WHO: Ғарбда эбола тарқаши эҳтимоли кам

Жаҳон Соғлиқни Сақлаш Ташкилотига (WHO) кўра, АҚШ ва Ғарб мамлакатларида хавфли эбола касаллигининг кенг миқёсда тарқаб кетиши эҳтимоли кам.

АҚШ президенти Барак Обаманинг айтишича, эбола вирусини юқтириш хавфи жуда паст. Лекин айни ҳолда эпидемиянинг олдини олиш учун "кескинроқ чоралар" кўришга фармон берган.

Ҳозирда АҚШ расмийлари Техасда эболага чалинган беморни парваришлаган ва кейинчалик ўзи ҳам касалликни юқтирган ҳамшира қандай қилиб учоқда сафар қилишга изн берилганлиги текширилмоқда.

Амбер Винсон исмли ҳамшира билан бир учоқда бўлган 132 йўловчини топишга ҳаракат қилинмоқда.

Шу йил март ойида Африка давлатларида бошланган касаллик ҳозирга қадар 4 минг 500 кишининг ёстиғини қуритган.

Оврўпо Иттифоқи вазирлари Брюсселда учрашиб, Ғарбий Африка давлатларида касаликка қарши курашда ёрдам бериш учун аскарларни юбориш дохил турли чораларни кўриб чиқмоқдалар.

Чоршанба куни жаноб Барак Обама аввал режаланган сиёсий учрашувларини бекор қилиб, эболага қарши кураш чоралари юзасидан фавқулодда мажлисда қатнашди.

Либерияда эболани юқтирганлиги аниқланган шахс Техасга қайтган вақти уни парвариш қилган 2 ҳамшира касалликни юқтирганлари аниқланган.

Иккиси ҳам махсус ҳимояловчи кийим ва ниқобда ишлаганлар. Уларнинг вирусни қандай юқтирганлари номаълум қолмоқда.

Улардан бири кейинчалик расмийларга учоқда парвоз қилиши ҳаиқда маълум қилган.

Ўшанда унинг ҳарорати 37.5 бўлган. Ҳозирда айтилишича, унга йўловчи учоғига чиқишга рухсат берилмаслиги керак эди.

Касалликдан вафот этган шахснинг 48 нафар яқинлари эса назорат остига олинганлар.

Айни вақтда БМТ расмийларига кўра, эбола тарқаган Ғарбий Африка давлатларида озиқ-овқат тақчиллиги юз бериши кутилмоқда.

Айтилишича, Сиерра Леоне, Гвинея ва Либерияда фермерлар касалликни юқтиришдан хавфсираб, далаларни тарк этганлар.

Шифокорлар эболани юқтирмаслик учун касаликка чалинган беморалр билан алоқада бўлмаслик, айниқса тана суюқликларидан эҳтиёт бўлишни, ҳатто кўзни сақлаш мақсадида махсус кўзойнак тақишни тавсия қиладилар.

Касал одамга тегишли бўлган кийим-кечак, ўрин-кўрпа ва тиббий жиҳозлар ёқиб юборилиши лозим.