Туркиядаги тартибсизликлар чоғи 1000 га яқин одам ҳибсга олинган
Туркия Ички ишлар вазири Муаммар Гулернинг айтишича, Истанбул ва бошқа шаҳарлардаги икки кунлик аксилҳукумат чиқишлари пайти 900 дан ортиқ одам ҳибсга олинган.
Мухбирларга кўра, ушбу намойишлар охирги йилларда Туркияда юз берган энг йирик ҳукуматга қарши намойишлар бўлган.
Норозилик намойишларига Истанбул шаҳридаги Гези истироҳат боғи ўрнида савдо ва дам олиш мажмуаси барпо этиш режаси сабаб бўлган.
Гези парки олдидаги Таксим хиёбонини намойишчилар эгаллаб олган эдилар, мухбирларнинг хабар қилишича, якшанба тонгига келиб полиция хиёбонни намойишчилардан тозалаган.
Шанбадан-якшанбага ўтар кечаси ва эрталаб полиция Истанбулнинг айрим жойларида намойишчиларга қарши кўздан ёш сиздирадиган газ қўллагани ҳақидаги хабарлар олинган.
Вазият тинчигани кузатилган.
Ички ишлар вазирига кўра, полиция билан намойишчилар тўқнашуви оқибатида 26 полиция ходими, 53 тинч фуқаро жароҳатланган.
Истанбул шифохонасидаги бир кишининг аҳволи оғир экани хабар қилинмоқда.
Ҳибсга олинганларнинг айримлари аллақачон қўйиб юборилганлар.
Бошқалар устидан маҳкама бўлишини хабар қилган ички ишлар вазири.
Би-би-сининг Истанбулдаги мухбири Жеймс Рейнолдс хабар қилишича, қаттиқ ёғингарчилик ҳам намойишчиларни уй-уйларига тарқашга ундаган.
Ички ишлар вазири Муаммар Гулер айтишича, мамлакатнинг 48 шаҳрида норозиликлар кузатилган.
Шанба куни Туркия Бош вазири Ражаб Тойиб Эрдўғон норозилик намойишлари зудлик билан тўхтатишга чақирган.
Жаноб Эрдўғон полициянинг намойишчиларни тарқатиш пайтида "айрим хатоларга йўл қўйилгани, полициянинг жавобида экстремизм" бўлганини тан олган.
Бироқ жаноб Эрдўғон ўз мухолифларини Гези истироҳат боғи масаласидан вазиятни таранглаштириш мақсадида фойдаланганликда айблаган.
Намойишларга қарамасдан Туркия бош вазири қайта қуриш режасидан қайтилмаслигини билдирган.
Би-би-си мухбирига кўра, ёш намойишчилар жорий ҳукуматни авторитар бошқарувда ва Туркияни исломлаштираётганликда айблаганлар.
Бош вазир Ражаб Тойиб Эрдўғон 2002 йилдан буён Туркияни бошқармоқда.
Би-би-си мухбирига кўра, у мамлакат конституциясини ўзгартириб, яна кўпроқ муддат қудратда қолиш истагини билдирган.
Жаноб Эрдўғоннинг Адолат ва Тикланиш партияси исломий илдизларга эга партия ҳисобланади, бироқ партия Туркиянинг дунёвий тизимига содиқ қолишини айтиб келади.
