عراق-امریکہ معاہدے کے تحت امریکی افواج دوہزار گیارہ تک عراق میں رہیں گی

عراق میں غیرملکی افواج اقوام متحدہ کے مینڈیٹ کے تحت اکتیس دسمبر کے بعد عراق میں نہیں رہ سکتیں۔

بغداد میں بی بی سی کی نامہ نگار کیرولائن وائیٹ کا کہنا ہے کہ اس مسودہ قانون کا منظور ہونا بہت ہی اہم تھا کیونکہ اس کے ذریعے غیرملکی افواج کو عراق میں قانونی طور پر رہنے کی اجازت مل جاتی۔

ان افواج کو اقوام متحدہ کا دیا گیا مینڈیٹ دو ہفتے سے کم عرصے میں ختم ہونے والا ہے اور امید یہی تھی کہ عراقی پارلیمان آج اس قانون کو منظور کر لے گی تاکہ بصرہ میں چار ہزار برطانوی فوجی مزید کچھ عرصہ عراق میں رہ سکیں۔

لیکن اس مسودہ قانون کو اڑسٹھ کے مقابلے میں اسی ووٹوں سے رد کر دیا گیا۔ ایک کرد رکن پارلیمان نے بی بی سی کو بتایا کہ ان کی جماعت اور وزیر اعظم کی دعوۃ پارٹی نے اس قانون کے حق میں ووٹ دیا تھا۔

’تاہم کئی ایم پی موجودہ قانون کے مسودے پر خوش نہیں۔ وہ چاہتے ہیں کہ یہ اُس معاہدے سے زیادہ ملتا جلتا ہو جو امریکہ اور عراق کے درمیان طے پایا ہے۔ اس معاہدے کے تحت امریکی فوج کو دو ہزار گیارہ کے آخر تک عراق میں رہنے کی اجازت دی گئی ہے۔‘

اب اس مسودہ قانون کو ترامیم کے لیے عراقی کابینہ کو واپس بھیجا جائے گا اور اس کے بعد جو بھی نیا قانون منظور کیا جائے گا وہ برطانیہ، آسٹریلیا، رومانیہ، ایسٹونیا، ایل سالواڈور اور نیٹو کی افواج کا عراق میں مستقبل طے کرے گا۔

گزشتہ ہفتے برطانوی وزیر اعظم گورڈن براؤن بغداد پہنچے تھے جہاں انہوں نے اس بات کی تصدیق کی تھی کہ برطانوی فوج اگلے سال جولائی تک عراق سے نکل جائے گی۔