Lammiileen Afriikaa Kibbaa haasaa 'jibba lammiilee alaa' balaaleffatu morman
Madda suuraa, Getty Images
Torbee darbe Afriikaa Kibbaa keessatti erga haleellaa fi saamichi namoota biyyoota biroo biyyattii keesa jiraatan irratti raawwachuu eegalee as qondaaltonni Afriikaa Kibbaa dubbii araaraa dhiyeessuuf yaalaa turaniiru.
Pirezidaantii biyyattii Siiriil Raamaapoosaa fi qondaala poolisii Bheki Cele dabalatee qondaaltonni biyyattii biyyi isaanii kan dhalli namaa hundi keessa jiraachuu danda'uu fi sababiin lammiileen alaa itti jibbamanii fi haleelamaniif homtuu akka hin jirre dubbachaa turaniiru.
Haata'u malee garuu gareen haleellaa fi saamicha keessatti hirmaachaa turan inumaa miseensa babal'ifachuun haasaa qondaaltotaa mormuu itti fufaniiru.
Gareen kun wayita qondaalli siyaasaa gameessi biyyattii duraanii Mangosuthu Buthelez jibbiinsi lammiilee biyya alaa dhaabbachuu qaba jechuun magaalaa Johaanisbargi keessatti haasawa taasisan mormii dhageessisuudhaan aariidhaan walgahii diigan.
Yaada araaraa qabatanii kan dhiyaatan namni siyaasaa gosa Zuuluu Obbo Buthelezi haleellaan tibbana raawwate kan nama qaanessuu fi maqaa Afriikaa Kibbaa fi ardittii kan balleessuudha jechuun dubbatan.
Tuuti namootaa isaan hordofaa turan garuu walga'icha diiganii erga ba'anii booda magaalattii keessa naanna'uun ammallee lammiileen biyya alaa nu keessaa ba'uu qabu dhaadannoo jedhu dhageessisaa turan.
Erga Wixata darbe dubbiin eegalamee namoonni 10 ajjeefamuu fi namoonni haleellaa kana raawwatan jedhamanii shakkaman 420 qabamuu poolisiin biyyattii beeksiseera.
