ٹرمپ کا میکسیکو کی سرحد پر دیوار تعمیر کرنے کا دفاع
،تصویر کا ذریعہAFP
امریکہ کی رپبلکن پارٹی کے صدارتی امیدوار ڈونلڈ ٹرمپ نے میکسیکو کے دورے کے دوران صدر انرقی پینا نیٹو کے ساتھ ملاقات میں میکسیکو کی سرحد پر دیوار تعمیر کرنے کے اپنے موقف کا دفاع کیا ہے۔
ٹرمپ کا کہنا تھا کہ انھوں نے صدر کے ساتھ ملاقات میں دیوار کی تمعیر پر آنے والے اخراجات پر بات نہیں کی۔ تاہم میکسیکو کے رہنما نے بعد میں اس کی تردید کی۔
میکسیکو کے صدر انرقی پینا نیٹو نے ٹویٹ میں کہا ’میں یہ واضح کر دوں کہ ان کا ملک دیوار کی تعمیر پر آنے والے اخـراجات ادا نہیں کرے گا۔‘
یاد رہے کہ ڈونلڈ ٹرمپ نے اپنے مہم کے دوران میکسکیو کے تارکین وطن کو تنقید کا نشانہ بناتے ہوئے کہا تھا کہ وہ دونوں ملکوں کی سرحد پر دیوار بنوائیں گے۔
End of سب سے زیادہ پڑھی جانے والی
ڈونلڈ ٹرمپ نے اپنے دورے کے دوران میکسکیو کے تمام شہریوں کو ’حیران کن‘ اور ’زبردست‘ قرار دیا۔
ٹرمپ نے اس سے پہلے امریکہ میں رہنے والے میکسیکن تارکینِ وطن کو ’قاتل‘ اور ’ریپ‘ کرنے والے کہا تھا۔
انرقی پینا نیٹو نے ڈونلڈ ٹرمپ کے ساتھ میکسکیو سٹی میں مشترکہ نیوز کانفرنس میں کہا ’ٹرمپ کے میکسیکن کے بارے میں گذشتہ کچھ بیانات سے ہمیں تکلیف پہنچی تھی تاہم مجھے یقین ہے کہ اب وہ حقیقی تعلقات قائم کرنا چاہتے ہیں۔‘
ڈونلڈ ٹرمپ اس کے بعد فونکس، ایری زونا جائیں گے جہاں وہ غیر قانونی تارکینِ وطن کے مسائل کے حوالے سے ایک اہم تقریر کریں گے۔
امریکہ کی رپبلکن پارٹی کے صدارتی امیدوار نے کہا کہ میرے انرقی پینا نیٹو کو کہے جانے والے الفاظ مضبوط اور صاف گو ہیں۔
ٹرمپ نے میکسیکن کے بارے میں کیے گئے اپنے گذشتہ تبصرے کی شدت کو کم کرنے کی کوشش کرتے ہوئے کہا کہ امریکہ میں رہنے والے میکسیکن نے امریکہ کی ترقی میں اہم کردار ادا کیا ہے۔
ان کا کہنا تھا ’ میرے دل میں تمام میکسیکن کے لیے بڑی عزت ہے اور وہ حیران کن ہیں۔‘
ٹرمپ کے مطابق انھوں نے امریکہ میں بہت سے میکسیکن کو نوکری دی ہے اور وہ ’زبرست اور مضبوط اقدار کے مالک ہیں۔‘
