'Товуқ гўштини ювманг, касаллик тарқатасиз'
Олимларнинг огоҳлантиришларича, хом товуқ гўштини тайёрлашдан аввал ювиш овқатдан заҳарланиш эҳтимолини ошириши мумкин.
Британияда Интернет орқали ўтказилган омма фикрини ўрганиш сўрови натижаларига кўра, 44 фоиз сўралганлар товуқ гўштини пиширишдан аввал ювар эканлар.
Айтилишича, товуқ гўштини ювиш кампилобактериянинг тарқаб кетишига олиб келади.
Ушбу бактерия келтириб чиқарувчи касаликка йилига Буюк Британияда 280 мингга яқин киши чалинар экан.
Лекин сўровда қатнашганлардан фақатгина 28 фоизи бу бактерия ҳақида эшитганлари, ва тахминан шунча фоиз одам унинг манбаи товуқ гўшти эканлигини билишларини айтишган.
Товуқ гўштини ювиш сабаби эса кўплар учун очиқ-ойдиндек - ифлос ва турли бактериялардан тозалаш.
Лекин айнан ювиш билан товуқ гўштидаги кампилобактерия ишлатилган идишга, сув томчилари орқали стол, уст-бош ва қўлга тарқалишига имкон яралар экан.
Кампилобактерия билан заҳарланганлар ич кетиш, қорин оғриғи, иситма ва ҳолдан тойиш каби ҳолатларни бошдан кечирадилар.
Баъзида бу ҳолат бир неча кун давом этади. Оғир ҳолатларда эса сурункали ичак ва ошқозон касалликлари, шунингдек асаб тизими касалликларига сабаб бўлиши мумкин.
Ҳозирда товуқ гўштини тайёрлаш жараёни бўйича берилаётган маслаҳат қуйидагича:
1. Хом товуқ гўштининг устини ёпиб, музлатгичда сақланг.2. Товуқ гўштидан оқиб чиққан сув бошқа маҳсулотларга тушишининг олдини олиш учун музлатгичнинг энг пастки қаторида сақланг.3. Тайёрлашдан аввал ювманг.4. Хом гўштни сақлаш ва кесиш учун ишлатилган идиш, пичоқ ва тахтачани обдон ювиб ташланг.5. Гўштни ҳам обдон, яхшилаб пиширинг, биронта пушти рангдаги қисми қолмасин.
Кампилобактерия ўлим ҳолатига олиб келиши ҳам мумкин.
Британия озиқ-овқат стандартлари агентлиги раҳбари Кетрин Брауннинг айтишича, кўплар хом товуқ гўштидан кейин қўл ва идишларни ювиш кераклигини яхши биладилар, лекин шу билан бирга товуқ гўштини ўзини ҳам ювиш жуда кенг тарқалганлиги маълум бўлган.
"Шунинг учун биз одамларни товуқ гўштини ювмасликка даъват қилмоқдамиз. Кампилобактерия бу жиддий муаммо. У касаллик ва ўлимга олиб келишидан ташқари, мамлакат иқтисодига миллионлаб фунт зарар етказади".
Би-би-си Ўзбек хизмати билан Whatsapp орқали боғланишни истасангиз, телефонимиз: +44 7858 860002.
