ہارون رشید بی بی سی اردو ڈاٹ کام، پشاور

	لوگوں نے کرکٹ کی فروخت میں اقربا پروری کی شکایت کی

شائقین کا جوش و خروش دیکھ کر ٹکٹوں کی تعداد بہت کم معلوم ہو رہی تھی۔

پاکستان اور بھارت کے درمیان پہلے ایک روزہ کرکٹ میچ کے ٹکٹوں کی فروخت جمعرات کی صبح نو بجے شروع ہونی تھی لیکن بنک کے باہر شائقین کی قطاریں صبح سات بجے سے ہی لگ چکی تھیں۔

بینک الفلاح کے علاقائی سربراہ مرزا نعیم بیگ نے بی بی سی کو بتایا کہ انہیں فراہم کی گئی مجموعی طور پر تیرہ ہزار سے زائد ٹکٹیں دو گھنٹوں کے اندر فروخت ہوچکی تھیں۔ یہ ٹکٹیں فروخت کرنے کے لیے تین دن مقرر کیے گئے تھے۔

	لوگ ٹکٹوں کے لیےصبح سے قطار لگائے کھڑے تھے

ارباب نیاز سٹیڈیم میں سولہ ہزار سے زائد تماشائیوں کے بیٹھنے کی گنجائش ہے۔

قطار میں لگے لوگوں میں اکثریت نوجوانوں کی تھی جبکہ صوبے کے دور دراز علاقوں سے بھی شائقین ٹکٹ خریدنے آئے۔ پولیس کی بھاری نفری کسی بھی ناخوشگوار واقعے سے نمٹنے کی لیے تعینات کی گئی تھی۔

خیبر بازار کی بینک برانچ کے باہر قطار میں کھڑے شور مچاتے ایسے ہی چند نوجوان شائقین سے بات کرنے پر انہوں نے بینک حکام کی جانب سے سفارش اور اقربا پروری کی شکایتیں کیں۔

ایک ہاتھ میں کتابیں دبائے کالج کے ایک طالب علم احسان اللہ کا کہنا تھا پشاور میں پہلے کون سے روزانہ میچ ہوتے ہیں پھر یہ تو پاکستان اور بھارت کا میچ ہے۔

پاکستان کرکٹ بورڈ نے اس مرتبہ ٹکٹوں کی قیمت میں بھی کئی سوگنا کا اضافہ کیا ہے۔

	کرکٹ شائقین کا جوش دیکھنے کے قابل تھا

جنرل انکلوژر یعنی زمین پر بیٹھ کر میچ دیکھنے کی قیمت پچاس سے بڑھا کر سو روپے، کرسی والے انکلوژر کا ٹکٹ دو سو سے یکسر پندرہ سو اور وی آئی پی انکلوژر میں بیٹھنے والے کو تین ہزار روپے کا ٹکٹ خریدنا پڑا ہے۔

قیمتوں میں اس اضافے کی وجہ معلوم نہیں ہوسکی۔ سٹیڈیم میں خواتین کے لیے بھی دو سو نشستیں مخصوص کی گئی ہیں۔

صوبہ سرحد میں تفریحی مواقع پہلے ہی کم ہیں۔ انگلینڈ کے خلاف سیریز میں بھی پشاور میں کوئی میچ منعقد نہیں کیا گیا تھا۔ اب سٹیڈیم میں تماشائیوں کے بیٹھنے کی کم گنجائش نے بھی صوبہ سرحد میں بڑی تعداد میں شائقین کو اس میچ کا سٹیڈیم میں لطف اٹھانے سے محروم کر دیا ہے۔