Cyfathrebu gan ddefnyddio lloerenni

Gallwn ni ddefnyddio tonnau electromagnetig i gyfathrebu.

Mae ffonau symudol yn cyfathrebu â thŵr cell symudol gan ddefnyddio tonnau radio, ac mae'r tyrau'n cyfathrebu â lloerenni gan ddefnyddio microdonnau. Maent yn defnyddio microdonnau am eu bod nhw'n gallu mynd drwy'r atmosffer. Mae'r signal hwn yn gallu cael ei anfon i loeren a'i ddefnyddio i gyfathrebu o gwmpas y byd (mae angen mwy nag un lloeren i wneud hyn).

Orbitau geosefydlog a geocydamseredig

Beth yw lloeren geocydamseredig?

Mae ganddi amser orbit o 24 awr.
Mae'n dychwelyd i'r un pwynt mewn 24 awr yn union.

Math penodol o orbit geocydamseredig yw orbit geosefydlog.

Sut mae orbit geosefydlog yn wahanol?

Y gwahaniaeth rhwng orbit geocydamseredig ac orbit geosefydlog yw bod gwrthrych mewn orbit geosefydlog yn aros yn yr un safle. Mae orbit geocydamseredig yn golygu bod gwrthrych yn cwblhau orbit llawn mewn 24 awr, ac felly'n dychwelyd i'w leoliad gwreiddiol yn yr awyr.

Mae gorsaf yn gallu cyfathrebu'n gyson â lloeren geosefydlog, ond dim ond unwaith bob 24 awr â lloeren geocydamseredig.

Gellir anfon signal microdon i loeren mewn orbit geosefydlog. Mae'r lloerenni hyn mewn orbit uwchben y . Mae uchder yr orbit – tua 36,000 km – yr union bellter cywir fel eu bod nhw’n cymryd un diwrnod (24 awr) i wneud pob orbit. Mae hyn yn golygu eu bod nhw'n aros uwchben yr un pwynt ar arwyneb y ddaear.

Mae lloerenni geosefydlog bob amser yn ymddangos yn yr un safle wrth edrych arnynt o'r ddaear. Dyma pam rydyn ni'n gallu gosod dysglau teledu lloeren mewn safle penodol heb orfod eu symud nhw.

Efallai y bydd cwestiynau arholiad yn gofyn i ti gyfrifo'r amser mae signal microdon yn ei gymryd i deithio, er enghraifft, o bwynt A i bwynt B ar y ddaear.

Mae'r diagram isod yn dangos sut mae hi'n bosibl cyfathrebu rhwng dau bwynt, A a B, ar y ddaear. Rhaid i'r signal deithio o bwynt A i'r lloeren sydd wedi'i lleoli 36,000 km uwchlaw'r ddaear cyn teithio'n ôl i'r ddaear ym mhwynt B.