Алеппо турмаси атрофида Сурия қўшинлари ва исёнчилар тўқнашди

Сурия шимолидаги Алеппо шаҳрида жойлашган турма атрофида ҳукумат қўшинлари ва исёнчилар тўқнашганлар.

Хабарларга кўра, исёнчи жангчилар 4,000 нафарча маҳбус сақланаётган қамоқ деворларини портлатишга уринганлар.

Фаоллар билдиришича, ҳукумат қўшинлари танклар ва тикучарлар ёрдамида жавоб қайтарганлар.

Айни дамда, исёнчи Озод Сурия армияси ўлган аскарнинг ички органларини исёнчи қўмондон тишлаётгани пайдо бўлган видеога масъулларни жазолашини айтган.

Алеппода, фаолларга кўра, исёнчилар турма деворлари ташқарисида машинага ўрнатилган бомбаларни портлатишга уринганлар.

Ҳукумат қўшинлари уларга ҳужум қилиб, бир неча мухолифат аъзоларини ўлдирганлар.

Дамашқдаги Би-би-си муҳбирига кўра, чоршанба куни тушдан кейин ҳам тўқнашувлар давом этган.

Интернет йўқ

Озод Сурия армияси ўз қўмондонларига интернет орқали тарқатилган видео бўйича зудлик билан тергов олиб боришларини буюрганини айтиб баёнот чиқарган.

Видеода гўёки Ҳомслик таниқли исёнчи Абу Саккар ўлик аскарнинг юрагини кесиб олгани намоён бўлади.

"Агар у Озод Сурия армиясига алоқадор киши экани аниқланса, қаттиқ жазоланади", - дейилади баёнотда.

Мустақил манбалардан тасдиқлашнинг имкони бўлмаган видеода Абу Саккар аскарнинг жасади устида туриб, "Онт ичаман, ит Башарнинг аскарлари, сизнинг юракларингизни ва жигарларингизни еймиз", - деб айтгани кўринади.

АҚШда жойлашган Human Rights Watch Абу Саккарнинг амаллари уруш жинояти эканини айтган.

Шунингдек, чоршанба куни АҚШда жойлашган интернет мониторинг ширкати Сурияда охирги олти ойнинг ичида учинчи марта интернетга киришнинг имкони бўлмаётганини билдирган.

Ренесис Корпорацияси Сурия интернет хизматлари маҳаллий вақт билан соат 10:00да ўчиб қолганларини айтди.

БМТга кўра, 2011 йил мартида Башар ал Ассадга қарши ғалаёнлар бошланганидан бери 80 минг одам ҳалок бўлган ва миллионлаб сурияликлар уйларидан қочишга мажбур бўлганлар.