Руслан Чагаев яна жаҳон чемпиони

Профессионал бокснинг WBA таснифида энг оғир вазн тоифасида собиқ жаҳон чемпиони бунга пуэрто-риколик рақиби Фрес Окендони енгиб, муваффақ бўлди.

Якшанба куни Чеченистон пойтахти Грознийдаги “Аҳмат Арена”да бўлиб ўтган жанг тўлиқ 12 раунд давом этди ва 115-113, 115-113 ва 114-114 ҳисоби билан Русланнинг фойдасига ҳал бўлди.

Сўнгги ғалабаси ортидан Руслан Чагаев профессионал боксда ўз вазн тоифасида икки карра жаҳон чемпионига айланди.

Руслан 2007 йилда россиялик боксчи Николай Валуевни енгиб, профессионал карьерасида илк бор жаҳон чемпионлигини қўлга киритганди.

У сўнгги бор 2011 йилда жаҳон чемпионлиги камари учун рингга чиққан, аммо жангини бошқа бир россиялик боксчи Александр Поветкинга бой берганди.

Асли ўзбекистонлик номдор боксчи шундан сўнг орада ўтказган барча рейтинг жангларини ғалаба билан якунлаганди.

Грознийдаги жанг

Руслан Чагаев ва Фрес Окендолар ўртасидаги жанг Грознийда уюштирилган ҳашаматли бокс кечасининг энг қиёмига етган нуқтаси бўлди.

Икковлонгача турли вазн тоифаларида Чеченистон, Украина, Олмония, Босния ва кубалик боксчилар WBC таснифида International Silver камари учун рингга чиқишди.

Жимжимадор нақшлар солинган оппоқ рангдаги ҳашаматли ринг “Аҳмат Арена” стадионининг қоқ марказида тикланган ва кўплаб замонавий чироқлар ёрдамида кундек ёритилганди.

Икки рақиб ўртасидаги жанг эса, маҳаллий вақт билан тунги 23:00 ларга тўғри келганди.

Чеченистон Президенти Рамзан Қодиров айнан бокс кечасининг якуний жангги арафасида аренадаги 30.000 томошабин сафига келиб қўшилган ва уларнинг орасида Эвандер Холифилд, Марко Хук, Девид Ҳэй ва Султон Ибрагимов каби номдор боксчилар ҳам кўзга ташланарди.

Профессионал бокснинг энг оғир вазн тоифасида жаҳон чемпионлиги учун жангни айнан Рамзан Қодировнинг ўзи очиб бераркан, унда Руслан Чагаевнинг ғалаба қозонишига ишончи комиллигини айтди.

Буёғи қандай кечди?

Икки рақибни эса, томошабинларга кимсан бокс оламининг энг машҳур конферансьеларидан бири америкалик Майкл Баффернинг ўзи таништирди.

Таблода Россия байроғи ёниб, мадҳияси янгради.

Майкл Баффер рингда Руслан Чагаевни ўзбекистонлик боксчи, дея тақдим этаркан, лабида кулгу билан “чечен халқининг ўғлони”, дея томошабинлар билан енгилгина кулишиб ҳам олди.

Ўз ўрнида эслатиб ўтиш жоиз, 2012 йилдан буён ўз жангларини эркин агент мақомида ўтказиб келаётган Руслан Чагаев ўтган йилдан буён Чеченистондаги Аҳмат Ҳожи Қодиров номли бокс клубини намоён этиб келади.

Бу клуб чечен раҳбарининг ташаббуси ва қарори билан ўтган йил охирларида жаҳон, Оврўпо, Россия чемпионлари дохил дунё миқёсидаги спортчиларни тайёрлаб келган “Рамзан” клуби ўрнига ташкил этилган ва марҳум отасининг номи билан аталган.

Жангнинг якуний раундлари орасидаги танаффусда шахсан чечен президентининг ўзи Руслан ўтирган бурчакка бориб, унга маслаҳат бераётгани ҳам телевизион камералар нигоҳидан четда қолмади.

Ғолиб эълон этилиши ортидан жаноб Қодиров асли ўзбекистонлик боксчини даст кўтариб, рингни бир айлантириб ҳам олди.

Чагаевлар жамлоғи эса, рингнинг ўзида Рамзан Қодировга ўзбекча зарбоф тўн ва салла кийдиришди.

Бунинг ортидан рингнинг ўзида сўз олган Руслан Чагаев Ўзбекистон дохил дунёнинг қай бир нуқтасида бўлмасин, ўзига ишқибозлик қилган барчага раҳмат айтди.

Ғолибларни Грознийдаги бокс кечасининг номдор хорижлик меҳмонлари ҳам рингнинг ўзига чиқиб, бағирларига босганча қутлашди.

Чеченистон давлат оммавий-ахборот воситалари хабарларига кўра, Грознийдаги бокс кечаси томошабинлар учун текинга уюштирилган ва улар учун ифторлик ҳам ўша ернинг ўзида ташкил қилинган.

Расмий хабарларга кўра, Грознийдаги жанг дунёнинг 75 давлатига олиб узатилган.

Ҳашаматли бокс кечасининг ўзи эса, мушакбозликлар билан ўз ниҳоясига етди.

Руслан Чагаев аввалроқ Би-би-си Ўзбек Хизмати билан суҳбатида кейинги жангида жаҳон чемпионлиги камарини қўлга киритса, ўзининг собиқ рақиби WBA таснифида энг оғир вазн тоифасида суперчемпион бўлган украиналик донгдор боксчи Владимир Кличко билан жанг ўтказишни кўзлаётганини айтганди.

Би-би-си Ўзбек хизмати билан Whatsapp орқали боғланишни истасангиз, телефонимиз: +44 78-58-86-00-02