مناء رانا بی بی سی اردو ڈاٹ کام، لاہور

	پاکستان ان انیس ممالک میں شامل ہے جن سے اولمپک کی مشعل اپنے سفر کے دوران گزرے گی

یہ یقین دہانی کا اظہار پاکستان اولمپک ایسوسی ایشن کے صدر لیفٹیننٹ جنرل ریٹائرڈ عارف حسن نے اسلام آباد میں چینی سفیر کے ہمراہ ایک پریس کانفرنس میں کیا۔

پاکستان اولمپک ایسوسی ایشن کے صدر کا کہنا تھا کہ پاکستان ان انیس ممالک میں شامل ہے جن سے اولمپک کی مشعل اپنے سفر کے دوران گزرے گی اور یہ پاکستان کے لیے ایک اعزاز ہے۔

انہوں نے کہا کہ ہماری کوشش ہو گی کہ ہم اس موقع کو یادگار بنائیں اور دنیا پر یہ واضح کر دیں کہ پاکستان ایک امن پسند ملک ہے۔

اسلام آباد میں اولمپک مشعل کا سفر ساڑھے پانچ کلو میڑ پر محیط ہوگا اور اس دوران مشعل جناح ایوینیو ڈی چوک سے شروع ہو گا اور پارلیمنٹ ہاؤس، پریزیڈینسی، سپریم کورٹ اور دیگر اہم عمارتوں کے سامنے سے گزرتے ہوئے سپورٹس کمپلیکس اسلام آباد تک پہنچے گی اور وہاں لیاقت جمنازیم میں رنگا رنگ اختتامی تقریب منعقد ہوگی۔

لیفٹیننٹ جنرل ریٹائرڈ عارف حسن کا کہنا ہے کہ یہ تقریب بہت شاندار ہو گی۔ اس میں ثقافتی شو بھی ہوگا جس میں چین سے آنے فنکار بھی اپنے فن کا مظاہرہ کریں گے۔ اس تقریب کے بعد مشعل بھارت روانہ ہو جائے گی۔

پاکستان اولمپک ایسوسی ایشن کے صدر کا کہنا تھا کہ یکم اپریل سے ہی پاکستانی عوام کو اولمپک مشعل کی آمد کی اہمیت سے آگاہ کرنے کے لیے ٹی وی اور ریڈیو پر سیمینار اور دیگر پروگرامز کا انعقاد ہوگا اور اس سلسلے میں کراچی اور لاہور میں ثقافتی شوز منعقد کیے جائیں گے۔

اس پریس کانفرنس میں چین کے سفیر بھی موجود تھے انہوں نے امید ظاہر کی کہ پاکستانی حکام اولمپک مشعل کی تقریب بہت احسن طریقے سے کریں گے۔ انہوں نے کہا کہ پاکستانی عوام کو اس تقریب میں بھر پور شرکت کرنی چاہیے۔

یاد رہے کہ بیجنگ اولمپک کے لیے پاکستان کی صرف ہاکی کی ٹیم ہی کوالیفائی کر سکی ہے جبب کہ ایتھلیٹ اور تیراک وائلڈ کارڈ انٹری پر شرکت کریں گے۔