"Панама ҳужжатлари"да ФИФА раҳбарининг номи қалқиб чиқди

"Панама ҳужжатлари"дан аён бўлишича, Халқаро Футбол Федерацияси - ФИФАнинг янги президенти Жанни Инфантино пора беришда айбланган бизнесменлар билан битим тузган.

Бу ҳужжатларга кўра, УЕФА да раҳбарларидан бири лавозимини эгаллаб туриб, Чемпионлар Лигаси ўйинларини транслация қилиш ҳуқуқи тўғрисидаги шартномани икки бизнесмен Уго ва Мариано Хинкислар билан имзолаган. Улар транслация қилиш ҳуқуқини дастлабки нархидан уч баравар баланд баҳода сотганлар.

Бироқ шартномани имзолаётиб, Инфантино бирор бир қонунбузарликка йўл қўйгани ҳақида бирор бир далил йўқ. Олдинроқ УЕФА аргентиналик икки бизнесмен Уго Хинкис ва унинг ўғли Мариано билан бирор бир алоқа борлигини инкор қилганди. Бу икки бизнесменга кейин АҚШда қатор футбол ўйинларини телетрансляция қилиш ҳуқуқидан қонунга зид равишда фойдаланганлик айблови илгари сурилган.

ФИФАнинг юқори лавозимли мулозимининг Би-би-сига билдиришича, "Панама ҳужжатлари" мазмуни ахлоқ бўйича қўмитанинг чуқур текширувидан ўтказилиши керак.

Айни пайтда Аргентинада бўлган Уго ва Мариано Хинкисга АҚШга экстрадиция этилиш хавфи мавжуд.

Гап нимада?

2015 йил май ойида Америка прокурорлари таъкидлашича, Cross Trading ширкатига эгалик қилган Хинкислар бир неча йиллар мобайнида Жанубий Америка футбол вакилларига қатор футбол мусобақалари намойиши ҳуқуқини арзон нархда олиш ва сўнгра бу ҳуқуқни катта даромад келтирадиган нархда сотиш учун миллионлаб доллар пора бериб келганлар.

Жанни Инфантинонинг исми шарифи Оврўпо чкмпионлари лигасининг 2006-2007 ва 2008-2009 йил мавсумидаги ўйинларини Эквадорда трансляция қилиш бўйича Cross Trading билан тузилган шартномада келтирилади.

Тинч уммонидаги миттигина Ниуэ оролида тузилган Cross Trading оффшор ширкати бу ҳуқуқ учун 111 минг доллар тўлаган. "Панама ҳужжатлари"га кўра, у бу ҳуқуқни Эквадорнинг Teleamazonas телеширкатига 311 170 долларга пуллайди.

Cross Trading шунингдек, УЕФА нинг супер кубоги учун трансляция ҳуқуқига 28 минг доллар тўлаган, сўнгра уни Teleamazonasга 126 200 долларга сотган.

Бироқ ҳеч ким Инфантино Cross Trading билан 2006 йилда имзоланган шартнома учун пора олгани ва Teleamazonas қандайдир жиноий фаолиятга алоқадорлиги ҳақида далил келтиролмайди.

Ўша пайтда Инфантино УЕФАнинг ҳуқуқий бўлимини бошлиғи бўлган.

Cross Trading шунингдек, ФИФАнинг ахлоқ бўйича қўмита аъзоси, кейин худди шу қўмита томонидан текширилган Хуан Педро Дамиани билан алоқаси бўлган.

УЕФА нима дейди?

УЕФА нинг таъкидлашича, Cross Trading билан тузилган барча шартномалар ҳеч бир қонунни бузмаган.

УЕФА вакилига кўра, трансляция ҳуқуқи очиқ танловлар доирасида қўлга киритилган.

Унинг сўзларига биноан, трансляция ҳуқуқлари билан кейин нима юз бергани УЕФАга таалуқли эмас.

Бундан ташқари УЕФА қайд этадики, чемпионлар лигаси ўйинларини трансляция қилиш ҳуқуқи бўйича юзлаб ширкатлар билан шартнома имзоланади. УЕФАга арзимаган даромад олиб келган Cross Trading ширкати ҳам шундайлардан бири холос.

Умуман олиб қараганда бу хабарлар Инфантинонинг билан бирга ФИФАнинг ҳам обрўсига путур етказади.

Коррупция жанжали қаршисида қолган ташкилот учун охирги кунлардаги иккинчи ёмон хабар ҳисобланади.

ФИФА қўмитаси

ФИФА нинг ахлоқ бўйича қўмитаси Хуана Педро Дамианининг порахўрликда гумон қилинаётган яна бир футбол амалдори Эухенио Фигуэредо билан алоқаларини ўрганади.

Саволлар йўқ

Инфантино 2016 йил 26 февралда коррупция жанжаллари орқасидан кетган Зепп Блаттернинг ўрнига ФИФА раҳбарлигига cайланганди.

ФИФА раҳбарлигини қабул қилган ташкилот имижини тиклашга ваъда берганди.