Shaampiyoonaa Atileetiksii Addunyaa ganna 20 gadii: Itoophiyaan medaaliyaa 12n afraffaa ta'uun xumurte

Itoophiyaan Shaampiyoonaa Atileetiksii Addunyaa ganna 20 gadii Keeniyaa magaalaa Naayiroobiitti dorgomamaa ture medaaliyaa 12 argachuun addunyaarraa sadarkaa afraffaa argachuun xumurte.

Dorgommii gaafa Roobii eegalee hanga Dilbata kaleessaa guyyoota shaniif taasifameen sababa koronaavaayirasiitiin deeggartoonni isteediyeemii seenuu hin dandeenye.

Gareen atileetiksii Itoophiyaa dorgommicharra hirmaate har'a ganama Finfinnee buufata xiyyaaraa Boolee yoo gahu simannaan taasifameeraaf.

Itoophiyaan dorgommii kana irratti gara caalu medaaliyaa meetii argatte.

Gabatee medaaliyaa biyyoota waliigalaa qopheessituun dorgommichaa Keeniyaan Warqii 8, Meetii 1 fi Nahaasa torbaan walumaagala medaaliyaa 16'n tokkoffaan xumurte.

Itoophiyaan biyyoota lamaan warqii afur qaban Finlaandiifi Naayijeeriyaatti aanuun akka addunyaatti afraffaa, akka Afrikaatti sadaffaan xumurte.

Dorgommiin gara caalu Itoophiyaan meetii itti argatte kan atileetonni Keeniyaa itti warqii argatanidha.

Atileetonni Itoophiyaa lama dorgommii kana irratti medaaliyaa lama lama argataniiru.

Atileetiin medaaliyaa warqii argate maal jedhe?

Dorgommii warqii itti argate booda BBC’n kan isa dubbise atileet Taaddasaa Warquun guddaa gammaduu hime.

‘’Dorgommiin waggaa 20 gadii kuni ka’umsa waan ta’efi dorgomees warqii waan fideef baay’ee gammadeera,’’ jechuun dorgommii fuulduraaf akka isa kakaasu hime.

‘’Kana dura kanneen akka Salamoon Baaraggaafi Muktaar Idiriis fa’i dorgommii kana irratti medaaliyaa argatanii turan.

''Anis isaan fakkeenya godhadhee Shaampiyoonaa addunyaafi Olompikii dhufu irratti cimee hojjedhee nan hirmaadha jedhee nan yaada.''

Medaaliyaawwan argaman:

Warqii

Meetii

Nahaasa