Шаҳзода Чарлз Путинни Гитлерга қиёслади

Канадага сафар қилаётган Шаҳзода Чарлз Россия Президенти Владимир Путинни Адолф Гитлерга қиёслаган.

Шахсий суҳбатда Россиянинг Украинага нисбатан сиёсати ва Қримнинг қўшиб олинишини шарҳлаган Уэлс шаҳзодаси "Путин ҳам Гитлер нима қилган бўлса, шуни қилаяпти", деб айтган.

Британияда чоп этиладиган Daily Mail рўзномаси шаҳзода Чарлздан айни шу сўзларни иқтибос сифатида келтирган.

Россия ҳозирча шаҳзода Чарлзнинг сўзларига ҳеч қандай муносабат билдирмаган.

Канададаги муҳожирлик музейига ташрифи чоғида Британиянинг валиаҳд шаҳзодасига ҳамроҳлик қилган Мэриэнн Фергюсон Би-би-си билан суҳбатда шаҳзода ҳақиқатан ҳам шундай иборани ишлатганини тасдиқлаган.

"У мендан Канадага қачон келганимни сўради. Мен 1939 йилда, деб айтдим. У эса аввал Гитлер қилган баъзи ишларни энди Путин қилаяпти, деди. Мен шаҳзоданинг фикрларига қўшилдим: сиз унинг худди Гитлерга ўхшаб бошқа давлатларни қандай ишғол қилаётганини кўраяпсиз. Шаҳзода Россиянинг ўзи ҳақида эътиборга арзигулик бирон гап айтгани йўқ", - дея ҳикоя қилади яҳудий муҳожирларидан бўлган Фергюсон Би-би-си билан суҳбатда.

Айни пайтда Фергюсон хоним ўзининг ушбу иқрори бу қадар катта шов-шувга сабаб бўлади деб ўйламаганини айтган.

Шахсий суҳбат

Шаҳзода Чарлзнинг матбуот хизматида Daily Mail журналистларига шаҳзоданинг шахсий суҳбати юзасидан шарҳ бермасликларини айтишган.

Аммо Британия қироллик оиласининг қароргоҳи бўлган Кларенс-хаусдагилар бошқа бир нашр-Daily Telegraph га "бу Холокостда (яҳудийларнинг оммавий қирғини-таҳр.) оила аъзоларидан айрилган бир аёл билан шахсий, самимий суҳбат эди", дея изоҳ беришган.

Британия Бош вазирининг ўринбосари, либерал-демократлар раҳбари Ник Клегг Би-би-си билан суҳбатда бунинг "шахсий суҳбат" бўлганини таъкидлаб, шаҳзода Чарлзни ҳимоя қилган.

Президент Путиннинг шу йил март ойида Қримни қўшиб олиши халқаро майдонда кенг қораланган.

АҚШнинг собиқ Давлат Котибаси Ҳиллари Клинтон ҳам Россия украин фуқароларига рус паспорти беришни бошлаган пайт Путин билан Гитлер ўртасида айни қиёсни қилган эди.

Биринчи ўхшатиш эмас

Би-би-сининг қироллик масалалари бўйича мухбири Питер Хантнинг айтишича, шаҳзода аввалдан режаланмаган бир шаклда баҳсли халқаро масалага аралашиб қолган.

Британиядаги қироллик оила-аъзолари кундалик сиёсий масалалардан четда туришади.

Аммо шаҳзода Чарлз учун бу ноодатий эмас.

Ўтмишда ҳукумат аъзолари валиаҳд шаҳзодани ҳукумат ишларига "бурнини тиқиш"да айблаган пайтлар бўлган.

Ўзаро суҳбатда айтилган гапнинг бу каби катта шов-шув қўзғашига яна бир сабаб шаҳзода Чарлзнинг бир кун келиб Британия тахтини эгаллаш эҳтимолидир.

Би-би-си мухбирига кўра, тарафдорлари шаҳзода Чарлзнинг нуқтаи назари Путиннинг амалларидан жирканаётган кўпчиликнинг қарашидан фарқ қилмайди, дейишлари мумкин.

Аммо танқидчилари "сайлаб қўйилмаган давлат раҳбари эшитилиши шарт эмас, кўриниш берса кифоя", деб ҳисоблашади.мкин.

6 июн куни Иккинчи жаҳон урушида иттифоқчи қўшинларнинг Нормандияга ташланишининг навбатдаги санаси нишонланади.

Франциядаги тантанали маросимда Президент Путин ва шаҳзода Чарлзнинг учрашуви белгиланган.

Ҳозирда кузатувчилар бераётган савол: бу учрашув бўлиб ўтармикан, агар ўтса, қандай оҳангда?.

Би-би-си Ўзбек хизмати билан Whatsapp орқали боғланишни истасангиз, телефонимиз: +44 7858 860002