سر راجر بینسٹر ومبلڈن سینٹر کورٹ میں اولمپک مشعل روشن کر رہے ہیں

اس مشعل کو سر راجر بینسٹر نے روشن کیا اور یہ ان تمام شہروں کا دورہ کر رہی ہے جہاں ماضی میں اولمپک مقابلے منعقد کیے جا چکے ہیں۔

برطانیہ کے ٹینس کے کھلاڑی ٹِم ہین مین یہ مشعل اٹھا کر روانہ ہوئے اور انہوں نے آل انگلینڈ کلب سے گزرنے کے بعد مشعل کو ورجینیا ویڈ کے حوالے کیا جنہوں نے انیس سو ستتر میں ومبلڈن ٹینس میں خواتین کے مقابلوں میں فائنل جیتنے کا اعزاز حاصل کیا تھا۔

برطانیہ میں کشتی رانی کے لیجنڈ سر سٹیو ریڈگریو یہ مشعل اٹھائے سفر کا آخری حصہ طے کریں گے اور ’دی مال‘ کے مقام پر مقامی وقت کے مطابق سات بج کر پندرہ منٹ پر اولمپک کا الاؤ روشن کریں گے۔

ٹِم ہین مین کا کہنا ہے کہ ’یہ انتہائی اعزاز کی بات ہے۔ یہ ایک ایسا کام ہے کہ جسے کرنے کا موقع ہی نہیں ملتا۔‘

یہ مشعل ایک سو چالیس مشہور افراد کے ہاتھوں اپنا سفر مکمل کرے گی۔ ان افراد میں ایئن بوتھم، فرینک برونو اور سر رچرڈ برینسن شامل ہیں۔

اولمپک مشعل پیرس سے ہوتی ہوئی لندن کے مقامی وقت کے مطابق صبح آٹھ بجے یہاں پہنچی ہے۔ سن انیس سو اڑتالیس کے بعد یہ مشعل پہلی بار لندن آئی ہے۔