شفیع نقی جامعی بی بی سی اردو ڈاٹ کام، کنگسٹن

	پونٹنگ جانتے ہیں کہ جنوبی افریقی ٹیم میچ کا رخ بدل سکتی ہے

آسٹریلیا اس ورلڈ کپ میں وہ ابھی تک ناقابل شکست ہے۔ رکی پونٹنگ کو اس بات کا بخوبی احساس ہے کہ جنوبی افریقہ کو چاہے وہ گروپ میچ میں ہراچکے ہیں لیکن یہی وہ ٹیم ہے جس نے ان کے چار سو سے زائد رنز کے ہدف کو عبور کرنے کی ہمت پکڑی تھی اور انہونی کو ہونی میں بدل دیا تھا۔

	گریم اسمتھ خطرناک ارادوں کے ساتھ میدان میں اترنے کی تیاری میں ہیں

کیلس کی ابتداء میں سست روی لیکن بعد میں اننگز بنانے کی خوبی ان دنوں ان پر ہونے والی تنقید کی سب سے بڑی وجہ بنی ہوئی ہے لیکن کپتان اسمتھ کیلس کا دفاع کرتے ہیں۔

آسٹریلوی کپتان رکی پونٹنگ بھی کیلس کی سست بیٹنگ کو اپنے گیم پلان میں شامل کرتے ہوئے انہیں اپنے ہدف پر رکھے ہوئے ہیں۔

گریم اسمتھ کو ہرشل گبز سے بڑی توقعات وابستہ ہیں۔

اس بات کا بھی امکان ہے کہ سیمی فائنل میں مکھایا نتینی کی ٹیم میں جگہ نہ بنے لیکن اس کے باوجود جنوبی افریقہ کا بولنگ اٹیک خاصا موثر ہے۔

	بیٹنگ میں ہیڈن کا بیٹ رنز کے ڈھیر لگا رہا ہے

1999 ورلڈ کپ کے سیمی فائنل میں آسٹریلیا کے خلاف ایلن ڈونلڈ کا تاریخی رن آؤٹ سب کو یاد ہے جس نے جنوبی افریقہ کو فائنل کھیلنے سے محروم کردیا اور پھر2003 کے ورلڈ کپ میں بھی سری لنکا کے خلاف میچ ٹائی ہونے کے بعد ڈک ورتھ لوئس قانون کے تحت ایک رن کی شکست نے جنوبی افریقہ کو اسی کے دیس میں سپر سکس میں بھی نہیں پہنچنے دیا تھا لیکن گریم اسمتھ کہتے ہیں یہ ماضی کی باتیں ہیں انہیں وہ بھول چکے ہیں اور اگلے میچ پر نظریں جمائے ہوئے ہیں۔

آسٹریلیا ورلڈ چیمپئن بننے کی ہیٹ ٹرک سے دو میچوں کی دوری پر ہے۔ کچھ لوگوں کا ابھی بھی یہی خیال ہے کہ ہر بڑی ٹیم کا ایک برا دن ضرور آتا ہے اور آسٹریلیا کا اس ورلڈ کپ میں ابھی برا دن نہیں آیا ہے۔