شعیب بھارت میں کھیلنے کے منتظر ہیں

شعیب اختر نے خبر رساں ایجنسی ای ایف پی سے بات کرتے ہوئے کہا کہ پاکستانی کرکٹ بورڈ سے اجازت ملتے ہی انہوں نے انڈین پریمئیر لیگ کے ساتھ کھیلنے کا معاہدہ کرلیا شعیب کا کہنا تھا کہ ’انڈیا میں کھیلنا میرے لیے اعزاز کی بات ہے‘۔

گزشتہ ہفتے شعیب پر جنوبی افریقہ میں ہونے والے ٹوئنٹی ٹوئنٹی ورلڈ کپ میں اپنے ساتھی کھلاڑی محمد یوسف کو بیٹ سے مارنے کے الزام میں تیرہ بین الاقوامی میچ کھیلنے پر پابندی لگا دی تھی اوراس کے ساتھ چونتیس لاکھ روپے کا جرمانہ عائد کیا گیا ہے۔

شعیب اختر کے خلاف پانچ معاملات میں تادیبی کارروائی کی گئی ہے ۔

جمعہ کو پاکستان کرکٹ بورڈ نے آئی پی ایل کو منظوری دیتے ہوئے اعلان کیا کہ انہوں نے چھ کھلاڑیوں کو اس لیگ میں شامل ہونے کی اجازت دے دی ہے

شعیب کا کہنا ہے کہ وہ بھارت میں کھیلنے کے منتظر ہیں جہاں کرکٹ حکام نے انڈین کرکٹ لیگ کے مقابلے انڈین پریمئیر لیگ قائم کی ہے۔شعیب کا کہنا ہے کہ ان کا مقصد پاکستان کے لیے کھیلنا ہے اور انڈیا میں انہیں جیتنے میں مدد کرنا ہے ۔

شعیب نےانڈین پریمئیر لیگ کے ساتھ اپنے معاہدے کی کوئی تفصیل نہیں بتائی۔آئی پی ایل کو انٹر نیشنل کرکٹ کونسل کی منظوری حاصل ہےجس میں ٹوئنٹی ٹوئنٹی میچ ہوں گےجو آئندہ اپریل میں شروع ہوں گے۔

شعیب کو آئی سی ایل سے پیشکش ہوئی تھی ۔اس پیش کش کو انہوں نے پاکستان کرکٹ بورڈ کے حکام کی اس دھمکی کے بعد مسترد کر دیا تھاکہ جو بھی کھلاڑی حریف لیگ میں شامل ہوگا وہ قومی ٹیم کے لیے نہیں کھیل سکے گا۔

جمعہ کو پاکستان کرکٹ بورڈ نے آئی پی ایل کی منظوری دیتے ہوئے اعلان کیا کہ انہوں نے چھ کھلاڑیوں کو اس لیگ میں شامل ہونے کی اجازت دے دی ہے۔ان کھلاڑیوں میں کھلاڑی کپتان شعیب ملک ، محمد یوسف، انضمام الحق، آل راؤنڈر شاہدآفریدی اور محمد آصف شامل ہیں۔