سٹراس سنچری مکمل کرنے کے بعد آؤٹ ہوئے ہیں

چوتھے دن کے آخری سیشن میں پاکستان کو دوسری اننگز میں ایک اوور کھیلنا پڑا تاہم سلمان بٹ نے یہ چھ گیندیں بغیر کوئی رن لیئے گزار دیں۔ پاکستان اب منگل کے روز یہ ہدف حاصل کرنے کی کوشش کرے گا۔

تفصیلی سکور کارڈ

ہیڈنگلے ٹیسٹ کا چوتھا دن

ہیڈنگلے ٹیسٹ کا تیسرا دن

ہیڈنگلے: دوسرا دن، تصاویر

انگلینڈ کے آؤٹ ہونے والے آخری کھلاڑی کرس ریڈ تھے جنہیں پچپن کے انفرادی سکور پر محمد سمیع نے اپنا تیسرا شکار بنایا۔ انہیں سمیع نے بولڈ کیا۔ آؤٹ ہونے والے نویں کھلاڑی ہارمیسن تھے جو نو گیندوں پر چار رن بنا کر عمر گل کی گیند پر کیچ ہوگئے۔

شاہد نذیر دوسرے باؤلر تھے جنہوں نے بتیس رن کے عوض تین وکٹ لیئے۔ انہوں نے میتھو ہوگارڈ کو آٹھ کے انفرادی سکور پر سلپ میں کیچ آؤٹ کروایا۔اس سے قبل بالنگ میں تبدیلی پر شاہد نذیر نے کولنگ ووڈ کو پچیس کے انفرادی سکور پر بولڈ کر دیا تھا۔ اس کے فوراً بعد اسی اوور میں شاہد نے ساجد محمود کو صرف دو رن پر آؤٹ کر دیا۔ ان کا کیچ وکٹ کیپر کامران اکمل نے لیا۔

اس سے پہلے چائے کے فوراً بعد محمد سمیع نے انگلش بلے باز این بیل کو آؤٹ کر لیا جس سے بظاہر ڈرا کی جانب بڑھ رہے میچ میں جان آگئی۔ تیز بالر محمد سمیع کی یہ دوسری وکٹ تھی۔ اس سے قبل انگلش کپتان اینڈریو سٹراس ایک سو سولہ رن بنا کر محمد سمیع کی ہی گیند پر وکٹ کیپر کے ہاتھوں کیچ آؤٹ ہوئے ہیں۔ یہ ان کی دسویں ٹیسٹ سنچری تھی۔

پیٹرسن سولہ جبکہ کُک اکیس رن ہی بنا سکے۔ دانش کنیر نے بھی دو وکٹیں لے کر کھیل میں جان ڈال دی۔

چوتھے دن پاکستانی فیلڈروں کی خراب فارم کا سلسلہ جاری رہا اور انگلش اننگز کے ابتدائی اوورز میں وکٹ کیپر کامران اکمل نے پہلے محمد سمیع اور پھر عمرگل کی گیندوں پر مارکس ٹریسکوتھک کے کیچ چھوڑے۔

تیسرے دن کھیل کے اختتام تک انگلینڈ نے بغیر کسی نقصان کے تین رنز بنائے تھے۔ اس سے پہلے پاکستان کی پوری ٹیم اپنی پہلی اننگز میں 538 رنز کر آؤٹ ہوگئی تھی۔ایک موقع پر پاکستان کا سکور صرف تین وکٹوں کے نقصان پر447 رنز تھا لیکن پاکستان کی بقیہ سات کھلاڑی سکور میں صرف اکانوے کا اضافہ کر کے آؤٹ ہو گئے۔

پاکستان کی جانب سے محمد یوسف اور یونس خان نے 363 رنز کی پارٹنرشپ بنا کر پاکستان کی پوزیشن کو مستحکم بنا دیا۔ محمد یوسف نے اس سیریز میں اپنی دوسری ڈبل سنچری مکمل نہ کر سکے اور ایک سو بانوے رن بنا کر آؤٹ ہوئے جبکہ یونس خان 173 رنز بنا کر رن آؤٹ ہوگئے۔

	انضمام الحق سویپ شاٹ کھیلتے ہوئے وکٹوں پر جا گرے۔

کپتان انضمام الحق چھبیس رنز بنا کر مونٹی پانیسر کی گیند پر سوئیپ شاٹ کھیلتے ہوئے وکٹوں سے ٹکرا گئے جبکہ فیصل اقبال بغیر کوئی سکور کیئے پہلی ہی گیند پر پال کولنگوڈ کو وکٹ دے کر پویلین واپس چلے گئے۔

وکٹ کیپر کامران اکمل بیس رنز بنا کر ساجد محمود کا شکار بنے۔شاہد نذیر تیرہ رنز سکور کر کے ناٹ آؤٹ رہے۔ گیارہویں نمبر پر بیٹنگ کرنے والے دانش کنیریا نےجارجانہ انداز میں کھیلتے ہوئے اپنے کیریئر کا سب سے زیادہ سکور کیا۔ کنیریا نے ایک چھکے کی مدد سے انتیس رنز سکور کیے۔ محمد سمیع نے انیس اور عمر گل نے سات رنز بنائے۔

انگلینڈ کی جانب سے مونٹی پانیسر سب سے کامیاب بولر رہے۔مونٹی نے سینتالیس اوروں میں ایک سو ستائیس رنز دے کر تین وکٹیں حاصل کیں۔ ساجد محمود نے دو وکٹیں حاصل کیں، سٹیو ہارمیسن، میتھیو ہوگارڈ اور پاول کولنگوڈ کو ایک، ایک وکٹ ملی جبکہ دو پاکستانی کھلاڑی رن آؤٹ ہوئے۔

پاکستان کی ٹیم : انضمام الحق، یونس خان، محمد یوسف، سلمان بٹ، فیصل اقبال، کامران اکمل، توفیق عمر، شاہد نذیر، محمد سمیع، عمر گل، دانش کنیریا۔

انگلینڈ کی ٹیم: اینڈریو سٹراس، مارکس ٹریسکوتھک، الیسٹر کک، کیون پیٹرسن، این بیل، پال کالنگ وڈ، کرس ریڈ، سٹیو ہارمیسن، میتھیو ہوگارڈ، مونٹی پنیسر، ساجد محمود۔