مناء رانا بی بی سی اردو ڈاٹ کام، لاہور

	شعیب اختر کے خلاف جنوبی افریقہ میں محمد آصف کو مارنے کے علاوہ اور بھی الزامات ہیں

ڈسپلنری کمیٹی کے سربراہ پی سی بی کے چیف آپریٹنگ آفیسر شفقت نغمی نے سماعت کے بعد ایک پریس کانفرنس میں بتایا کہ شعیب اختر نے ڈسپلنری کمیٹی کو درخواست کی تھی کہ وہ اپنے وکیل کے ہمراہ پیش ہونا چاہتے ہیں اور کمیٹی نے روایت کے برعکس ان کی اس درخواست کو تسلیم کیا اور شعیب اختر اپنے وکیل بلال منٹو کے ساتھ پیش ہوئے۔

شفقت نغمی کے مطابق شعیب اختر کے خلاف جنوبی افریقہ میں محمد آصف کو بیٹ مارنے کے علاوہ اور بھی الزامات ہیں جن میں جنوبی افریقہ سے واپسی پر بغیر اجازت پریس کانفرنس کرنا، انگلینڈ میں بغیر اجازت میچ کھیلنا اور پی سی بی کی قائم کردہ ڈوپنگ کمیٹی پر تنقید کرنا شامل ہیں۔

شفقت نغمی کے مطابق شعیب اختر کی جانب سے کوڈ آف کنڈکٹ کی اس خلاف ورزی سے کرکٹ اور پاکستان کرکٹ بورڈ کی ساکھ متاثر ہوئی ہے۔

شفقت نغمی کا کہنا تھا کہ ان الزامات کا الگ الگ جائزہ لیا گیا اور ان سے متعلقہ لوگوں کے بیان ریکارڈ کیے گئے۔

تین لاکھ جرمانے کی سزا دوبارہ  شعیب اختر کو تین لاکھ جرمانے کی سزا جو معطل کر دی گئی تھی وہ نئی خلاف ورزی کے سبب دوبارہ لاگو ہو سکتی ہے شفقت نغمی

شفقت نغمی نے اس تاثر کو غلط قرار دیا کہ کراچی ٹیسٹ میں پاکستان کی ٹیم کی شکست کے بعد شعیب اختر کے بارے میں نرم رویہ رکھا جائے گا۔

انہوں نے کہا کہ وہ فیصلہ ضمیر کے مطابق اور واقعات کو دیکھ کر کریں گے تا کہ نہ تو کسی کے ساتھ زیادتی ہو اور نہ کسی کو خاص رعایت دی جائے۔

انہوں نے کہا کہ شعیب اختر کو تین لاکھ جرمانے کی سزا جو معطل کر دی گئی تھی وہ نئی خلاف ورزی کے سبب دوبارہ لاگو ہو سکتی ہے۔

شفقت نغمی نے بتایا کہ عید سے پہلے ہی اس کیس کا فیصلہ سنا دیا جائے گا۔

شاہد آفریدی نے کمیٹی کے سامنے گواہی دینے کے بعد صحافیوں سے غیر رسمی بات چیت میں کہا کہ شعیب اختر نے پریس کانفرنس میں ان پر جو الزامات لگائے تھے انہوں نے رمضان کے تقدس میں ان کو معاف کر دیا ہے اور ان کا دل صاف ہے۔

رمضان کے تقدس می معافی  شعیب اختر نے پریس کانفرنس میں مجھ پر جو الزامات لگائے تھے ان پر میں نے انہیں رمضان کے تقدس میں معاف کر دیا ہے اور اب میرا دل صاف ہے شاہد آفریدی

شاہد آفریدی کے اس بیان پر شفقت نغمی کا کہنا تھا کہ وہ آفریدی سے اس سلسلے میں پوچھ گچھ کریں گے۔