Ўзбекистон билан Россия сармояларни муҳофаза қилишга келишмоқчи
Ўзбекистон Президенти Ислом Каримов Россияга йўл олган.
15 апрел куни Россия ва Ўзбекистон ҳукуматлари ҳайъатлари музокаралари мўлжалланган.
Ўзбекистон оммавий ахборот воситалари хабар қилишича, Россия билан Ўзбекистон иқтисодий ҳамкорликни кучайтирмоқчи, шу мақсадда 2017 йилгача бўлган даврни ўзи ичига олган Иқтисодий ҳамкорлик дастурини имзолаш режаланган.
Шунингдек, Россия Президенти Владимир Путин ўтган йили июн ойида Тошкентга борган пайти имзоланган Ўзбекистон билан Россия ўртасидаги стратегик шерикликни чуқурлаштириш декларациясини ҳаётга тадбиқ этишни кўзда тутган ҳужжатлар ҳам муҳокама этилиши айтилмоқда.
Хабар қилинишича, икки мамлакат ўртасида сармояларни рағбатлантириш ва ўзаро ҳимоя қилиш мақсадини кўзлаган шартнома ҳам кун тартибига киритилган.
Бундай ҳужжат Россиянинг МТС ширкати Ўзбекистонда дуч келган можаро ортидан муҳокамага киритилган.
Мобил алоқа ширкати масаласи Россия ва Ўзбекистон Ташқи ишлар вазирлари даражасидаги муҳокамаларга ҳам сабаб бўлган эди.
Ўзбекистон расмий идоралари Россиянинг йирик мобил алоқа ширкати МТСнинг Ўзбекистондаги шўъба корхонаси "МТС-Ўздунробита"ни йирик солиқ тўловларини яшириш, пул ювиш, мижозлар пулларини ноқонуний ўзлаштириш кабиларда айблаган.
Ўзбекистонда ушбу ноқонуний амаллар тепасида турган деб кўрилаётган "Ўздунробита"нинг раҳбари Беҳзод Аҳмедовнинг мамлакатдан қочгани хабар қилинган.
Президент Ислом Каримовнинг тўнғич қизи Гулнора Каримова Беҳзод Аҳмедовни ўзига яқин эканлигини суистеъмол қилганликда айблаган.
Айбловлар ортидан МТСнинг Ўзбекистондаги 9,5 миллион мижози бир кунда мобил алоқасиз қолган.
Ўзбекистон мобил алоқа бозорида 2004 йилдан буён ишлаб келган МТСнинг лицензияси йўл қўйилган ноқонуний ҳаракатлари туфайли дея, ўтган йилнинг июл ойида дастлаб 10 кунга, кейинчалик 3 ойга тўхтатилган.
Август ойининг бошида МТСнинг Ўзбекистонда иш юритиш учун берилган лицензияси бутунлай бекор қилинган эди.
Россиянинг мобил алоқа ширкати "Ўздунробита"га нисбатан илгари сурилган айбловларни рад этди, Ўзбекистондаги қудратли кучларни мўмай даромад келтирадиган бизнесларини тортиб олишга уринишда айблади.
МТС раҳбарлари Ўзбекистондаги бизнес муҳитини заҳарли деб аташди, ширкат Ўзбекистондаги воқеалар туфайли ўзининг соф даромадининг 1 миллиард 80 минг АҚШ долларидан воз кечишига тўғри келганини хабар қилган.
Ўзбекистондаги маҳкама "Ўздунробита"ни банкрот деб эълон қилди.
Ўзбекистон бизнес юритиш учун қулай бўлмаган мамлакат сифатида бошқа хорижий ширкатлар, бизнесменлар томонидан ҳам эътироф этилган.
Сўнгги ҳодисада Россиянинг йўловчи ташиш билан шуғулланадиган авиаширкатлари ўзларининг Ўзбекистон сўмидаги даромадларини конвертация қилишда муаммоларга дуч келишганидан шикоят қилишган.
