وریندر سہواگ اس مرتبہ صرف 31 رن بنا سکے

جب کھیل ختم ہوا تواس وقت کپتان راہول ڈراوڈ 46 اور لکشمن 38 رن پر ناٹ آؤٹ تھے۔ بھارت کو پاکستان کی برتری ختم کرنے کے لیے مزید 478 رن کی ضرورت ہے اور اس کی نو وکٹیں باقی ہیں۔

تفصیلی سکور کارڈ

پہلے دن کا کھیل تصاویر میں

دوسرے دن کا کھیل تصاویر میں

بھارت کی جانب سے وریندر سہواگ اور راہول ڈراوڈ نے اننگز کا آغاز کیا اور وکٹ کے چاروں جانب دلکش سٹروک کھیلے۔ جب بھارت کا مجموعی سکور 39 پر پہنچا تو وریندر سہواگ 31 رن بنا کر آؤٹ ہو گئے۔

شعیب اختر کے دوسرے ہی اوور میں عمران فرحت نے سہواگ کا کیچ گرایا تھا تاہم چائے کے وقفے کے فوراً بعد عمران فرحت نے ہی عبدالرزاق کی گیند پر سہواگ کو کیچ کر لیا۔

	انضمام نے اپنے کیرئر کی پچیسویں سنچری بنائی

اس سےقبل کھانے کے وقفے کے بعد پاکستانی ٹیم پہلی اننگز میں 588 رن بنا کر آؤٹ ہو گئی۔ پاکستان کی جانب سے شاہد آفریدی اور انضمام الحق نے سنچریاں سکور کیں۔ پاکستانی کپتان انضمام الحق سنچری مکمل کرنے کے بعد 119 کے انفرادی سکور پر ظہیر خان کی ایک خوبصورت گیند پر کیچ ہوئے۔

آفریدی کے ڈیڑھ سو

انضمام الحق کمر میں کھنچاؤ کے باعث صبح اپنی اننگز دوبارہ شروع نہ کر سکے تھے اور ان کی جگہ عبدالرزاق کھیلنے آئے تاہم آفریدی اور کامران اکمل کے آؤٹ ہونے کے بعد انضمام میدان میں دوبارہ بیٹنگ کرنے کے لیے میدان میں آئے تھے۔

پاکستان کے آؤٹ ہونے والے آخری کھلاڑی دانش کنیریا تھے جبکہ محمد آصف ناٹ آؤٹ رہے۔ میچ کے دوسرے دن پاکستان کے آؤٹ ہونے والے دیگر کھلاڑیوں میں شعیب اختر 48 رن پر ظہیر خان کی گیند پر آؤٹ ہوئے۔ عبدالرزاق 37 رن بنا کر آر پی سنگھ کا چوتھا شکار بنے۔ کامران اکمل صفر رن پر انیل کمبلے کی گیند پر آؤٹ ہوئے جبکہ شاہد آفریدی کو بھی انیل کمبلے کی ہی گیند پر یوراج سنگھ نے کیچ کیا۔

	آفریدی 150 رن بنا کر آؤٹ ہوئے

شاہد آفریدی نے دھواں دار بیٹنگ کرتے ہوئے ڈیڑھ سو رن بنائے۔ آفریدی نے اپنی سنچری بنانے کے بعد ظہیر خان کے ایک اوور میں ایک چھکے اور تین چوکوں کی مدد سے بیس رن بنائے۔ موجود سیریز میں بھارت کے خلاف ان کی یہ لگاتار دوسری سنچری تھی۔ آفریدی نے اپنی اننگز میں چھ چھکے اور انیس چوکے لگائے۔

بھارت کے طرف سے پہلا ٹیسٹ کھیلنے والے آر پی سنگھ نے چار کھلاڑیوں کو آؤٹ کیا جبکہ انیل کمبلے اور ظہیر خان نے تین، تین وکٹیں حاصل کیں۔ عرفان پٹھان اور ہربھجن سنگھ کوئی وکٹ حاصل نہ کر سکے۔

پاکستان اور بھارت نے اپنی ٹیم میں دو، دو تبدیلیاں کی ہیں۔ پاکستان نے فاسٹ بولر محمد سمیع اور رانا نوید الحسن کی جگہ میڈیم فاسٹ بولر محمد آصف اور آل راؤنڈر عبدالرزاق کو ٹیم میں شامل کیا ہے

	کمبلے نے آفریدی اور اکمل کو آؤٹ کیا

پاکستانی ٹیم : انضمام الحق (کپتان)، سلمان بٹ، شعیب ملک، یونس خان، محمد یوسف، شاہد آفریدی، عبد الرزاق، کامران اکمل، شیعب اختر، محمد آصف اور دانش کنیریا۔

بھارتی ٹیم : راہول ڈراوڈ (کپتان)، وریندر سہواگ، وی وی ایس لکشمن، سچن تندولکر، یوراج سنگھ، مہندر دھونی، عرفان پٹھان، انیل کمبلے، آر پی سنگھ ، ظیہر خان اور ہربھجن سنگھ۔