 | | | کرکٹ میں کرپشن موجود ہے: مالکم اسپیڈ |
انٹرنیشنل کرکٹ کونسل نے کہا ہے کہ پاکستانی کوچ باب وولمر کے ’قتل‘ کے باوجود ویسٹ انڈیز میں کھیلا جانے والا کرکٹ ورلڈ کپ جاری رہے گا۔ آئی سی سی کے چیف ایکزکیٹِو مالکم اسپیڈ نے ایک نیوز کانفرنس کے دوران تصدیق کی کہ ٹورنامنٹ پہلے سے طےشدہ شیڈول کے مطابق کھیلا جائے گا۔ جمعرات کو انہوں نے ایک اخباری کانفرنس کے دوران کہا کہ باب وولمر کی ہلاکت کے نتیجے میں ’یہ قیاس آرائی ہوتی رہی ہے کہ کرکٹ ورلڈ کپ جاری نہیں رہ سکتا ہے لیکن ایسا نہیں ہوگا۔‘ کِنگسٹن میں اس اخباری کانفرنس کے دوران جمیکا کی پولیس نے اعلان کیا کہ کوچ باب وولمر کی ہلاکت ان کا گلا گھونٹنے کی وجہ سے ہوئی اور پولیس اس کی ’قتل‘ کی حیثیت سے تحقیقات کررہی ہے۔ مالکم اسپیڈ کا کہنا تھا: ’اتوار سے ہی (جس دن باب وولمر ہلاک ہوئے) میچ جاری ہیں اور جمعہ کو بھی جاری رہیں گے۔‘ آئی سی سی کے سربراہ نے کہا کہ ورلڈ کپ میں شامل ’تمام کرکٹ ٹیمیں جمیکا کی پولیس کی مدد جتنا ممکن ہوگا کریں گی‘ تاکہ وہ وولمر کے ’قتل‘ کی تحقیقات کرسکے۔ اسپیڈ نے یہ بھی کہا کہ کرکٹ میچوں کے ٹائم ٹیبل یا کھیلے جانے والے اسٹیڈیم میں کوئی تبدیلی نہیں کی جارہی ہے۔ انہوں نے کہا کہ کرکٹ کے لیے یہ ایک چیلنج ہے کہ ورلڈ کپ بہتر طریقے سے اختتام کو پہنچے۔ تاہم انہوں نے اس بات کا اعتراف کیا کہ کرکٹ کے کھیل میں کرپشن ہے لیکن ان کا ساتھ ہی یہ بھی اصرار تھا کہ یہ فیصلہ کرنا قبل از وقت ہوگا کہ باب وولمر کی ہلاکت کرپشن کا نتیجہ ہے۔
| 
باب وولمر کا گلا گھونٹ دیا گیا: پولیس
