr sydd yn dal i brofi eu hunain ar lefel rhyngwladol yn datgan nad ydyn nhw ar gael, mae blaenwr Manchester City yn barod i fod ar flaen y gad yng Nghroatia. Dyna'r un math o agwedd dangoswyd gan is-reolwr Cymru, Dean Saunders. Doedd dim ots ble, pryd nac yn erbyn pwy roedd Cymru yn chwarae, roedd Dean yno. Yn teithio i'w wylio ymhob man hefyd roedd ei fam a'i dad.

Ac eto yng nghanol y bwrlwm yma roedd yna stori fawr arall imi yn hawlio sylw, sef y ffaith na fydd y Rhyl yn chwarae yn Uwch Gynghrair Cymru y tymor nesaf.
Mae'n hysbys fod Rhyl wedi wynebu problemau ariannol ac mae'n siŵr fod hynny yn ffaith yn y penderfyniad. Ond - ac mae o'n "ond" mawr - mae gan y cynghrair cenedlaethol broblem fawr wrth geisio denu diddordeb a chefnogaeth.

Imi mae Rhyl yn glwb pêl-droed go iawn. Hynny yw, o ran adnoddau, maes pêl-droed go iawn a chefnogaeth gadarn.

Yn y flwyddyn olaf pan roedd gan BBC Cymru yr hawliau i ddangos y gynghrair ar y teledu, mi rydw i'n cofio'r gêm yn erbyn TNS i benderfynu'r bencampwriaeth yn Belle Vue. Roedd yna 2,500 o gefnogwyr yn y gêm a miloedd yn gwylio ar y teledu. Pan sicrhawyd y bencampwriaeth ar Y Traeth yn erbyn Porthmadog, roedd cannoedd o gefnogwyr y Rhyl yno yn ei du a gwyn yn gwneud achlysur go iawn o'r prynhawn.

Ar y teledu, er mwyn cyrraedd cynulleidfa ehangach, mae angen gwneud i'r gêm edrych fel achlysur, fod cefnogaeth a diddordeb. Mi fyddai Rhyl yn erbyn Bangor, y gêm ar Ffordd Farrar a'r gemau yn erbyn Prestatyn yn wych i deledu.

Beth bynnag ydi'r rhesymau, mae o'n drueni mawr nad yw'r Rhyl yn y gynghrair newydd yma, na chwaith fod yna gynrychiolaeth o ardal Caerdydd a Gwent.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Un gêm ar ôl. Un cam yn nes at Uwch Gynghrair yr addewid a thrip arall i Wembley yr wythnos nesaf.

Os oedd y gemau yn erbyn Caerlŷr yn gyffrous, tybed a yw hyn yn arwydd o'r cyffro a fydd yn Wembley, gan ystyried hefyd y cyffro a fu yn y gemau rhwng Nottingham Forest a Blackpool.

Sgorio ydi cryfder yr Adar Gleision, ond sgorio hefyd ydi cryfder Blackpool yn ddiweddar, gyda chwe gôl yn cael eu sgorio yn y ddau gymal.

Petai Caerdydd yn llwyddo i gyrraedd yr Uwch Gynghrair , rhaid hefyd gofyn a yw'r tîm presennol yn ddigon da i aros yno. Peidiwch ag anghofio Derby County rhyw ddau neu dri thymor yn ôl, a'u hanallu llwyr i ddygymod â safon uwch.

Ymysg trafferthion ariannol Caerdydd, bydd sicrhau mwy o chwaraewyr i gystadlu yn yr Uwch Gynghrair yn rhywbeth y bydd yn rhaid ei ystyried.

Sut fuasech chi yn mynd ati i wella a chryfhau'r tîm - boed hynny er mwyn ymdrechu eto yn y Bencampwriaeth y tymor nesaf, neu fel yr ydym yn ei obeithio, i wynebu treialon yr Uwch Gynghrair ar feysydd gwyrdd cyfoethog yr Uwch Gynghrair?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Wel dyna beth oedd noson yn Stadiwm Dinas Caerdydd.

Roedd yna ddrama anhygoel nos Fawrth pan enillodd Blackpool yn Nottingham Forest. Ond roedd yr hyn ddigwyddodd rhwng Caerdydd a Chaerlŷr yn hyd yn oed yn fwy dramatig.

Pan sgoriodd y Cymro Andy King i Gaerlŷr i'w gwneud hi yn dair i un roeddwn ni'n teimlo fod tîm Nigel Pearson ar eu ffordd i Wembley.

Roedd y cyffro'n wefreiddiol yn ystod y ciciau o'r smotyn a tybed beth ddywedodd y rheolwr wrth Yann Kermorgant pan fethodd o gyda chic hynod o wael wrth geisio bod yn rhy glyfar.

Yna fe arbedodd David Marshall y gic gan Martyn Waghorn ac roedd Caerdydd ar eu ffordd i Wembley.

'Dwi'n gwybod nad yw pawb yn gefnogwyr o'r gemau ail-gyfle ond go brin fod cefnogwyr Caerdydd a Blackpool yn cwyno ar hyn o bryd.

Yn awr fe fydd y sylw yn troi tuag at Wembley a'r rownd derfynol a 90 munud fydd, yn ôl Dave Jones, yn gallu trawsnewid bywyd clwb yn ariannol ac o ran y sylw sydd yn cael ei roi yn yr Uwch Gyngrhair.

Chwe mil ar hugain oedd yno nos Fercher ac roedd y stadiwm dan ei sang a phe bai Caerdydd yn cyrraedd yr Uwch Gyngrhair yna does dim rheswm pam na fydd hi fel yna yn y stadiwm bob wythnos.

Ond nid ar chwarae bach y bydd curo Blackpool.

O dan Ian Holloway - un o wir gymeriadau'r gêm - maen nhw wed cael tymor arbennig. Ar gyfartaledd ryw 8,500 sydd yn eu gwylio yn Bloomfield Road ac mae eu llwyddiant yn rhoi gobaith i bob clwb bach.

Mae ganddyn nhw chwaraewyr talentog fel Charlie Adam a'r Cymro David Vaughan a dau chwaraewr ar fenthyg - Stephen Dobbie, ar fenthyg o Abertawe a DJ Campbell ar fenthyg o Gaerlŷr - sgoriodd y goliau yn erbyn Nottingham Forest yn y rownd gyn derfynol.

Felly'r wythnos nesaf mi fydd bron i 40,000 o gefnogwyr Caerdydd yn teithio i lawr i Wembley.

Mewn ffordd mae llwyddiant Caerdydd yn llenwi'r bwlch sydd wedi ei adael gan ddiffyg llwyddiant y tîm cenedlaethol, fydd yr un penwythnos yn chwarae oddi cartref yn Croatia ar y Sul ond dim yn denu hanner cymaint o sylw.

A son am sylw, 'dwi'n credu fod y ffaith mai ychydig mwy na 1,000 oedd ym Mharc y Scarlets i wylio Bangor a Port Talbot yn profi pwynt ynglŷn â diffyg cyhoeddusrwydd ynglŷn â'r gêm.

Mae hyn yn broblem cyffredinol. 'Dwi'n gwybod fod timau fel Caerdydd, Abertawe, Wrecsam ac yn y blaen yn chwarae yn Lloegr a 'dwi'n gwybod mai rownd derfynol Cwpan Cymru oedd dan sylw ond pan mae clwb fel Merthyr yn penderfynu fod yn well ganddyn nhw chwarae mewn cynghrair lle nad oes llumanwyr yna mae yna broblemau mawr yn wynebu delwedd ein cynghrair cenedlaethol.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Mewn cyfweliad papur newydd dros y penwythnos, mynegodd Paulo Sousa, rheolwr Abertawe, mai anafiadau yn ystod mis Ionawr ynghyd a diffyg arian i brynu chwaraewyr newydd, oedd yn bennaf gyfrifol am fethiant y Swans o ennill eu lle yn y gemau ail-gyfle.

Ategodd hefyd mai cadw Abertawe yn y Bencampwriaeth oedd y nod, a roddwyd iddo gan y clwb wedi iddo ymuno yn ystod yr Haf o ystyried fod y cyn rheolwr, Roberto Martinez, ynghyd â hyfforddwyr a dau chwaraewr allweddol, Jason Scotland a Jordi Gomez, wedi dilyn Martinez i Wigan.

Yng nghyd-destun y sefyllfa yma a etifeddwyd, credai Sousa fod gorffen yn y seithfed safle wedi bod yn gyflawniad ffantastig!

Cafodd Sousa , gyda llaw, ei ddisgrifio fel un o reolwyr ifanc mwyaf disglair Ewrop yn yr erthygl.

Tybed faint o ddarllenwyr sydd yn cytuno a'r farn yna, boed hynny ynglŷn â gallu Sousa neu gyflawniadau Abertawe?

Byddai clywed eich barn chi yn ddiddorol.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Pan drawodd Lee Trundle y bel i gefn y rhwyd heibio Ben Smith yn y gôl i Doncaster Ddydd Sul mi roeddwn ni yn meddwl fod yna ddiweddglo dramatig i'r prynhawn yn y Liberty.

Trundle, y chwaraewr sydd yn arwr gyda'r cefnogwyr ar fenthyg o Bristol City yn sgorio'r gôl yn y ffordd fwyaf dramatig posib i gymryd tîm Paolo Sousa i'r gemau ail gyfle.

Yn anffodus doeddwn ni a llawer arall yn y stadiwm ddim wedi sylwi fod Trundle wedi llawio'r bel. Hyn i gyd funud neu ddau wedi iddi ymddangos fod Sam Hird wedi ildio cic o'r smotyn wedi trosedd ar Craig Beattie.

Dyna i chi awr a hanner sy'n crynhoi tymor yr Elyrch. Digon o feddiant, yn creu cyfleon, yn eu methu a phenderfyniadau dadleuol yn mynd yn eu herbyn.

Dyna chi'r gêm yn Nottingham Forest, yn Plymouth a gartref yn erbyn West Browmich Albion. Maen nhw'n dweud fod lwc neu anlwc yn gyfartal mewn tymor. Ond dw i'n amau fod hynny yn wir cyn belled a bod Abertawe yn y cwestiwn. Mae'n anodd cofio penderfyniad mawr dadleuol aeth o'u plaid.

Ond dyna ni. Tymor arall yn y Bencampwriaeth wedi iddyn nhw edrych yn sicr o le yn y gemau ail gyfle chwe wythnos yn ôl .

Beth fydd yn digwydd nesaf felly? Beth fydd y dyfodol i rai o'r chwaraewyr? Mi rydan ni yn son am Ashley Williams, Leon Britton, Darren Pratley ac un neu ddau arall.

Mae gan y cyn rheolwr Roberto Martinez feddwl uchel o Williams a Britton ond a fydd o yn cael sêl bendith ei gadeirydd i geisio eu prynu wedi i Jordi Gomez a Jason Scotland fethu a chreu argraff yn yr Uwchgyngrhair y tymor yma.Yn wir beth fydd dyfodol y rheolwr ei hun?

Mae o'n uchelgeisiol, mae o ar dan i reoli ar y lefel uchaf posib a does dim dwywaith iddo deimlo rhwystredigaeth yn yr wythnosau diwethaf ai fod o yn teimlo fod angen mwy o fuddsoddiad yn y clwb.

Ond man un peth yn sicr. Fydd yna ddim elfen o banig ar ran y cyfarwyddwyr. Wedi'r cyfan, unwaith fydd y teimlad o siom wedi diflannu mae Abertawe wedi cael tymor da, yn gorffen yn uwch na'r tymor diwethaf ac wedi bod ymysg y ceffylau blaen am ran fwyaf o'r tymor a hynny wedi'r ergyd o golli Martinez i staff a chwaraewyr allweddol.

Mae'r cadeirydd Huw Jenkins a'r cyfarwyddwyr eraill yn cofio'n dda'r hyn ddigwyddodd i'r clwb yn y gorffennol gyda'u problemau ariannol a dydyn nhw ddim am weld hanes yn cael ei ail adrodd.

Mi fydd y sylw yn naturiol yn troi tuag at Gaerdydd a'r gemau ail gyfle ond mi fydd digon yn digwydd yn Abertawe hefyd gyda'r rheolwr yn cyfarfod gyda'r bwrdd a Sousa ei hun yn cyfarfod a'r chwaraewyr ddydd Mercher a Dydd Iau. Dw i'n rhagweld y bydd yna dipyn o fynd a dod dros yr wythnosau nesaf.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?