Зепп Блаттер футбол бўйича жаҳон чемпионати жойини танлаш тартибини ўзгартирмоқчи
Сурат манбаси, Reuters
Жаҳон Футбол федерацияси ассоциацияси президентлик сайловини ортга суриш чақириқларини рад этганидан кейин ўтказилган овоз беришда Зепп Блаттер яна ФИФА президенти этиб сайланиши кутилмоқда.
ФИФА раҳбарияти ичида қолган можаро туфайли ташкилот президентлигига номзодлардан фақат жаноб Блаттернинг ўзи қолган.
Бу Зепп Блаттернинг тўртинчи марта лавозимига сайланиши бўлади.
ФИФА номига янграган коррупция айбловлари ортидан Англия ва Шотландия футбол ассоциациялари 1 июнга мўлжалланган президентлик сайловини қолдиришни сўраб мурожаат этган, бироқ ФИФАнинг йиллик конгрессида қатнашган 206 иштирокчидан 172 таси сайловни ортга қолдириш таклифига қарши чиққанлар.
Англия фтубол бирлашмаси ғоясини 17 мамлакат қўллаб-қувватлаган.
Жаҳон футбол ташкилотининг йиллик анжуманида гапирган Зепп Блаттер сўзларига кўра, ФИФА оғир аҳволга тушиб қолган ва ўзининг обрўсини тиклаш учун қўлидан келган ҳаммани нарсани қилиши керак.
"Мен бу кеманинг капитани сифатида уни тўғри йўналишга солиш учун ҳаммани нарсани қилишим керак. Бу менинг вазифам ва масъулиятим", деб айтган ФИФА раҳбари.
Агар ФИФА президенти этиб сайланадиган бўлса, ташкилотда ислоҳот ясашга ваъда берган 75 яшар швейцариялик Блаттер.
У футбол бўйича жаҳон чемпионати ўйинлари ўтказиладиган мамлакатни сайлаш жараёнига ўзгартириш киритишга ваъда берган.
Зепп Блаттер фикрича, бундан кейин жаҳон чемпионати жойини ФИФАнинг 24 аъзодан иборат ижроия қўмитаси эмас, Жаҳон футбол федерацияси ассоциацияси конгрессига йиғилган 208 мамлакат вакили сайлаши керак.
"Мен миллий ассоциацияларга кўпроқ ваколат бермоқчиман. Келажакда жаҳон чемпионати хўжайинлари ФИФА конгресси томонидан аниқланади. Ижроия қўмита тушган аризалардан рўйхат тузади, аммо ҳеч қандай тавсия бермайди", деб айтган Зепп Блаттер ўзининг маърузасида.
