بڑے تجارتی ادارں پر الزام ہے کہ وہ ’غیرصحتمندانہ‘ غذا اور مشروب کو فروغ دے رہے ہیں

سائنسی جریدے لانسیٹ میں شائع ہونے والے ایک مضمون میں میکڈونلڈز اور شراب بنانے والی کمپنی بڈوائزر کی ورلڈ کپ کے سپانسروں کی فہرست میں شمولیت پر سوالات اٹھائے گئے ہیں۔

صحت عامہ سے متعلق ڈاکٹروں نے اس مضمون میں کہا ہے کہ فٹ بال کے عالمی ادارے ’فیفا‘ اور برطانوی ادارے ایف اے یعنی ’فٹ بال ایسوسی ایشن‘ کو ان کمپنیوں کی سپانسرشِپ نہیں حاصل کرنی چاہیے تھی۔

ایف اے کی ایک ترجمان نے اپنے ردعمل میں کہا کہ میکڈونلڈز جیسی کمپنیوں نے کھلاڑیوں کی کوچنگ اور فٹ بال کے فروغ میں اہم کردار ادا کیا ہے۔

لیکن لانسیٹ میں شائع ہونے والے مضمون میں کہا گیا ہے کہ ایف اے اور فیفا جیسے اداروں کو انہی کمپنیوں سے پیسے لینے چاہیئں جو عوام میں زندگی جینے کے صحت مندانہ اور بہتر سلیقے فروغ دیتی ہیں۔

سپانسرشِپ اور فٹبال  ہم کامیابی کے ساتھ کئی برسوں سے میکڈونلڈز کے ساتھ کام کرتے رہے ہیں اور وہ اپنی کوچنگ پروگرام اور دیگر اقدامات کے ذریعے مقامی سطح پر فٹ بال کے فروغ میں اہم کردار ادا کرتے ہیں۔ ایف اے کی ترجمان

مضمون میں کہا گیا ہے کہ فیفا کا ایسی کمپنیوں کو نظرانداز کرنے کا ریکارڈ بہتر رہا ہے۔ اقوام متحدہ کے ادارے ورلڈ ہیلتھ آرگنائزیشن نے فیفا کو دوہزار دو کے ورلڈ کپ کو سگریٹ نوشی سے پاک ٹورنامنٹ بنانے پر ایک اعزاز سے نوازا تھا۔

لیکن مضمون نگاروں کا کہنا ہے کہ جرمنی میں جاری ورلڈ کپ کے سٹیڈیم میں سگریٹ نوشی پر سے پابندی ہٹادی گئی ہے اور سگریٹ نوشی سے متعلق مختلف برانڈ کے سامان جیسے لائٹر وغیرہ کو فیفا کی جانب سے باضابطہ سرپرستی حاصل ہے۔

مضمون نگاروں کا کہنا ہے کہ ورلڈ کپ میں بڈوائزر، میکڈونلڈز اور کوکا کولا جیسی کمپنیوں کی موجودگی کا مطلب ہے کہ عالمی کھیل اور صحت عامہ کے درمیان ایک تضاد پایا جارہا ہے۔

فیفا، ایف اے اور لندن میں ہونے والے 2012 کے اولمپِک گیمز میں میکڈونلڈز ایک کارپوریٹ پارٹنر کی حیثیت سے شامل ہے۔ مضمون نگاروں کے مطابق موٹاپے کا ایک بیماری کی صورت اختیار کرنے سے اس طرح کی کمپنیوں کی سپانسرشِپ پر سوالات پیدا ہوتے ہیں۔

تاہم ایف اے کی ایک ترجمان کا کہنا تھا: ’ ہم کامیابی کے ساتھ کئی برسوں سے میکڈونلڈز کے ساتھ کام کرتے رہے ہیں اور وہ اپنی کوچنگ پروگرام اور دیگر اقدامات کے ذریعے مقامی سطح پر فٹ بال کے فروغ میں اہم کردار ادا کرتے ہیں۔‘

اپنے ردعمل میں میکڈونلڈز نے ایک بیان میں کہا: ’ہم نے پچیس برسوں کے دوران مقامی سطح سے لے کر عالمی پیمانے پر فٹ بال کی حمایت میں ایک پرعزم روایت بنائی ہے۔ہم نوجوانوں کو فٹ بال میں شرکت کے لیے ہمت افزائی کرنے پر توجہ دے رہے ہیں۔‘