عبدالرشید شکور بی بی سی اردو ڈاٹ کام، کراچی

	ناصر جمشید نے ایک سو بیاسی رنز کی عمدہ اننگز کھیلی

پیٹرنز الیون کی پہلی اننگز کی خاص بات نوجوان بیٹسمین ناصر جمشید کی شاندار سنچری تھی جنہوں نے ڈیفنس کرکٹ اسٹیڈیم کی بیٹنگ وکٹ اور اوسط درجے کی بولنگ کا بھرپور فائدہ اٹھاتے ہوئے کیرئر بیسٹ 182 رنز بنا ڈالے۔ ان کی اننگز میں سولہ چوکے اور سات چھکے شامل تھے۔

انیس سالہ ناصر جمشید سری لنکا میں انڈر19 ورلڈ کپ جیتنے والی پاکستانی ٹیم کے رکن بھی تھے اور اس سیزن میں نوسو سے زائد رنز بنا کر انہوں نے سلیکٹرز کو متاثر کیا ہے۔

پیٹرنز الیون کی اننگز میں ناصر کے علاوہ آفاق رحیم نے بھی نے77 رنز کی عمدہ اننگز کھیلی۔ آفاق رحیم نے ناصر جمشید کے ساتھ دوسری وکٹ کی شراکت میں205 رنز بنائے۔

جب دوسرے دن کا کھیل ختم ہوا تو نعمان اللہ 46 اور فواد عالم 28 رنز پر ناٹ آؤٹ تھے اور میزبان ٹیم کی مجموعی برتری152 رنز کی ہو چکی ہے۔

ادھر زمبابوے کرکٹ کے سربراہ پیٹر چنگوکا نے ڈیفنس کرکٹ اسٹیڈیم میں صحافیوں سے بات کرتے ہوئے کہا کہ وہ اپنی ٹیم کو فراہم کی جانے والی سکیورٹی سے مطمئن ہیں اور ان کی ٹیم کا دورہ جاری رہے گا۔

پاکستان اور زمبابوے کے درمیان پہلا ون ڈے انٹرنیشنل اکیس جنوری کو کراچی میں کھیلا جائےگا۔ بقیہ میچز چوبیس جنوری کو حیدرآباد، ستائیس جنوری کو ملتان، تیس جنوری کو فیصل آباد اور دو فروری کو شیخوپورہ میں کھیلے جائیں گے۔