የብሔራዊ አደጋ ስጋት ሥራ አመራር ኮሚሽነር ምትኩ ካሳ የተጠረጠሩባቸው ወንጀሎች

ረቡዕ ሐምሌ 06/2014 ዓ.ም. ከሙስና ጋር በተያያዘ በቁጥጥር ስር የዋሉት የብሔራዊ አደጋ ስጋትና ሥራ አመራር ኮሚሽን ኮሚሽነር ምትኩ ካሳ የተጠረጠሩባቸውን ወንጀሎች ዝርዝር ፖሊስ ይፋ አድርጓል።

ለበርካታ ዓመታት የብሔራዊ አደጋ ስጋትና ሥራ አመራርን በበላይነት የመሩት ኮሚሽነሩ ከኤልሻዳይ ሪሊፍ ኤንድ ዴቨሎፕመንት ከተባለው የበጎ አድራጎት ማኅበር ዳይሬክተር ጋር በመመሳጠር ፈጽመዋቸዋል የተባሉ ወንጀሎች ተጠቅሰውባቸዋል።

በዚህም የእርዳታ ቁሶችን ለግል ጥቅማቸው በማዋል እንዲሁም ሕገወጥ ገንዘብን ሕጋዊ አስመስለው በማቅረብ ወንጀል መጠርጠራቸውን ፖሊስን ዋቢ አድርገው የአገር ውስጥ መገናኛ ብዙኃን ዘግበዋል።

የፍትህ ሚኒስቴር የሙስና ወንጀል ዐቃቤ ሕግ ዳይሬክቶሬት ጄኔራል እና የፌደራል ፖሊስ ኮሚሽን ወንጀል ምርመራ ቢሮ በጥምረት ሲያደርጉት የቆየ ነው በተባለ ምርመራም የሰው እና የሰነድ ማስረጃዎች ተዘርዝረዋል።

በተጨማሪም የፌደራል ዋና ኦዲተር የብሔራዊ አደጋ ስጋት ሥራ አመራር ኮሚሽን እንዲሁም በአማራ፣ በአፋር፣ በኦሮሚያና በደቡብ ክልሎች በሚገኙት የኤልሻዳይ ማዕከላት ላይ ያከናወነው የምርመራ ኦዲት ተጠናቆ በምርመራው እንደተካተተም ተገልጿል።

ኮሚሽነሩ የተጠረጠሩባቸው ወንጀሎች

ኮሚሽነሩ በቁጥጥር ስር ከዋሉ በኋላ በቤታቸው በተደረገው ብርበራ ከ605 ሺህ በላይ የውጭ አገር ገንዘብ መገኘቱን የኢትዮጵያ ቴሌቪዥን ዘግቧል።

በዚህም ዘገባ ላይ ኮሚሽነር ምትኩ ካሳ ላለፉት 2 ዓመታት ሥልጣን ባለው ተቋም ከአገር እንዳይወጡ እግድ ተጥሎባቸው እንደነበርም ሰፍሯል።

ኮሚሽነሩ አቶ ምትኩ ከኤልሻዳይ የበጎ አድራጎት ማኅበር ዳይሬክተር የማነ ወልደማርያም እና ከሌሎችም የተቋሙ ሠራተኞች ጋር ተገቢ ያልሆነ የጥቅም ግንኙነት በመፍጠር ለእርዳታ የመጡ ቁሳቁሶችን ለግል ጥቅማቸው አውለዋል ብሏል ፖሊስ።

ፖሊስ እንደሚለው አቶ ምትኩ በሺዎች የሚቆጠሩ የሌሉ ተረጂዎችን ስም በመጠቀም እና የእርዳታ ፈላጊዎችን ቁጥር በመጨመር እህልና የምግብ ቁሳቁሶች ከኮሚሽኑ መጋዘን አውጥተው በሚሊዮኖች ብር በመሸጥ ጥቅም አግኝተዋል።

ለእርዳታ ፈላጊዎች የመጣው እህል ለተረጂዎቹም ሳይደርስ ለዱቄት ፋብሪካዎችና ለሌሎች ግለሰቦች ሸጠውታል፤ በዚህም ከአቶ ምትኩ በተጨማሪ በቤተሰቦቻቸውም ስም ከኤልሻዳይ በተለያዩ ጊዜያት በሚሊዮን ብር የሚገመት ጥቅም ማግኘታቸውን ማስረጃ እንዳለው ፖሊስ ገልጿል።

በዚህም ፖሊስ ኮሚሽነሩን በሚመለከት ተገቢ ባልሆነ መንገድ ጥቅም ያገኙበትን እና ለተረጂዎች የሚሰጥ እርዳታን ለራሳቸው ጥቅም አግኝተውበታል ያላቸውን ሁኔታዎች ፖሊስ ዘርዝሯል።

ኮሚሽነሩ እና ቤተሰቦቻቸው ከኤልሻዳይ ማኅበር በተሰጠ ገንዘብ በቤተሰቦቻው ስም ያፈሩትም ንብረት ፖሊስ ጠቅሷል።

 ምርመራው እንዳልተጠናቀቀና ሌሎችም ከኮሚሽኑ በመቶ ሚሊዮን ብሮች ወጥተዋል የተባሉ ገንዘቦች እንዲሁም በቤተሰቦቻቸው የተገዙ ቤቶች፣ መኪኖችና ሌሎች የጥቅም ትስስሮች ላይ ምርመራ እየተከናወነ መሆኑን ፖሊስ ገልጿል።