دہشتگردی کے خلاف لڑنے کا اختیار دیں: مصری فوج
مصر کی فوج کے سربراہ جنرل عبدالفتح السیسی نے لوگوں سے اپیل کی ہے کہ وہ جمعہ کو سڑکوں پر نکل کر ’دہشت گردی ‘ کے خلاف مظاہرہ کریں۔
جنرل عبدالفتح السیسی نے کہا کہ وہ چاہتے ہیں کہ لوگ فوج کو تشد اور دہشت گردی کے خلاف لڑنے کا اختیار دیں۔
صدر مرسی کے حامی تین جولائی کو فوجی مداخلت کے بعد انہیں اقتدار سے ہٹائے جانے کے خلاف مظاہرے کر رہے ہیں۔
تاہم جنرل عبدالفتح السیسی جو نئی حکومت میں وزیرِ دفاع بھی ہیں،کا کہنا ہے کہ وہ لوگوں میں تشدد نہیں چاہتے بلکہ قومی مصالحت چاہتے ہیں۔
جنرل عبدالفتح السیسی نے فوج کی گریجویشن تقریب میں بات کرتے ہوئے کہا کہ’ میں لوگوں سے اپیل کرتا ہوں کہ وہ آنے والے جمعہ کو باہر نکل کر اپنے ارادے ظاہر کریں اور فوج اور پولیس کو ممکنہ تشدد اور دہشت گردی کے خلاف لڑنے کا اختیار دیں۔‘
انہوں نے فوجی صفوں میں اختلافات کی قیاس آرائیوں کو غلط قرار دیا انہوں نے کہا ’میں خدا کی قسم کھا کر کہتا ہوں کہ مصری فوج متحد ہے‘۔
صدر مرسی کو اقتدار سے بےدخل کرنے میں فوجی مداخلت کا ذکر کرتے ہوئے انہوں نے کہا کہ انہوں نے صدر مرسی سے کہا تھا کہ وہ تمام مصریوں کے صدر بنیں۔
2012 میں صدر مرسی کے الیکشن کو یاد کرتے ہوئے انہوں نے کہا کہ ’میں نے اسلام پسندوں کو مشورہ دیا تھا کہ وہ صدارتی امیدوار نامزد نہ کریں لیکن انہوں نے میرے مشورے کو نظر انداز کر دیا‘۔
End of سب سے زیادہ پڑھی جانے والی
