Депардье 'қасоскор чечен отаси ролини ўйнайди'
Хабарларга кўра, француз режиссёри Филипп Мартинес томонидан суратга олинажак фильм ўғлининг ўлими учун қасос олмоқчи бўлган чечен отаси ҳақида бўлади.
АҚШ Миллий Жамоатчилик радиоси(NPR)нинг хабар беришича, фильмда Жерар Депардьедан ташқари британиялик машҳур модель ва актриса Элизабет Ҳёрли ҳам суратга тушади.
Шу йил бошида шахсан президент Владимир Путиннинг ўзи таниқли француз актёрига Россия фуқаролигини берганди.
Бунинг ортидан эса, Чеченистон раҳбари Рамзан Қодиров Жерар Депардьега пойтахт Грознийнинг қоқ марказидан беш хонали ҳашаматли квартира совға қилганди.
Янги фильмнинг Москва ва Грознийда тасвирга олиниши айтилмоқда.
Россия ахборот агентликлари тарқатган хабарларга кўра, суратга олиш ишлари шу кунларда бошланиши мумкин.
Аммо "Феруза" Жерар Депардье иштирокида Чеченистон ҳақида олинаётган иккита фильмнинг биринчиси бўлиши айтилмоқда.
Хабарлардан маълум бўлишича, таниқли француз актёри иштирокидаги яна бир фильм икки чечен уруши оқибатида вайрон бўлган Грознийни қайта тиклаш ишларига бағишланади.
Аввалроқ Жерар Депардье Чеченистон Президенти Рамзан Қодировнинг марҳум отаси ролини ўйнашига оид хабарлар ҳам тарқалганди.
Аммо, Америка радиосига кўра, чечен раҳбарининг матбуот котиби буни рад этган ва Жерар Депардье янги фильмга оид режалари билан келаси ҳафта Грознийда уюштирилажак матбуот анжумани чоғида ўртоқлашишини айтган.
Ўтган йил охирларида Ўзбекистон интернет нашрлари ҳам Жерар Депардьенинг тез орада суратга олиниши мўлжалланган фильмга таклиф қилингани ҳақида ёзишганди.
Хабарларда фильм сценарийси Аброр Ҳакимов ва президент Ислом Каримовнинг тўнғич қизи Гулнора Каримовага тегишли экани айтилганди.
Фильм воқеалари тарихий 5-6 асрларга талуқли бўлиб, Жерар Депардье оврўполик руҳоний образини яратиши кутилмоқда.
Депардье ва Чеченистон
Шу йил феврал ойида пойтахт Грознийга шахсан ташриф буюрган жаноб Депардье Чеченистон ўзига ниҳоятда ёққанини айтганди.
Француз актёри бу ернинг одамлари хайрихоҳ, очиқ эканликларини алоҳида таъкидлаб ўтганди.
Жерар Депардьени аэропортда шахсан Рамзан Қодировнинг ўзи қарши олган ва шарафига дабдабали зиёфат ҳам уюштирганди.
Француз актёри ўша пайтнинг ўзида Чеченистон ҳақида фильм ишлаш истагида эканини айтган ва маҳаллий кинематографлар билан ҳам учрашганди.
Рамзан Қодиров аввалроқ француз актёрига ўз юртларига келиб яшашни таклиф этган ва "буюк маданият арбоби учун лозим бўлган барча шарт-шароитларни яратиб беришга" ваъда қилганди.
Аммо беш хонали уй ва Чеченистоннинг фахрий фуқароси бўлиб олганига қарамай, жаноб Депардье Мордовияда рўйхатдан ўтишни афзал билганди.
Юлдузлар
Бу - жаҳон миқёсида таниқли бўлган юлдузларнинг Чеченистонга илк ташрифлари эмас.
2011 йили президент Рамзан Қодировнинг туғилган куни билан бир вақтга тўғри келган Шаҳар куни тантаналарида британиялик таниқли скрипкачи Ванесса Мэй, бельгиялик машҳур актёр Жан-Клод Ван Дамм, таниқли инглиз қўшиқчиси Сил (Seal) ва америкалик актриса Ҳиллари Суонклар ҳам иштирок этишганди.
Байрам муносабати берилган концертда Ван Дамм Рамзан Қодировни яхши кўриши ва Чеченистонда амалга оширилган ишлардан ҳайратга тушганлигини очиқчасига изҳор этганди.
Ҳиллари Суонк эса, "ўзининг инсон ҳуқуқларини сақлаш йўлида олиб бораётган фаолиятига соя ташлагани"ни айтиб, кейинчалик Грознийга қилган сафаридан пушаймон эканини айтиб чиққанди.
Юлдузларни Чеченистонга бориш ниятидан қайтариш учун, ҳатто, "Хьюман Райтс Вотч" ҳалқаро инсон ҳуқуқларини сақлаш ташкилоти уларга очиқ хат билан ҳам чиққанди.
Халқаро ташкилот мактубида уларнинг президент Рамзан Қодиров уюштирган кечада иштирок этишлари "авторитар бошқарувини кўз-кўз қилиш" сифатида қабул қилиниши билан ҳам огоҳлантирганди.
35 яшар Рамзан Қодиров Чеченистонни 2007 йилдан буён бошқариб келади. Фаоллар чечен ҳукуматини Чеченистонни исломийлаштириш ва эркинликларни бўғишда айблаб келишади.
