مناء رانا بی بی سی اردو ڈاٹ کام، فیصل آباد

	پچ بہتر ہے اور تھوڑی سی تیز بھی:یونس

کھیل کے اختتام پر پریس کانفرنس سے خطاب کرتے ہوئے ان کا کہنا تھا کہ ’اگرچہ ہماری چار وکٹیں بھی گریں لیکن پھر بھی مجموعی طور پر ہماری بیٹنگ ٹھیک تھی۔ٹیسٹ میچ میں پارٹنرشپ کی کافی اہمیت ہوتی ہے اور آج ہمارے دو اچھے پارٹنر شپ سٹینڈ تھے جس کی وجہ سے ہماری پوزیشن بہتر ہے‘۔

یونس خان نے کہا کہ’میری اور محمد یوسف کی اچھی شراکت داری کے بعد انضمام اور شاہد آفریدی نے بہت ذمہ داری سے بیٹنگ کی جس سے ایک اچھا سکور بن سکا‘۔ یونس خان نے ٹاس جیت کر بیٹنگ کے فیصلے کے بارے میں کہا کہ اس وکٹ پر یہی بہترین فیصلہ ہے۔

یونس خان نے کہا کہ وہ اوپننگ سٹینڈ سے بھی مطمئن ہیں۔ ان کا کہنا تھا کہ ’کچھ عرصہ پہلے ہماری پہلی وکٹ دس یا بارہ کے سکور پرگر جاتی تھی لیکن جب سے شعیب اور سلمان کا اوپننگ جوڑا اننگز شروع کر رہا ہے ہمیں چالیس پچاس رنز کا سٹینڈ مل جاتا ہے جو بعد میں آنے والے کھلاڑیوں کے لیے ٹھیک ہوتا ہے‘۔

رانا نوید کی بجائے عبدالرزاق کو کھلانے کے فیصلے کی بابت یونس خان کا کہنا تھا کہ یہ کھیل کی حکمت عملی کا حصہ ہے جسے وہ ظاہر نہیں کرنا چاہتے۔ پچ کے بارے میں یونس خان نے کہا کہ پچ بہتر ہے اور تھوڑی سی تیز بھی جس سے صبح اور شام میں بالرز کو مدد مل رہی تھی اور بھارتی بالرز نے بھی اچھی بالنگ کی۔

	آفریدی نے ابتداء میں محتاط انداز سے بیٹنگ کی

بھارتی ٹیم کے کپتان راہول ڈراوڈ نے میچ کے بعد ہونے والی پریس کانفرنس میں کہا کہ ’اس وکٹ کو دیکھتے ہوئے ہم نے مختلف حکمت عملی اپنائی اور اسی لیے ہم پانچ سپیشلسٹ بالرز کے ساتھ میدان میں اترے اور ایسی وکٹ پر بالنگ بہت مشکل تھی اس لیے میں اپنے بالرز کی بالنگ پر مطمئن ہوں‘۔

راہول نے کہا کہ صرف آج پاکستان کے تین سو اناسی رنز اور ہماری حاصل کردہ چار وکٹوں پر میچ کے بارے میں کچھ نہیں کہا جا سکتا ابھی دونوں ٹیموں کے لیے لمبا سفر ہے۔