فراز ہاشمی بی بی سی اردو ڈاٹ کام، کراچی

	سوک سینٹر سے سٹیڈیم جانے والی شاہراہ کو عام ٹریفک کے لیے بند کر دیا گیا تھا

نیشل سٹیڈیم کراچی کو جانے والے تمام راستوں پر پولیس کی بھاری نفری تعینات تھی۔

سوک سینٹر سے نیشنل سٹیڈیم کو جانے والی شاہراہ کو عام ٹریفک کے لیے بند کر دیا گیا تھا۔ سوک سینٹر سے کرکٹ کے شائقین کو سٹیڈیم تک لانے کے لیے خصوصی بسوں کا انتظام کیا گیا تھا۔

سکیورٹی کے لیے کئی حصار بنائے گئے تھے اور سٹیڈیم کی سکیورٹی رینجرز کے مکمل کنٹرول میں تھی۔ انتظامیہ کے ذرائع کے مطابق پولیس اور رینجرز کے کل تین ہزار کے قریب اہلکار سٹیڈیم تعینات کیے گئے تھے۔

لاہور میں پہلے اور دوسرے ایک روزہ میچوں کے مقابلے میں کراچی کے کرکٹ شائقین میں تیسرے ایک روزہ میچ کے موقع پر زبردست جوش و خروش تھا۔

	کھلاڑیوں کے لیے سکیورٹی کے زبردست انتظامات کیے گئے تھے

کراچی میں شائقین کی ایک بہت بڑی تعداد یہ میچ دیکھنے کے لیے سٹیڈیم آئی۔

کراچی میں کرکٹ شائقین کو کسی غیر ایشیائی ٹیم کا کھیل دیکھنے کا موقع ملا ہے۔

سن دوہزار دو میں نیوزی لینڈ کی ٹیم کراچی میں ٹیسٹ کھیلنے کے لیے آئی تھی لیکن وہ میچ کی صبح ہوٹل کے باہر بم دھماکے کے بعد میچ کھیلے بغیر دورہ منسوخ کرکے واپس چلی گئی تھی۔ اس واقعہ کے بعد بنگلہ دیش اور بھارت کی ٹیمیں کراچی میں میچ کھیل چکی ہیں۔

	کراچی سٹیڈیم کا ایک منظر

انگلیڈ کے خلاف میچ کے موقع پر نیشنل سٹیڈیم کراچی شائقین سے کھچا کھچ بھرا ہوا تھا اور سٹیڈیم کے باہر بھی لوگوں ایک بہت بڑی تعداد موجود تھی۔ ان میں عورتوں، بچوں اور بوڑھوں کے علاوہ نوجوان بھی بڑی کثیر تعداد میں تھے۔

میچ دیکھنے آنے والوں میں سے ایک ریحان انجم نے بی بی سی اردو ڈاٹ کام کو بتایا کہ کراچی میں شائقین اس لیے اتنی بڑی تعداد میں میچ دیکھنے کے لیے آئے ہیں کیونکہ اس شہر میں میچوں کا انعقاد کم کردیا گیا ہے۔ ان کا کہنا تھا کہ کرکٹ کراچی کے نوجوانوں میں زیادہ مقبول ہے۔