Daaktonni doonii waraanaa erga dhidhimee waggoota 109 booda argatan

Daaktonni caccabaa doonii Waraana Addunyaa tokkoffaa erga dhidhimee waggaa 109 booda argatan.

Bakki argatanis galaana 'North Sea' jedhamu keessattidha.

Dooniin 'HMS Nottingham' jedhamtu gartuu daaktotaa kudhaniin qarqara galaanaa Iskootilaand irraa 60km fagaattee argamteetti.

Dooniin kuni doonii bishaan jalaa Jarmaniin Hayayya 19, 1916 yeroo haleelamte namoonni 38 irra turan ajjeefamaniiru.

Dooniin kuni bishaan keessa 82m gad fagaattee kan argamte yoo ta'u hanga gartuun daaktota hoogganu, ProjectXplore, ji'a kana keessa bakka jirtu barutti achi buuteen ishee dhabamee ture.

Gartuun kuni eenyummaa doonii waraanaa kanaarratti ''shakkii homaatuu'' akka hin qabne dubbataniiru.

Kunis, chaappaa dooniirra ture, meeshaa iirra ture akkasumas haalli itti jirtu haala gabaasa haleellaa sanaan wal simu waan ta'eefi.

Daaktonni saanii ittiin sooratan bifa adii qabaniifi humna galaanaa UK, Royaal Naavii, irraa qaban argataniiru.

Dooniin kuni osoo ergamarra jirtuu si'a sadii haleelamte.

Gaafa sana ganama bidiruun Jarman mul'atus, kanneen doonii sanarra turan bidiruu qurxummiii ittiin qaban se'an.

Konkolaachisaa, qondaalota 20 fi kanneen doonii sanarra turan 357 humna galaanaa UK'n baraaramaniiru.

Bakka dooniin kuni dhidhimte baruuf yaaliin garagaraa taasifamuus hin milkoofne ture.

Gartuun ProjectXplore jedhamu Fulbaana 2024 qorannoo eegale.

Baatii Ebla keessa kaameraa sonaariin bakkicha qorachuun caccabaa doonii fakkaatu argatan.

Baatii sadii boodammoo bakka caccabaan doonii jiru imaluun eenyummaa doonii sanaa mirkaneeffatan.