عبدالرشید شکور بی بی سی اردو ڈاٹ کام، کراچی

	شعیب اختر جنوبی افریقہ کے خلاف جنوری میں میچ وننگ کارکردگی کے بعد سےبین الاقوامی کرکٹ سےدورہیں

شعیب اختر پاکستانی کرکٹ ٹیم کے پہلے موجودہ کرکٹر ہیں جنہوں نے تسلیم کیا ہے کہ انہیں انڈیا کی لیگ کی پیشکش ہوئی ہے۔

سابق کپتان انضمام الحق نے چند روز قبل یہ انکشاف کیا تھا کہ انہیں انڈیا لیگ کھیلنے کی آفر ہوئی ہے اور اگر معاملات طے پاجاتے ہیں تو انہیں وہاں جا کر کھیلنے پر کوئی اعتراض نہ ہوگا۔

شعیب اختر نے میڈیا سے بات کرتے ہوئے کہا کہ انہیں ہونے والی پیشکش پرکشش معاوضے پر مبنی تھی لیکن ان کی پہلی ترجیح ملک کے لیے کھیلنا ہے۔

انہیں پتہ ہے کہ اگر وہ یہ آفر قبول کرتے ہیں تو پھر ملک کی نمائندگی نہیں کرسکتے۔ وہ ملک کے لیے کھیلنا چاہتے ہیں۔ ان کی شناخت ملک سے ہے۔
راولپنڈی ایکسپریس نے کہا کہ وہ آنے والے اہم سیزن میں مکمل فٹ رہ کر پاکستانی ٹیم کی جیت میں اپنا کردار ادا کرنا چاہتے ہیں۔

واضح رہے کہ ٹوئنٹی ٹوئنٹی ورلڈ کپ کے بعد پاکستانی ٹیم کو جنوبی افریقہ، انڈیا اور آسٹریلیا جیسی سخت ٹیموں سے ٹیسٹ اور ون ڈے سیریز کھیلنی ہیں۔

شعیب اختر جنوبی افریقہ کے خلاف اس سال جنوری میں پورٹ الزبتھ ٹیسٹ کی پہلی اننگز میں چار وکٹوں کی میچ وننگ کارکردگی کے بعد سے بین الاقوامی کرکٹ سے دور ہیں اور ٹوئنٹی ٹوئنٹی ورلڈ کپ سے انٹرنیشنل کرکٹ میں واپس آنا چاہتے ہیں۔

وہ ان دنوں قومی کیمپ میں شریک ہیں تاہم شدید گرمی اور گردن میں تکلیف کی شکایت کے سبب وہ کیمپ میں ہونے والے پریکٹس میچوں میں برائے نام ہی حصہ لے سکے ہیں۔