صلاح الدین بی بی سی اردو ڈاٹ کام، دلی

	بھارتی ٹیم اپنے دورے میں تین ٹیسٹ میچ اور پانچ ایک روزہ میچ کھیلے گی

نرنجن نے بتایا کہ پاکستان روانگی سے قبل ٹیم کے نائب کپتان وریندر سہواگ، سابق کپتان سورو گنگولی، اسپن بولر انیل کمبلے اور وکٹ کیپر پارتھیو پٹیل تین اور چھ جنوری کے درمیان اپنی اپنی ریاست میں رانجی ٹرافی کے میچيز کھیلیں گے۔

مقررہ پروگرام کے تحت پانچ جنوری کو بھارت کی ٹیم لاہور کے لیے روانہ ہوگی لیکن یہ چار کھلاڑی چھ تاریخ تک اپنے میچ کھیلنے کے بعد پاکستان جائیں گے۔

بھارت کی کرکٹ ٹیم تین ٹیسٹ میچ اور پانچ ایک روزہ میچوں کے لیے چھیالیس روزہ دورے پر پاکستان جارہی ہے۔ ٹیسٹ میچ کے لیے بھارت نے سولہ رکنی ٹیم کا اعلان کیا ہے۔

نرنجن شاہ نے کہا کہ ’پاکستان کے ساتھ ایک مشکل سیریز سے پہلے ان کھلاڑیوں کے لیے پریکٹس کا یہ ایک بہتر موقع ہوگا۔ایسا لگتا ہے کہ شاید انہیں لاہور کے وارم اپ گیم میں کھیلنے کا موقع نہیں ملےگا اس لحاظ سے یہ اور بہتر ہے‘۔

حال ہی میں بنگال کی طرف سے رانجی ٹرافی میں نہ کھیلنے کے سبب کرکٹ بورڈ نے سوروگنگولی کو سرزنش کی تھی۔ بورڈ نے گنگولی سے وضاحت طلب کی ہے کہ آخرگھریلو کرکٹ نہ کھیلنے کی وجوہات کیا ہیں۔

اطلاعات ہیں کہ گنگولی نے اس کے جواب میں کہا ہے کہ ان کی کچھ خاندانی مصروفیات تھیں اور اس کی اطلاع انہوں نے پہلے ہی بنگال کرکٹ بورڈ کو دے دی تھی۔

بورڈ کے صدر شرد پوار کی مداخلت کے بعد گنگولی کو ٹیسٹ ٹیم میں جگہ ملی ہے۔ پاکستانی دورے کے لیےگنگولی زبردست تیاریوں میں مصروف ہیں اور وہ کلکتہ کے گراؤنڈ پر ہر روز پریکٹس کر رہے ہیں ۔