Гулнора Каримова "олган пуллар" алоқа хизматлари қимматлигининг сабабими?
Сурат манбаси, Getty
Халқаро мобил алоқа ширкатлари Ўзбекистонда тез суръатлар билан ривожланаётган бозорга сармоя ётқизиш имкониятига эга бўлганларида, аслида президент қизининг чегарасиз молиявий амбицияларини қондиришлари кераклигидан хабардормидилар?
Айни пайтда Швеция-Финландиянинг TeliaSonera ва Россиянинг "Вымпелком" ширкатлари Ўзбекистонда фаолият олиб боришлари учун Ўзбекистон Президентининг тўнғич қизи Гулнора Каримовага катта миқдорда пора берганлари тўғрисида текширувлар давом этмоқда.
Ўз таркибида дунёнинг кўпгина мамлакатларидаги журналистик тергов ташкилотларини уюштирувчи "Уюшган жиноятчилик ва Коррупцияни ўрганиш лойиҳаси" (OCCRP) қўлга киритган янги маълумотлар Гулнора Каримованинг коррупцион амаллари илгари келтирилган ҳисоблардан анча кенг эканини ошкор қилади.
Ташкилотдаги молиявий ҳужжатлар Каримова хоним ўзи алоқадор бўлган халқаро телекоммуникация ширкатларидан 1 млрд доллардан ортиқ тўлов олганини кўрсатади.
Айни пайтда аҳолисининг аксарияти камбағал бўлган мамлакатда мобил алоқа фойдаланувчиларининг нисбий сони дунёда энг юқориларни ташкил этади.
Халқаро ташкилотда Каримова хоним камида олти халқаро телекоммуникация ширкатлари, жумладан уч Америка компаниясига Wi-Fi ва WiMAX хизматларини олиб бориш имконияти учун ўз шартларига кўндиргани ҳақида маълумотлар бор.
Гулноранинг адоқсиз режалари Ўзбекистон аҳолисининг пуллари эвазига амалга ошган. Бу пуллар одамларга нафақа тўлаш, соғлиқни сақлашлари учун ишлатилиши мумкин эди, бироқ улар офшор йўллар орқали банкларга юборилган, шунингдек, бутун дунёдан кўчмас мулклар, хусусан Франсадаги қалъа ва Ҳонгонгдаги пентхаузни сотиб олишга сарфланган, - дейилади ҳисоботда.
Унда айтилишича, ҳатто айтилаётган 1 млрд доллар ҳам тахмин қилинаётган порахўрлик ва товламачиликнинг миқёсини белгилай олмаса керак. Чунки унинг бизнесидаги кўп мулклар ҳали озод қилинмаган.
Айни пайтда, у билан алоқада бўлган халқаро ширкатлар ўзларининг айбсизлигини таъкидлаб, ўзлари бераётган маблағлар пора эканини билмаганларини айтишмоқда.
Кўп йиллар давомида Гулнора Каримова Ўзбекистондаги маросимларнинг олди бўлиб келди. Бироқ энди отасининг ғазабига дучор бўлиб, уй қамоғида сақланаётгани айтилади. Ўзбекистон ҳуқуқ-тартибот идоралари уни уюшган жиноий гуруҳларга алоқадорликда давлат хазинасидан, жумладан Uzbekistan Airways, Coca Cola, нефтни қайта ишлаш корхоналаридан товламачилик, шантаж ва таҳдидлар билан 53 млн доллар маблағни ўзлаштирганликда айблашган. Ўшандан буён унга тегишли ташкилотлар ёпилган ва бир неча яқин шериклари ҳибсга олиниб, бир неча йилга қамалган.
АҚШда таълим олган, ўзидан поп юлдуз, модельер, таниқли инсон, дипломат ва тадбиркор ясаган Гулнора Каримованинг асл маҳорати унинг шафқатсиз сиёсий коррупция брендига эга эканлигидир, деб қайд этади ташкилот.
Ҳужжатларга кўра, TeliaSonera Гулнора Каримовага 381 млн тўлаган ва қўшимча 75 млн доллар ваъда қилган. Ўзбекистон бозоридаги бошқа ширкатлар ҳам шу қатори маблағлар тўлашганлиги таъкидланади. Каримова хоним шунингдек АҚШнинг икки ширкатидан Ўзбекистонда фаолият юритишлари учун йирик миқдорда пул олгани келтирилади, Уюшган жиноятчилик ва Коррупцияни ўрганиш лойиҳаси маълумотларида.
Шунга қарамай, Ўзбекистонда интернет ва мобил алоқа хизматлари собиқ Шўро давлатлари орасида энг қимматларидан бири бўлиб қолмоқда. Айрим ҳолатларда Ўзбекистонда интернет хизмати ўнлаб баробар қимматроқдир.
Аксарият интернет фойдаланувчилари хизмат кўрсатиш сифатининг ўта абгорлигидан шикоят қилишади.
Би-би-си Ўзбек хизмати билан Whatsapp орқали боғланишни истасангиз, телефонимиз: +44 78-58-86-00-02
