گنگولی اکیاون گیندوں پر سات رنز بنا کر آؤٹ ہوئے

سری لنکا بمقابلہ انڈیا: سکور بورڈ

سری لنکا بمقابلہ انڈیا: تصویروں میں

کپتان ڈراوڈ 60 رنز کے ساتھ اور وریندر سہواگ 48 رنز کے ساتھ ٹاپ سکورر رہے۔

سری لنکا کے سب سے کامیاب بولر مرلی دھرن تھے جنہوں نے 41 رنز دے کر تین کھلاڑی آؤٹ کیے۔ لیکن واس، ملنگا، فرنینڈو اور جے سوریا نے بھی بہت اچھی بولنگ کی اور کسی بھی انڈین بیٹسمین کو کھل کر کھیلنے کا موقعہ نہیں دیا۔ اس طرح انڈیا کی پوری ٹیم چوالیسویں اوور میں آؤٹ ہو گئی۔

	سچن تندولکر صفر پر بولڈ ہو گئے

انڈیا کی طرف سے اتھاپا اور سارو گنگولی نے اوپن کیا اور جب سکور 25 پر پہنچا تو واس نے اپنی ہی گیند پر اتھاپا کو کیچ آؤٹ کر دیا۔ انہوں نے 18 رنز بنائے۔

اس کے بعد گنگولی بھی تیز رنز بنانے کو کوشش میں اونچا شاٹ کھیل کر سات کے انفرادی سکور پر آؤٹ ہو گئے۔ مرلی دھرن نے بھاگتے ہوئے ان کا کیچ لیا۔ انہوں نے 51 گیندوں پر سات رنز بنائے اور ان کی اننگز بھی واس نے ہی ختم کی۔

ایک ہی رن کے بعد سری لنکا کو سب سے بڑی کامیابی فرنینڈو کی گیند پر حاصل ہوئی جنہوں نے تندولکر کو بولڈ کر دیا۔ تندولکر بغیر کوئی رن بنائے پولین واپس لوٹ گئے۔

تندولکر کے آؤٹ ہونے کے بعد ڈراوڈ اور سہواگ نے سکور کو آہستہ آہستہ آگے بڑھیا لیکن جب سکور 98 پر پہنچا تو سہواگ مرلی دھرن کی گیند پر جے وردھنے کے ہاتھوں کیچ آؤٹ ہو گئے۔ اس کے بعد یوراج سنگھ بھی ایک مشکل رن بناتے ہوئے رن آؤٹ ہوئے۔

انڈیا کی آخری امید دھونی تھے کہ اگر وہ ڈراوڈ کے ساتھ وکٹ پر کھڑے رہیں تو انڈیا میچ میں واپس آ سکتا ہے لیکن ایسا نہیں ہوا۔ دھونی بھی مرلی دھرن کی ایک عمدہ گیند پر صفر پر ہی ایل بی ڈبلیو آؤٹ ہو گئے۔

136 کے سکور پر اگرکر آؤٹ ہوئے اور 159 کے سکور پر ہی کپتان ڈراوڈ 60 رنز بنا کر جے سوریا کی گیند پر مرلی دھرن کے ہاتھوں کیچ آؤٹ ہو گئے۔ ظہیر خان ایک اور پٹیل 10 رنز بنا سکے۔ ہربھجن 17 رنز بنا کر ناٹ آؤٹ رہے۔

اس سے قبل سری لنکا نے مقررہ 50 اوورز میں چھ وکٹ کے نقصان پر 254 رنز بنائے اور اس طرح انڈیا کو میچ جیتنے کے لیے 255 کا ہدف دیا۔

	سری لنکا کے بولنگ اٹیک میں ملنگا اور فرنینڈو نے اہم کردار ادا کیا

سری لنکا کی طرف سے رسل آرنلڈ اور چمیندا واس 19، 19 رنز بنا کر ناٹ آؤٹ رہے۔

سری لنکا کے آخری آؤٹ ہونے والے کھلاڑی سلوا تھے جو ایک اچھی اننگز کھیل کر 59 کے سکور پر ظہیر خان کے ہاتھوں کیچ آؤٹ ہوئے۔

اس سے قبل دلشن آؤٹ ہوئے تھے جو ایک محتاط اننگز کے بعد 38 رنز بنا کر پٹیل کی گیند پر آؤٹ ہوئے۔ ’ڈینجر مین‘ تھارانگا نے آہستہ آہستہ سکور کو بڑھایا لیکن وہ تندولکر کی گیند پر 64 رنز بنانے کے بعد ایل بے ڈبلیو آؤٹ ہوئے۔

بنگلہ دیش کے خلاف 109 رنز بنانے والے سری لنکا کے اوپنر سنتھ جے سوریا چھ اور کپتان مہیلا جے وردھنے سات رنز بنانے کے بعد آؤٹ ہو گئے۔ جے سوریا کو ظہیر خان اور جے وردھنے کو اگرکر نے آؤٹ کیا۔

	انڈیا کے بولروں نے سری لنکا کے بلے بازوں کو بڑا سکور کرنے سے روکے رکھا

انڈیا نے ٹاس جیتا تھا اور سری لنکا کو پہلے کھیلنے کی دعوت دی تھی۔

دونوں ٹیموں نے ایک ایک تبدیلی کی۔ انڈیا نے انیل کمبلے کی جگہ ہربھجن سنگھ کو اور سری لنکا نے فرویز مہاروف کی جگہ دلہارا فرنینڈو کو ٹیم میں شامل کیا۔

انڈیا کی ٹیم: اے آر اتھاپا، سارو گنگولی، وریندر سہواگ، سچن تندولکر، راہول ڈراوڈ، یوراج سنگھ، مہندر سنگھ دھونی، اجیت اگرکر، ہربھجن سنگھ، ظہیر خان، ایم پٹیل۔

سری لنکا کی ٹیم: ڈبلیو تھارانگا، سنتھ جے سوریا، مہیلا جے وردھنے، کمارا سنگاکارا، دلشن، رسل آرنلڈ، جمیندا واس، سی فرنینڈو، مرلی دھرن، ایس ملنگا۔