عبدالرشید شکور بی بی سی اردو ڈاٹ کام، کولمبو

	سری لنکا کے پردیپ کمار (درمیان) طلائی تمغہ، بائں انڈیا کے وشال سکسینہ نقرئی اور پاکستان کے محمد عمران کانسی کا تمغہ

بھارت کی برتری بدستور قائم ہے جس نے اب تک 113 طلائی تمغے حاصل کئے ہیں۔

سنیچر کو پاکستانی کھلاڑیوں کی جانب سے شاندار کارکردگی سامنے آئی اور انہوں نے ریسلنگ میں تین، شوٹنگ میں دو جب کہ سکواش، ایتھلیٹکس، کراٹے، تائی کوانڈو اور فٹبال میں ایک ایک طلائی تمغہ حاصل کیا۔

اتوار کو پاکستان نے تائی کوانڈو میں ایک گولڈ میڈل جیتا۔

فٹبال فائنل میں پاکستان نے عدیل احمد کے فیصلہ کن گول کی بدولت میزبان سری لنکا کو شکست دے کر اپنے اعزاز کا کامیابی سےدفاع کیا۔ پول میچ میں بھی پاکستان نے سری لنکا کو ایک گول سے ہرایا تھا۔

ایتھلیٹکس میں پاکستان کے بشارت نے نیا ساؤتھ ایشین گیمز ریکارڈ قائم کرتے ہوئے گولڈ میڈل جیتا۔

ایتھلیٹکس میں پاکستان نے مجموعی طور پر تین گولڈ میڈلز چار چاندی اور بارہ کانسی کے تمغے حاصل کیئے۔

شوٹنگ مقابلوں میں پاکستان نے پانچ گولڈ میڈلز کی شاندار پرفارمنس دکھائی۔ اسلام آباد کے ساؤتھ ایشین گیمز مں پاکستان کے صرف دو طلائی تمغے تھے۔

پاکستانی پہلوانوں نے اپنی قوت کا بھرپور مظاہرہ کیا اور چھ گولڈ میڈلز حاصل کیئے۔

مینز سکواش ٹیم ایونٹ کے فائنل میں پاکستان نے بھارت کو شکست دیدی۔ اس سے قبل انفرادی ایونٹ کے فائنل میں بھی پاکستان کے منصور زمان نے ہم وطن عامر اطلس کو ہرایا تھا۔

کبڈی فائنل میں بھارت نے پاکستان کو بیس کے مقابلے میں چھبیس پوائنٹس سے شکست دی۔

والی بال کے سیمی فائنل میں پاکستان کو بھارت نے ہرادیا جس کے بعد پاکستانی ٹیم کے بلغارین کوچ اسٹراول بیلوف نے اعلان کیا کہ وہ اس شکست کی ذمہ داری قبول کرتے ہوئے عہدہ چھوڑ رہے ہیں۔