"Илк бор қуш тумови одамдан одамга юққан"
Тадқиқотчиларга кўра, қуш тумови вируси инсондан инсонга юққани ҳолати илк бор Хитойда аниқланган.
British Medical Journal хабар қилишича, вирусни юқтирган отасини парваришлаган 32 ёшли аёл отасидан қуш тумовини юқтирган ва иккови ҳам вафот этган.
Шу пайтгача H7N9 вируси фақат паррандалар ёнида бўлган инсонга паррандалардан юққан, бироқ бу вируснинг бир инсондан иккинчисига ўтганининг исботи бўлмаган эди.
Бироқ экспертларга кўра, сўнгги ҳолат қуш тумови вируси бир инсондан иккинчи инсонга осонлик билан ўтиш қобилиятини ишлаб чиқиш даражасига етганини англатмайди.
Шу йилнинг 30 июнигача Хитой шарқида 133 кишининг H7N9 вирусини юқтиргани аниқланган.
Шулардан 43 нафари оламдан ўтган.
Бу одамларнинг аксари вирус юқтиргани аниқланганидан бир ёки икки хафта илгари тирик парранда бозорларида бўлишган ёки паррандалар билан яқин алоқада бўлганлар.
Тадқиқотчилар аниқлашича, шу йилнинг март ойида 60 ёшли киши қуш тумовини юқтириб шифохонага ётқизилган, унга 32 ёшли қиши қараган.
Отаси касал бўлишидан бир ҳафта илгари парранда бозорида бўлган.
Қизи паррандалар яқинида бўлмаган, аммо отаси билан охирги марта контакт қилганидан олти кун ўтиб касалланган.
Иккаласида ҳам бир неча органлари ишламай қолиши кузатилган, сўнг шифохонанинг интенсив даволаш бўлимига ётқизилганлар.
Даволанишларга қарамасдан уларнинг ҳаётларини сақлаб қолишнинг иложи бўлмаган.
Икки мижоздан олинган вирус нусхалари генетик бир хил бўлган.
Бу нарса аёл организмидаги вирус манбаси бошқа эмас, айнан отасидаги вирус экани ҳақидаги назарияни тасдиқлайди.
Шифокорлар бу турдаги беморлар билан яқин алоқада бўлган 43 кишини текширганлар, бироқ текширувлар натижаларининг ҳаммаси H7N9 вирусига салбий чиққан.
Бу эса вируснинг тарқалиш қобилияти чекланганини намоён этади.
Тадқиқотчилар вируснинг бир инсондан иккинчисига осонлик билан ўтишини тасдиқловчи исбот ҳозирча йўқ дейдилар, ушбу ҳолат қуш тумовининг одамдан одамга "эҳтимолий юқиши"нинг биринчиси эканини айтмоқдалар.
Тадқиқотчилар ўзларининг сўнгги топилдиқлари қуш тумови пандемик тарқалиш хусусиятига эга экани борасидаги хавотирли тўхтамга келганларини айтадилар.
Лондон Гигиена ва Тропик тиббиёт мактабидан профессор Жеймс Рудж айтишича, қуш тумовининг бир инсондан иккинчисига, ундан эса учинчи шахсга ва янада кўп одамга юқиши хавотир уйғотади, дейди.
Шундай бўлган тақдирда ҳам бир инсондан ортиқ кишининг вирусни юқтириши "биз эпидемиянинг дастлабки босқичида турган бўлишимиз мумкинлигининг кучли белгиси", деб айтган профессор Жеймс Рудж.
