Waantota 10 waa'ee Google isin hin beekne

Jireenya Google utuu hin dhufiin dura jiru yaaddanii beektuu? Odeeffannoo hatattamaan barbaaddaniif fallisaa maal taha ture?

Waan barbaaddan marti jira hanga jechuun dandeessisutti Google irra jira. Daandii hoteelatti geessu, maqaa gaaraa yookiin haroo, dhukkubi tokko maal akka tahe, biyyaafi magaala addunyaa kanaa baruu barbaaddan waan gootan tokko Google keessa seentanii barbaaduu dha.

Google gidduugleessaan sekoondii 1 keessatti gaaffiiwwan 40,000 keessummeessa- guyyaa tokko keessaattimmoo biliyoona 3.5 taha.

Lafa kanarratti Google motora odeeffannoo nuu barbaadu qofa osoo hin taane, samuuda biiznasiifi walitti qabaa odeeffannoo hin mudhukne dha.

Google, irratti yeroo waa barbaannu isa barbaannu irratti kan biraa dabaleetu nuu fida. Garuu hangam waa'ee Google beekna laata?

Google waggaa 20 guutera, ragaawwan muraasa waa'ee Google kunooti.

1. Maqaa

Google maali? jettanii yoo gaafattan dura homaa jechuu hin turre.

Maqaan 'Google' tarmii herreegaa 'googol' jedhu dogoggora qubeessuurra waan dhufe, 'googol' jechuun immoo lakkoofsa 1 zeeroon 100 itti aanee dhufu jechuu dha.

Akkatti dogoggorri qubeessuu kun yeroo duraa barataa yookiin injinaraan uumame himama baayyeetu jira.

Dogoggorri idilee tahe, jechi haaraa kun nu waliin jira. Isa kaan seenaan haa gaafatu.

2. Dhidhibbaa dugdaa

Hundeessitoonni Google Laarii Peejiifi Seergee Biriin Google n 'Backrub' jedhanii ture kan moggaasan.

Afaan ingiliiziin jechichi dugda dhidhiibuu akka jechuu yoo taheyyuu, isaan garuu sirna qunnamsiistuu duuba/keessaan fuula ramaddii barbaadu ibsuuf itti fayyadamanii turan

3. Jallataa

Google'tti maayii qofa miti. Qoosaanis jira

Google irratti jecha ''askew'' jedhu galchaatii ilaalaa mee.

4. Re'oota

Google magariisummaa waan deeggaruuf maashina marga haamu gara re'ootaatti geeddareera.

Kanaaf immoo ragaan lafa gamoo waajira Google Kaalifooniyaatti argamu irra dhaabbttani marga tulluu fuuldurattii argitani irra jiru dha. Re'oota 200 otoo marga dheedaniis argitu

5. Daldala guddataa

Google, GMail, Google Maps, Google Drive, Google Chrome kalaquu dabalatee bara 2010 irraa qabee torbee torbeen of guddisaa jira.

Beekuu dhiisuu dandeessu garuu, jaarmiyaaleen kanneen akka Android, Youtube, Waze and AdSense abbaa qabeenyummaan isaanii kan Google dha, kan 70 biroonis jiru.

6. Fakkii boconcoraa

Fakkiin boconcoraa inni jalqabaa Google ergaa gabaabaa ''waajira keessa hin jiru'' jedhu himuuf bara 1998tti kaasame. Innis, fakkii nama gubatuu qubeewwan Google keessaa ''O'' isa lammaffaa duuba kan dhaabate ture.

Yaadichi kan dhufe hundeessitoonni Google Laariifi Sargeen gara Navaadaa(feestivaala nama gubataa) deemuuf jedhanii, fayyadamtoota isaanii dogoggora teeknikaa sirreessuuf hin jiru jedhanii ergaa dabarsuuf ture

Kanumaan aadaa Google tahee guyyoota kabajamoofi idila addunyaa tahaniif baanarii Google ni geeddaru. Namoota beekamoof immoo kaffaltiin hojjetuuf.

7. Carraa baayyoliin dhaban

Bara 1999tti hundeessitoonni Google n doolaara miiliyoona 1 gurguruuf yoo yaadee tureyyuu namni irraa bitu waan dhibeef hafeera. Qarshii hir'isnaanis hin taane.

Amma Google doolaara miiliyoona 300 baasa.Namni gaafas hin butatiin hafe akkam gaabba laata?

8. Dhaadannoo

''Hamaa hin tahiin'' kan jedhu dhaadannoo ganamaa dhaabbatichaa keessaati

Ammas dhaadanicha waliin jiraa? Deebisaa isinumaaf dhiisna.

9. Dubbii nyaataa, dubbii lubbuu.

Akka Forbes jedhutti abbaan Google Saargeey Briin yeroo Google jalqaba jalqabu waajirri Google kamiyyuu nyaatarraa metira 60 fagaachuu hin qabu jedhee murteessee ture.

Dur nyaati tursiaa dhaabbatichaa ''swedish fish'' jedham ture amma garuu hojjettoonni Google nyaata biyya dachaasufi bunatu dhiyaataaf.

10. Hiriyyee dhugaa Google

Googlers(hojjettota ) nooglers (hojjettoota haaraa qacaramani) saroota isaanii iddoo hojii fidanii dhufuu danda'u. Haala waajjiraaf sirriitti waan madaqfamaniif naannoo hin koseessani.

Garabiraa.....

Baafatni Google bara 1999 irraa harka 100 yoo guddateyyuu, ammas harka saffisa harka 10,000 dhaan haaressu.