رکی پونٹنگ نے 86 رنز کی عمدہ اننگز کھیلی

آسٹریلیا بمقابلہ انگلینڈ: سکور بورڈ

آسٹریلیا کی جیت تصویروں میں

آسٹریلیا کی جانب سے سب سے زیادہ سکور رکی پونٹنگ نے بنایا۔ انہوں نے 106 گیندوں پر 86 رنز کی عمدہ اننگز کھیلی۔

کلارک 55 اور اینڈریو سمنڈز 28 رنز پر ناٹ آؤٹ رہے۔

اس جیت کی بنیاد اوپنرز ایڈم گلکرسٹ اور میتھیو ہیڈن نے رکھی اور دونوں نے مل کر 57 رنز کی پارٹنر شپ بنائی۔

میتھیو ہیڈن کو 41 کے سکور پر پال کالنگ ووڈ نے بولڈ کیا اور گلکرسٹ 27 رنز بنا کر اینڈریو فلنٹاف کی گیند پر پال کالنگ ووڈ کے ہاتھوں کیچ آؤٹ ہوئے۔

انگلینڈ کی اننگز کی خاص بات کیون پیٹرسن کی سنچری تھی جو انہوں نے چھ چوکوں اور ایک چھکے کی مدد سے مکمل کی۔ وہ بریکن کی گیند پر کلارک کے ہاتھوں کیچ آؤٹ ہوئے۔ اس سے پہلے انہوں نے فروری دو ہزار پانچ میں جنوبی افریقہ کے خلاف سنچری بنائی تھی۔ وہ ایک روزہ میچوں میں بلے بازروں کی عالمی رینکنگ میں سر فہرست ہیں۔

	کیون پیٹرسن نے 104 رنز کی شاندار اننگز کھیلی لیکن انگلینڈ کو پھر بھی شکست کا سامنا کرنا پڑا

بوپارا جنہوں نے سری لنکا کے خلاف پچھلے میچ میں کافی دباؤ میں کھیلتے ہوئے نصف سنچری بنائی تھی 21 رنز بنا کر آؤٹ ہوئے۔ انہوں نے پیٹرسن کے ساتھ مل کر 62 گیندوں پر پچاس رنز کی پارٹنر شپ بنائی۔

انگلینڈ کو امید تھی کہ اینڈریو فلنٹاف اس اہم میچ میں کچھ کر دکھائیں گے لیکن وہ ایک مرتبہ پھر ناکام رہے اور صرف چار رنز پر ہاگ کی گیند پر وکٹ کیپر گلکرسٹ نے ان کا کیچ لیا ۔ پال کالنگ ووڈ بھی شان ٹیٹ کی گیند پر وکٹ کیپر گلکرسٹ کے ہاتھوں میں کیچ دے کر پویلین لوٹے۔

اس سے صرف تین رنز قبل ایئن بیل آؤٹ ہوئے جنہوں نے نو چوکوں کی مدد سے 77 رنز بنائے اور پھر گلین میگرا کی گیند پر ایکسٹرا کور پر مائیکل ہسی نے ان کا کیچ لیا۔

ایئن بیل اور کیون پیٹرسن نے آغاز ہی میں نقصان کے بعد ذمہ داری سے بیٹنگ کرتے ہوئے صرف 107 گیندوں پر سو رنز کی پارٹنر شپ مکمل کی۔

انگلینڈ نے اس میچ میں ایڈ جوائس کی جگہ انڈریو سٹراس کو ٹیم میں شامل کیا لیکن وہ صرف سات رن بنا کر شان ٹیٹ کی گیند پر بولڈ ہو کر پویلین واپس لوٹ گئے۔

اس سے قبل انگلینڈ کی جانب سے کپتان مائیکل وان اور ایئن بیل نے اننگز کا آغاز کیا اور صرف دس کے مجموعی سکور پر شان ٹیٹ نے مائیکل وان کو کلین بولڈ کر دیا۔ مائیکل وان ایک مرتبہ پھر ایک اچھی اننگز کھیلنے میں ناکام رہے۔

	ایئن بیل اور کیون پیٹرسن کے درمیان 140 رنز کی پارٹنر شپ بنی

دونوں ٹیموں کے درمیان پچھلے چودہ ایک روزہ میچوں میں سات میچ آسٹریلیا نے جیتے ہیں اور پانچ انگلینڈ نے جبکہ عالمی کپ میں دونوں ٹیمیں اب تک پانچ مرتبہ مد مقابل آئی ہیں جس میں سے انگلینڈ کو دو دفعہ فتح حاصل ہوئی ہے۔

انگلینڈ کے کپتان مائیکل وان کا کہنا تھا کہ آسٹریلوی ٹیم زبردست فارم میں ہے اور اسے ہرانے کے لیے انگلینڈ کو اپنا بہترین کھیل دکھانا ہوگا۔ لیکن خود وان اور آل راؤنڈر اینڈریو فلنٹاف آج کے میچ میں بھی ناکام ہی رہے۔

انگلینڈ کی ٹیم:
انڈریو سٹراس، مائیکل وان (کپتان)، ایئن بیل، کیون پیٹرسن، پال کالنگ ووڈ، اینڈریو فلنٹاف، آر ایس بوپارا، پ اے نکس، ساجد محمود، جیمی اینڈرسن اور مونٹی پنیسر۔

آسٹریلیا کی ٹیم:
ایڈم گلکرسٹ، ہیڈن، پونٹنگ، کلارک، بریڈ ہوڈج، اینڈریو سمنڈز، مائیکل ہسی، ہاگ، نیتھن بریکن، شان ٹیٹ اور میگرا۔