Меркел Путин ва Россияни қаттиқ қоралаб чиқди

Олмония канцлери Ангела Меркел Россиянинг Украинага қарши амаллари Оврўпода ўрнатилган тинч тартибни таҳдид остига қўйиши ва халқаро қонунларни бузишини айтган.

Олмония парламенти - Бундестагда чиқиш қила туриб Меркел хоним Россиянинг Қримни қўшиб олишини ҳеч нима билан оқлаб бўлмаслигини айтди.

Бироқ, айни пайтда, у Украинадаги вазиятни ўнглаш учун сабр-тоқат керак бўлишини билдирди.

Авваллари Россия ва Ғарб ўртасидаги етакчи дипломатик воситачи деб кўрилган Меркел хоним охирги вақтларда Москвага қарши қаттиқ танқидлар билан чиқмоқда.

"Россиянинг Донецк ва Луганскдаги жанглардаги бевосита ё билвосита иштирокини ҳеч оқлаб бўлмайди. Донецк ва Луганскдаги вазиятни умуман ярашув деб тасвирлаб бўлмайди, шундай экан, Россияга қарши иқтисодий жазо чоралари киритилиши керак", - деди Меркел хоним депутатларнинг қарсаклари остида.

Олмон канцлери ўтган бир неча ой давомида Россия ва Украина ўртасидаги инқирозни аритиш йўлида фаол иш олиб борди.

Москва Украина инқирозида ўзининг бевосита ё билвосита иштироки борлигини қатъий рад этади ва Украинада Россия қўшинлари ё ҳарбий техникаси йўқлигини айтиб келади.

Кузатувчиларга кўра, Меркел хонимнинг Москвага қарши қатъий мавқега ўтишига ўзининг аввалги ёндошуви иш бермагани сабаб бўлмоқда.

Меркел хоним ноябрь ўртасида Австралияда бўлиб ўтган Йирик 20 саммитида Владимир Путин билан юзма-юз учрашган ва, ўзи айтишича, Путинни Украинадаги мақсадларини очиқ айтишга мажбурламоқчи бўлган.

Бироқ, олмон вакиллик гуруҳи хабарига кўра, қарийб тўрт соат давом этган учрашув ҳеч қандай натижага олиб келмаган.

Олмон дипломатларидан бирининг билдиришича: "Путин мутлақ совуқ мавқеда эди. У ўз қобиғига кириб олди ва ундан чиқиб кета олмаяпти".

Азизлар, Би-би-си Ўзбек хизмати билан Whatsapp орқали боғланишни истасангиз телефонимиз - +44 7858 860002